Afilipi 3
Ũhoro wa kũrĩkĩrĩria ariũ na aarĩ a Ithe witũ nĩ atĩrĩ, kenagai thĩinĩ wa Yahweh! Ha ũhoro wa gũcokera rĩngĩ maũndũ o marĩa ndanamwandĩkĩra-rĩ, ũcio ti ũhoro wa kũũnogia, tondũ harĩ inyuĩ nĩ ũhoro wa kũmũtiirĩrĩra.
Mwĩmenyagĩrĩrei andũ acio mahaana ta magui, o acio mekaga maũndũ moru, na arĩa metemengaga mĩĩrĩ.
Nĩgũkorwo ithuĩ nĩ ithuĩ tũruĩte kũna, ithuĩ arĩa tũhoyaga na Roho wa Yahweh, o ithuĩ arĩa twĩrahaga thĩinĩ wa Messiya Yahshua, naguo mwĩhoko witũ tũtiũigaga thĩinĩ wa mwĩrĩ,
o na gũtuĩka o na niĩ mwene ingĩenda-rĩ, ndĩ na itũmi cia gũtũma ndĩĩhokage ũhoro wa mwĩrĩ. Kũngĩkorwo kũrĩ mũndũ ũngĩ o wothe wĩciragia atĩ arĩ na itũmi cia kũgĩa na mwĩhoko thĩinĩ wa mwĩrĩ, niĩ nĩ ndĩmũkĩrĩtie.
Nĩgũkorwo niĩ ndaruithirio ndĩ na ũkũrũ wa thikũ inyanya, na ndĩ wa rũciaro rwa andũ a Isiraeli, na wa mũhĩrĩga wa Benjamini, na ndĩ Mũhibirania waciarĩtwo nĩ Ahibirania. Ha ũhoro ũkoniĩ Watho-rĩ, ndĩ Mũfarisai;
na ha ũhoro ũkoniĩ kĩyo-rĩ, ndaatũire nyariraga ũngano; na ha ũhoro wa ũthingu ũrĩa uumanaga na Watho-rĩ, ndiarĩ na ũcuke.
No rĩrĩ, maũndũ mothe marĩa ndaatuaga atĩ maarĩ na uumithio kũrĩ niĩ-rĩ, rĩu ndĩmonaga marĩ ma tũhũ nĩ ũndũ wa kũgĩa na Messiya.
Makĩria ma ũguo-rĩ, maũndũ mothe ndĩmatuaga nĩ ma tũhũ ndamagerekania na ũmenyo ũrĩa ũkĩrĩte maũndũ mothe ũrĩa uumanĩte na kũmenya Messiya Yahshua Mwathi wakwa. Nĩ ũndũ wake-rĩ, niĩ ndorirwo nĩ indo ciothe, na niĩ ngĩcitua o ta mahuti ma gũteo, nĩgetha ndĩgĩĩre na Messiya,
na ngoragwo ndĩ thĩinĩ wake, itarĩ na ũthingu wakwa mwene ũrĩa uumanaga na Watho, no ũkorwo arĩ ũthingu ũrĩa uumanaga na gwĩtĩkia Messiya; ũguo nĩ kuuga, ũthingu ũrĩa uumaga kũrĩ Yahweh, na wonekaga na ũndũ wa gwĩtĩkia.
Ũndũ ũrĩa niĩ ngwenda-rĩ, nĩ kũmenya Messiya, na menye hinya wa kũriũka gwake, na ngwatanĩre nake mĩnyamaro-inĩ yake, na haanane nake ũhoro-inĩ wake wa gũkua,
nĩguo kũngĩhoteka, ngaariũkio nyume kũrĩ arĩa akuũ.
Ndiroiga atĩ nĩ ndĩkĩtie kwamũkĩra maũndũ macio mothe, o na kana ngarĩkia gũtuĩka mwagĩrĩru kũna, no nĩ ndĩĩrutanagĩria na kĩyo nĩgetha ndĩnyitĩre o ũndũ ũrĩa ndanyitĩirwo nĩ Messiya Yahshua
Ariũ na aarĩ a Ithe witũ, ndigũtua atĩ niĩ mwene nĩ ndĩkĩtie kwĩnyitĩra ũndũ ũcio. No rĩrĩ, ũndũ ũrĩa njĩkaga no ũmwe: Nĩ kũriganĩrwo ndiganagĩrwo nĩ maũndũ marĩa mahĩtũku, na ngerutanĩria mũno gũkinyĩra maũndũ marĩa marĩ mbere,
ngerutanagĩria gũthiĩ ndorete na mbere nĩguo hootane heo kĩheo kĩrĩa Yahweh aheanaga, na nĩkĩo aanjĩtĩire thĩinĩ wa Messiya Yahshua arĩ kĩo kĩa mwĩtano wa na igũrũ.
Ithuothe arĩa tũrĩ andũ agima-rĩ, twagĩrĩirwo nĩ tũtũũre twĩciragia o ũguo. Na hangĩkorwo nĩ harĩ andũ marĩ na meciria mangĩ-rĩ, o na hau Yahweh nĩ arĩmũguũrĩria
No rĩrĩ, rekei tũtũũre kũringana na maũndũ marĩa tũrĩkĩtie kũgĩa namo.
Ariũ na aarĩ a Ithe witũ, nyitanĩrai na arĩa angĩ ũhoro-inĩ wa kwĩgerekania na niĩ, na ningĩ mũbaarage wega andũ arĩa matũũraga na mũtũũrĩre o ũrĩa twamuonereirie.
Nĩgũkorwo, o ta ũrĩa ndanamwĩra kaingĩ mbere ĩyo, na o na rĩu no ngũcokera rĩngĩ ũhoro ũcio ndĩ na maithori, andũ aingĩ matũũraga marĩ thũ cia mũtĩ wa gũcuurio wa Messiya.
Andũ acio-rĩ, kũrigĩrĩria kwao nĩ mwanangĩko, kĩhoti wao nĩ nda ciao, namo maũndũ ma kũmaconora nĩmo riri wao. Ningĩ meciragia o maũndũ ma gũkũ thĩ.
No rĩrĩ, bũrũri ũrĩa tũrĩ aguo kĩũmbe nĩ kũũrĩa igũrũ. Na ithuĩ nĩ twetagĩrĩra Mũhonokia ũrĩa ũkoima kũu, na nĩwe Mwathi Yahshua Messiya,
ũrĩa ũkaagarũra mĩĩrĩ ĩno iitũ mĩhinyaru nĩgetha ĩhaananio na mwĩrĩ wake ũcio ũrĩ riri, nĩ ũndũ wa hinya ũrĩa ũmũhotithagia gwatha maũndũ mothe.