Afilipi 1
Nĩ ithuĩ Saũlũ na Timotheo, ngombo cia Messiya Yahshua, Marũa maya tũrandĩkĩra andũ othe arĩa aamũre thĩinĩ wa Messiya Yahshua arĩa mũrĩ kũu Filipi, hamwe na arori a ũngano, o na atungati aguo.
Mũrogĩa na wega na thayũ ciumĩte kũrĩ Yahweh Ithe witũ, na Mwathi Yahshua Messiya.
Nĩ njokagĩria Kĩhoti wakwa ngatho rĩrĩa rĩothe ndaamũririkana.
Rĩrĩa rĩothe ngũmũhoera inyuothe-rĩ, ndĩmũhoyagĩra hĩndĩ ciothe ngenete,
tondũ wa ngwatanĩro iitũ na inyuĩ harĩ Ũhoro-ũrĩa-Mwega, kuuma o mũthenya wa mbere nginya rĩu.
Niĩ nĩ njũĩ ũndũ ũyũ na ma, atĩ Yahweh ũrĩa waambĩrĩirie wĩra mwega thĩinĩ wanyu nĩ egũthiĩ na mbere kũũruta, na ndekũũtigithĩria ataũrĩkĩtie nginya mũthenya ũrĩa Messiya Yahshua agaacoka.
Kuona atĩ mũkoragwo mũrĩ ngoro-inĩ yakwa, nĩ njagĩrĩirwo nĩ kũigua ũguo nĩ ũndũ wanyu inyuothe; tondũ-rĩ, kana nĩ kuohwo njohetwo na mĩnyororo, kana nĩ kũrũĩrĩra na gwĩkĩra hinya Ũhoro-ũrĩa-Mwega, inyuĩ inyuothe nĩ mũgwatanagĩra na niĩ thĩinĩ wa wega wa Yahweh.
Yahweh nĩ mũira wakwa atĩ nĩ ndĩmwĩriragĩria inyuothe ndĩ na wendo wa Messiya Yahshua.
Na ũrĩa hoyaga nĩ atĩrĩ: atĩ wendani wanyu ũingĩhe mũno makĩria, mũkĩongagĩrĩrwo ũmenyo na ũkuũku wothe,
nĩgetha mũhotage gũkũũrana maũndũ marĩa magĩrĩire makĩria ya marĩa mangĩ, na mũkoragwo mũrĩ amũre na mũtarĩ na ũcuke o nginya mũthenya ũrĩa wa Messiya,
na mũtũũre mũiyũrĩtwo nĩ maciaro ma ũthingu marĩa monekaga na ũndũ wa Yahshua Messiya, nĩguo Yahweh akumagio na agoocagwo.
Na rĩu ariũ na aarĩ a Ithe witũ, nĩ ngwenda mũmenye atĩ maũndũ marĩa mangorete ti-itherũ nĩ matũmĩte Ũhoro-ũrĩa-Mwega ũthiĩ na mbere
Nĩ ũndũ ũcio-rĩ, nĩ kũmenyekete wega nĩ arangĩri a nyũmba ya mũthamaki, o na kũrĩ andũ arĩa angĩ othe atĩ niĩ njohetwo na mĩnyororo nĩ ũndũ wa Messiya.
Nĩ ũndũ wa ũrĩa njohetwo, ariũ na aarĩ a Ithe witũ aingĩ nĩ momĩrĩirio kwaria kiugo kĩa Yahweh marĩ na ũũmĩrĩru mũnene na matarĩ na guoya.
Nĩ ũhoro wa ma atĩ amwe mahunjagia Messiya marĩ na ũiru na ngarari, no angĩ mahunjagia marĩ na ngoro njega.
Acio mahunjagia marĩ na ngoro njega-rĩ, mekaga ũguo marĩ na wendani, makĩmenyaga atĩ njigĩĩtwo gũkũ nĩ ũndũ wa kũrũĩrĩra Ũhoro-ũrĩa-Mwega.
Acio angĩ mahunjagia ũhoro wa Messiya makĩenda kwĩguna, matarĩ na ngoro theru, mageciragia atĩ meka ũguo nĩ mekũnyongererithia thĩna rĩu ndĩ muohe.
