Aefeso 3

Nĩ ũndũ wa gĩtũmi gĩkĩ, niĩ Saũlũ, njohetwo nĩ ũndũ wa kũhunjia ũhoro wa Messiya Yahshua kũrĩ inyuĩ andũ-a-Ndũrĩrĩ:

Ti-itherũ nĩ mũiguĩte ũhoro wa ũrĩa ndaheirwo ũtungata wa wega wa Yahweh nĩ ũndũ wanyu,

O na nĩguo ũhoro wa hitho ũrĩa ndaamenyithirio na ũndũ wa kũguũrĩrio nĩ Yahweh, o ta ũrĩa nyandĩkĩte na njĩra nguhĩ.

Mwathoma ũhoro ũyũ, nĩ mũkũhota kũmenya ũrĩa ndaakuũkĩirwo nĩ ũhoro ũcio wa hitho wa Messiya,

ũrĩa ũtaamenyithirio andũ a njiarwa ingĩ, ta ũrĩa rĩu ũguũrĩirio atũmwo a Yahweh aamũre o na anabii nĩ Roho.

Naguo mũbango wa Yahweh nĩ atĩ, andũ-a-Ndũrĩrĩ nĩ matuĩkĩte agai hamwe na Isiraeli, na nĩ matuĩkĩte ciĩga cia mwĩrĩ ũmwe, na makagwatanĩra thĩinĩ wa kĩĩranĩro kĩa Messiya Yahshua nĩ ũndũ wa kũhunjĩrio Ũhoro-ũrĩa-Mwega.

Ndaatuĩkire ndungata ya Ũhoro-ũcio-Mwega nĩ ũndũ wa kĩheo kĩrĩa ndaaheirwo kĩa wega wa Yahweh hotithĩtio nĩ hinya wake.

O na gũtuĩka nĩ niĩ mũnini mũno harĩ andũ a Yahweh othe, nĩ ndaheirwo wega ũcio: nĩguo hunjagĩrie andũ-a-Ndũrĩrĩ ũtonga wa Messiya ũrĩa ũtangĩmenyeka ũrĩa ũigana,

na ndaũragĩre andũ othe ũhoro wa hitho ĩno, ĩrĩa ĩtũire ĩhithĩtwo kuuma o tene, thĩinĩ wa Yahweh o we wombire indo ciothe.

Itua rĩake rĩarĩ atĩ, na ũndũ wa Ũngano, ũũgĩ wa Yahweh ũrĩa wa mĩthemba mĩingĩ ũmenyithanio kũrĩ aathani, na kũrĩ arĩa marĩ na ũhoti kũu igũrũ,

kũringana na ũrĩa aatũire atanyĩte gwĩka kuuma o tene, na ũrĩa aahingirie arĩ thĩinĩ wa Messiya Yahshua, Mwathi witũ.

Na ithuĩ nĩ ũndũ wa gũkorwo tũrĩ thĩinĩ wake, na nĩ ũndũ wa gwĩtĩkia, no tũthengerere Yahweh tũrĩ na ũmĩrĩru, na tũtarĩ na guoya.

Nĩ ũndũ ũcio nĩ ngũmũthaitha mũtikoorwo nĩ hinya tondũ wa mĩnyamaro ĩrĩa ndĩranyarirwo nayo nĩ ũndũ wanyu, tondũ nĩyo riri wanyu.

Ũndũ ũcio nĩguo ũtũmaga ndurie ndu ndĩ mbere ya Ithe wa Mwathi witũ Yahshua Messiya

o we ũrĩa andũ othe a nyũmba yake, arĩa marĩ igũrũ na arĩa marĩ gũkũ thĩ metanagio nake.

Nĩ hoyaga Yahweh, atĩ kuuma ũtonga-inĩ wa riri wake, amũheage hinya, nĩgetha mũhotithĩtio nĩ Roho wake-rĩ, mũgĩe na ũhoti thĩinĩ wanyu,

nĩgetha Messiya atũũrage ngoro-inĩ cianyu na ũndũ wa gwĩtĩkia. Na ningĩ nĩ hoyaga atĩ inyuĩ mũhandwo nĩguo mũgĩe na mĩri na mwĩkindĩre thĩinĩ wa wendani,

nĩguo mũgĩe na hinya, mũrĩ hamwe na andũ arĩa angĩ othe aamũre, na mũhotage kũmenya ũrĩa wendani wa Messiya waramĩte, na ũrĩa ũraihĩte na igũrũ, na ũrĩa ũrikĩte na thĩ,

o na mũmenye wendani ũcio ũkĩrĩte ũmenyo wothe, nĩguo mũiyũrĩrĩrio na ũiyũru wothe wa Yahweh.

Na rĩrĩ, kũrĩ Kĩhoti ũrĩa ũhotaga gwĩka maũndũ marĩa mothe tũmũũragia kana tũgeciria, na agakĩrĩrĩria mũno kũringana na ũhoti wake ũrĩa ũrutaga wĩra thĩinĩ witũ-rĩ,

aroheyo riri thĩinĩ wa Ũngano na thĩinĩ wa Messiya Yahshua, o nginya njiarwa-inĩ ciothe, thĩ-ĩyo ĩtathiraga o rĩ kana rĩ! Amein.