Afilipi 2
Mũngĩkorwo mũrĩ na ũndũ o wothe wa kũũmanĩrĩria uumanĩte na ũrĩa mũnyitithanĩtio na Messiya, kana ũndũ o wothe wa kũhorerania uumanĩte na wendani wake, o na kana wa kũgĩa na ngwatanĩro o yothe yumanĩte na Roho, o na kana ũhoro o wothe wa gũcayanĩra na wa kũiguanĩra tha uumanĩte na Messiya-rĩ,
gĩtũmagei gĩkeno gĩakwa kĩiganĩre kũna nĩ ũndũ wa gũtũũra mũrĩ a mwĩcirĩrie o ro ũmwe, na mwendaine na wendani o ũmwe, na mũrĩ kĩndũ kĩmwe thĩinĩ wa Roho o na meciria.
Mũtikaneke ũndũ mũkĩenda kwĩguna inyuĩ ene, o na kana nĩ ũndũ wa kwĩgatha, no ikaragai mwĩnyihĩtie, o mũndũ agatuaga mũndũ ũrĩa ũngĩ nĩ mwega makĩria yake mwene.
O mũndũ wanyu ndakarũmbũyagie maũndũ o marĩa mamũkoniĩ, no nĩ arũmbũyagie maũndũ ma andũ arĩa angĩ o namo.
Mwĩcirĩrie wanyu wagĩrĩirwo ũtuĩke o ta ũrĩa warĩ na Messiya Yahshua:
We-rĩ, o na gũtuĩka aarĩ mũhianire wa El, ndonire kũiganana na Yahweh ta arĩ ũndũ wa gũkumbatĩrio,
nowe nĩ gũtiganĩria aatiganĩirie ũnene wake wothe, agĩtuĩka ta ngombo, agĩciarwo ta andũ a gũkũ thĩ.
Nake ahaana ta mũndũ-rĩ, akĩĩnyihia, na agĩathĩka o nginya akĩũragwo, o kũũragwo kũrĩa gwa gũcuurio mũtĩ-inĩ!
Nĩ ũndũ ũcio, Yahweh nĩ amũtũũgĩririe o nginya igũrũ mũno, na akĩmũhe rĩĩtwa rĩrĩa rĩkĩrĩte marĩa mangĩ mothe,
nĩguo atĩ thĩinĩ wa rĩĩtwa rĩa Yahshua maru mothe magaturio, kũu igũrũ, na gũkũ thĩ, o na rungu rwa thĩ,
na ningĩ atĩ nĩmĩ ciothe ciumbũrage atĩ Yahshua Messiya nĩ Mwathi, nĩguo Yahweh Ithe witũ atĩithagio.
Nĩ ũndũ ũcio, arata akwa endwa-rĩ, o ta ũrĩa mũtũire mwathĩkaga, na to rĩrĩa ndaarĩ hamwe na inyuĩ, no makĩria rĩu itarĩ hamwe na inyuĩ-rĩ, thiĩi na mbere kũrutĩra ũhonokio wanyu wĩra, mũgĩĩtigagĩra na mũkĩinainaga,
nĩgũkorwo nĩ Yahweh ũrutaga wĩra thĩinĩ wanyu agatũma mwende gwĩkaga maũndũ make kũringana na wendi wake mwega.
Ĩkagai maũndũ mothe mũtekũnuguna na mũtegũkararania,
nĩgetha mwage ũcuke na mũtuĩke aamũre, mũtuĩke ciana cia Yahweh itarĩ na kaũgũ mũrĩ thĩinĩ wa rũciaro rũrũ ruogomu na rwaganu, na rĩrĩa mũrĩ hamwe nao inyuĩ mũkengage ta njata thĩ yothe,
o mũrũmĩtie kiugo kĩa muoyo, nĩguo ngaagĩa na ũndũ wa kwĩrahĩra mũthenya ũrĩa wa Messiya atĩ ndiahanyũkire tũhũ kana ngĩruta wĩra ngĩnoga tũhũ.
No rĩrĩ, o na ingĩtuĩka ndĩraitwo thakame igũrũ rĩa igongona ta ndĩ iruta rĩa kũnyuuo, nĩ ũndũ wa ũtungata ũrĩa mũtungatagĩra Yahweh uumanĩte na wĩtĩkio wanyu-rĩ, nĩ ngenaga na ngacanjamũka hamwe na inyuĩ inyuothe.
Nĩ ũndũ ũcio, o na inyuĩ nĩ mwagĩrĩirwo nĩ gũkena na mũcanjamũke hamwe na niĩ.
Nĩ ngwĩhoka ndĩ thĩinĩ wa Mwathi Yahshua atĩ nĩ ngũmũtũmĩra Timotheo o narua, nĩgetha o na niĩ ngaakena hĩndĩ ĩrĩa ngaaheo ũhoro wanyu
Nĩgũkorwo ndirĩ mũndũ ũngĩ ũhaana take, ũrĩa ũngĩrũmbũiya maũndũ manyu na ma.
Nĩgũkorwo andũ arĩa angĩ othe marũmbũyagia maũndũ mao ene, no ti maũndũ ma Yahshua Messiya.
No inyuĩ nĩ mũũĩ atĩ Timotheo nĩ eyonanĩtie atĩ nĩ mũndũ mwega, tondũ o ta ũrĩa mwana atungataga hamwe na ithe-rĩ, noguo akoretwo agĩtungata hamwe na niĩ wĩra-inĩ wa kũhunjia Ũhoro-ũrĩa-Mwega.
Nĩ ũndũ ũcio, nĩ ndĩrehoka kũmũtũma kũrĩ inyuĩ o ndaarĩkia kũmenya ũrĩa maũndũ makwa megũikara.
Ningĩ ndĩ na mwĩhoko thĩinĩ wa Yahweh atĩ niĩ mwene nĩ ngũũka o narua.
No rĩrĩ, nĩ nguona kwagĩrĩire ndĩmũtũmĩre mũrũ wa Ithe witũ Epafarodito, ũrĩa tũrutaga wĩra na tũkarũĩrĩra ũhoro wa Yahweh nake, na nĩwe mũtũmwo wanyu ũrĩa mwandũmĩire nĩguo arũmbũyagie mabata makwa
Nĩgũkorwo nĩ amwĩriragĩria inyuothe, na nĩ aratangĩka tondũ nĩ mwaiguĩte atĩ aarĩ mũrũaru
Ti-itherũ aarĩ mũrũaru, o na aarĩ hakuhĩ gũkua. No Yahweh nĩ amũiguĩrĩire tha, na to we wiki waiguĩrĩirwo tha, no o na niĩ nĩ anjiguĩrĩire tha nĩguo ndikae kũingĩhĩrwo nĩ kĩeha mũno
Nĩ ũndũ ũcio, kĩu nĩkĩo kĩratũma ndĩmũtũme na kwĩyendera kũnene, nĩgetha mwamuona rĩngĩ mũkene, na niĩ nyihanyihĩrwo nĩ gũtangĩka.
Mwamũkĩrei wega thĩinĩ wa Messiya mũrĩ na gĩkeno kĩnene, na mũtĩage andũ arĩa mahaana take,
tondũ aarĩ hakuhĩ gũkua nĩ ũndũ wa wĩra wa Messiya, ategũcaĩra muoyo wake, nĩgetha andeithĩrĩrie na ũteithio ũrĩa inyuĩ mũtangĩahotire kũũhe.