No rĩrĩ, ũcio ti ũndũ wa bata kũrĩ niĩ. Ũndũ ũrĩa wa bata nĩ atĩ Messiya nĩ ahunjagio na njĩra o yothe, o na ĩngĩtuĩka nĩ njĩra ya ũhinga, kana nĩ njĩra ya ũhoro wa ma. Na nĩ ũndũ wa ũguo-rĩ, nĩ ngenaga. Ĩĩ, o na no ngũthiĩ na mbere na gũkena,
nĩgũkorwo nĩ njũĩ atĩ nĩ ũndũ wa mahoya manyu na ũteithio ũrĩa ũheanĩtwo nĩ Roho wa Yahshua Messiya, maũndũ marĩa mangorete nĩ makagarũrũka matuĩke ma kũhonokia.
Nĩ njĩrĩgĩrĩire ngĩhĩahĩaga na ngehoka atĩ ndigaconoka o na atĩa, no atĩ ngorwo na ũũmĩrĩru mũiganu nĩgetha rĩu, na o ta ũrĩa ndũire, Messiya atũũgagĩrio thĩinĩ wa mwĩrĩ wakwa, ingĩkorwo ndĩ muoyo o na kana nguĩte.
Nĩgũkorwo harĩ niĩ-rĩ, gũtũũra muoyo nĩ Messiya, nakuo gũkua-rĩ, nĩ uumithio.
No rĩrĩ, kũngĩkorwo gũtũũra muoyo ndĩ na mwĩrĩ nĩkuo kũngĩtũma wĩra wakwa ũgĩe na maciaro-rĩ, nĩ kĩ ingĩgĩthura? Niĩ ndiũĩ!
Niĩ nĩ nguucanĩirio nĩ maũndũ maya merĩ: Ndĩriragĩria gũthiĩ ngatũũranie na Messiya, na ũguo nĩguo wega makĩria;
no gũtũũra muoyo ndĩ na mwĩrĩ ũyũ nĩ ũndũ wanyu nĩ kwagĩrĩire mũno makĩria
Na tondũ nĩ menyete ũguo kũna-rĩ, nĩ njũĩ atĩ nĩ ngũtũũra muoyo, na nĩ ngũtũũrania na inyuĩ inyuothe nĩguo ndũme mũthiage na mbere, na mũgĩe na gĩkeno nĩ ũndũ wa ũrĩa mwĩtĩkĩtie,
nĩgetha ndakorwo na inyuĩ rĩngĩ, gĩkeno kĩanyu kĩiyũrĩrĩre thĩinĩ wa Messiya Yahshua nĩ ũndũ wakwa.
Na rĩrĩ, ũndũ ũrĩa ũrĩ bata nĩ atĩ mũthiage na mĩthiĩre ĩrĩa yaganĩrĩire na Ũhoro-ũrĩa-Mwega wa Messiya, nĩgetha ingĩũka kũmũrora kana njage gũũka, njiguage ũhoro wanyu o na itarĩ hamwe na inyuĩ menyage atĩ nĩ mũikarĩte mwĩhandĩte wega mũrĩ na Roho o ro ũmwe, mũkĩrũĩrĩra wĩtĩkio wa Ũhoro-ũrĩa-Mwega mũrĩ na ngoro ĩmwe,
mũtekũmakio o na atĩa nĩ arĩa mamũthũire. Naguo ũndũ ũcio ũtuĩke kĩmenyithia kũrĩ o atĩ nĩ makaanangwo, no atĩ inyuĩ nĩ mũkahonokio, na Yahweh we mwene nĩwe ũkaamũhonokia.
Nĩgũkorwo ha ũhoro wa Messiya-rĩ, nĩ mwĩtĩkĩrĩtio kũmwĩtĩkia, na to kũmwĩtĩkia kuo gwiki, o na kũnyarirwo nĩ ũndũ wake,
kuona atĩ nĩ mũrarũa mbaara ĩrĩa muonete ngĩrũa, na noyo mũraigua atĩ nĩ ndĩrarũa o na rĩu.