Afilipi 4

Nĩ ũndũ ũcio-rĩ, inyuĩ ariũ a Ithe witũ nyendete mũno na ndĩrerirĩria kuona, o inyuĩ gĩkeno gĩakwa na thũmbĩ yakwa, rũgamai mwĩhandĩte na njĩra ĩyo thĩinĩ wa Yahweh, inyuĩ endwa akwa.

Ndĩrathaitha Yudia na ngathaitha Sintike makoragwo na mwĩcirĩrie ũmwe thĩinĩ wa Yahweh

Ĩni, o nawe ndagũthaitha, tondũ ũrĩ mũrutithania wĩra hamwe na niĩ kũna, ũthiĩ na mbere gũteithia andũ-a-nja acio merutanĩirie mũno hamwe na niĩ nĩ ũndũ wa ũhoro ũrĩa mwega, o hamwe na Klementi na acio angĩ tũrutithanagia wĩra nao, arĩa marĩĩtwa mao marĩ ibuku-inĩ rĩa muoyo.

Hingo ciothe kenagai thĩinĩ wa Yahweh. O rĩngĩ nguuga, Kenagai

Rekei ũigananĩru wanyu ũmenyekage nĩ andũ Messiya arĩ hakuhĩ

Mũtigatangĩkage nĩ ũndũ o na ũrĩkũ, no maũndũ-inĩ mothe menyithagiai Yahweh maũndũ marĩa mũbataraga kũgerera mahoya na mathaithana o hamwe na gũcokia ngatho;

naguo thayũ wa Yahweh ũrĩa ũkĩrĩte ũtaũku wothe nĩ ũrĩgitagĩra ngoro cianyu na ũhoti wanyu wa gwĩciria kũgerera Messiya Yahshua.

Ngĩrĩkĩrĩria ariũ a Ithe witũ-rĩ, maũndũ o mothe ma ma, maũndũ o mothe ma bata, maũndũ o mothe ma ũthingu, maũndũ o mothe maamũre, maũndũ o mothe ma kwendeka, maũndũ o mothe matĩĩku, maũndũ o mothe mega, na maũndũ o mothe ma kũgathĩrĩrio, thiĩi na mbere gwĩciragia maũndũ macio.

Maũndũ marĩa mwerutire na mũgĩĩtĩkĩra na mũkĩigua na mũkĩona ũhoro-inĩ wakwa, mekagei, nake Kĩhoti wa thayũ nĩ arĩkoragwo hamwe na inyuĩ.

Nĩ ndĩrakena mũno thĩinĩ wa Yahweh kuona atĩ rĩu nĩ mũrurumũkĩtie ũhoro wa kũnũmbũiya. O na gũtuĩka nĩ mwanũmbũyagia, mũtiarĩ na mweke wa gwĩka ũguo

Ndiroiga ũguo tondũ atĩ ndĩ na bata, nĩ gũkorũo nĩ ndĩrutĩte kũiganĩra gũtekũmakania ũrĩa maũndũ makwa matariĩ

Nĩ njũũĩ gũikara itarĩ na indo nyingĩ na gũikara ndĩ na indo nyingĩ. Maũndũ-inĩ mothe na ũrĩa wothe kũngĩkorũo gũtariĩ nĩ ndĩrutĩte hitho ya gũikara hũniĩ na gũikara hũtiĩ, gũkorũo na indo nyingĩ na gũkorũo itarĩ

Maũndũ-inĩ mothe nĩ ngoragwo na hinya kũgerera ũrĩa ũũheaga hinya.

No rĩrĩ, nĩ mwekire wega nĩ kũnyitanĩra na niĩ thĩna-inĩ wakwa

Na rĩrĩ, inyuĩ Afilipi ningĩ nĩ mũũĩ atĩ rĩrĩa mwerutire ũhoro ũrĩa mwega riita rĩa mbere, ndoima Makedonia, gũtirĩ kĩũngano kĩngĩ kĩanyitanĩire na niĩ ũhoro-inĩ wĩgiĩ kũheana na kwamũkĩra, tiga o inyuĩ;

tondũ rĩrĩa ndarĩ Thesalonike, nĩ mwandũmĩire kĩndũ nĩ ũndũ wa mabataro makwa, na to riita rĩmwe, ĩndĩ nĩ maita merĩ

Ti atĩ nĩ kĩheo ndĩracaria, no ndĩrenda maciaro marĩa mekuongerera uumithio mũthithũ-inĩ wanyu

No rĩrĩ, ndĩ na kĩrĩa gĩothe ndĩrabatara, o na makĩria. Ndĩ na indo ciothe, tondũ nĩ nyamũkĩrĩte kuuma kũrĩ Epafrodito kĩrĩa mũrandũmĩire, mũtararĩko mwega, igongona rĩretĩkĩrĩka, na rĩrakenia Yahweh

Nake Kĩhoti wakwa nĩ arĩmũheaga biũ mabataro manyu mothe kũringana na ũtonga wake ũrĩ riri kũgerera Messiya Yahshua

Rĩu-rĩ, Yahweh o we Ithe witũ arogoocwo tene na tene. Amein.

Ngeithĩriai mũndũ o wothe mwamũre ũrĩ na ũiguano na Messiya Yahshua. Ariũ a Ithe witũ arĩa tũrĩ nao nĩ mamũgeithia

Arĩa othe aamũre, na makĩria arĩa a nyũmba ya Kaisari, nĩ mamũgeithia.

Ũtugi mũnene wa Mwathi Yahshua Messiya ũroikara na Roho ũrĩa muonanagia.