Agalatia 3
Wooii inyuĩ Agalatia aya akingiitaru! Mũrogetwo nũ atĩ mũtingĩathĩkĩra ũhoro wa ma? O inyuĩ muonirio wega Yahshua Messiya arĩ mũcuurie mũtĩ igũrũ.
No nyende kũmenya ũndũ ũmwe tu kuuma kũrĩ inyuĩ: Mwaheirwo Roho nĩ ũndũ wa gwathĩkĩra Watho, kana nĩ ũndũ wa gwĩtĩkia ũhoro ũrĩa mwaiguire
Kaĩ mũrĩ akĩĩgu atĩa? Mwambĩrĩirie na Roho wa Yahweh, na rĩu mũrenda kũrĩkĩrĩria na hinya wa mwĩrĩ?
Anga mwathĩnirio na maũndũ maingĩ ũguo o tũhũ, angĩkorwo ũhoro ũcio wothe warĩ wa tũhũ?
We Yahweh amũheaga Roho wake na akaringaga ciama gatagatĩ kanyu nĩ ũndũ wanyu gwathĩkĩra Watho, kana nĩ ũndũ wa gwĩtĩkia ũhoro ũrĩa mwaiguire?
Ta ririkanai ũhoro wa Iburahĩmu, Maandĩko moigĩte atĩrĩ: “Etĩkirie Yahweh, nake Yahweh akĩmũtua mũthingu.”
Nĩ ũndũ ũcio kĩmenyei atĩ andũ arĩa metĩkĩtie nĩo ciana cia Iburahĩmu.
Na tondũ Maandĩko marĩa maamũre nĩ moigĩte o mbere atĩ Yahweh nĩ agatua andũ-a-Ndũrĩrĩ athingu na ũndũ wa gwĩtĩkia-rĩ, Maandĩko macio nĩ mahunjĩirie Iburahĩmu Ũhoro-ũrĩa-Mwega o kabere, makiuga atĩrĩ: “Ndũrĩrĩ ciothe nĩ ikarathimwo nĩ ũndũ waku.”
Nĩ ũndũ ũcio andũ arĩa metĩkĩtie nĩ marathimanagĩrio hamwe na Iburahĩmu, mũndũ ũcio warĩ mwĩtĩkia.
Andũ arĩa othe mehokaga ũhoro wa gwathĩkĩra Watho-rĩ, marĩ na kĩrumi, nĩgũkorwo Maandĩko moigaga atĩrĩ, “Kũgwatwo nĩ kĩrumi nĩ mũndũ o wothe ũtahingagia maũndũ marĩa mothe mandĩkĩtwo Ibuku-inĩ rĩa Watho.”
Nĩ tũũĩ wega atĩ gũtirĩ mũndũ ũngĩtuwo mũthingu mbere ya Yahweh nĩ ũndũ wa gwathĩkĩra Watho, tondũ Maandĩko moigĩte atĩrĩ: “Mũndũ ũrĩa mũthingu agaatũũra muoyo nĩ ũndũ wa gwĩtĩkia.”
No Watho-rĩ, nduumanĩte na ũhoro wa gwĩtĩkia; handũ ha ũguo Maandĩko moigaga atĩrĩ, “Mũndũ ũrĩa wathĩkagĩra maũndũ ma Watho agaatũũrio muoyo nĩ mo.”
Nake Messiya nĩ atũkũũrire agĩtũruta kĩrumi-inĩ kĩa Watho na ũndũ wake mwene gũtuĩka kĩrumi ithenya riitũ, nĩgũkorwo nĩ kwandĩkĩtwo atĩrĩ, “Kũgwatwo nĩ kĩrumi nĩ mũndũ o wothe ũcuurĩtio mũtĩ-igũrũ.”
Aatũkũũrire nĩguo kĩrathimo kĩrĩa Iburahĩmu aarathimĩtwo nakĩo gĩkinyĩre andũ-a-Ndũrĩrĩ na ũndũ wa Messiya Yahshua, nĩguo atĩ na ũndũ wa gwĩtĩkia twamũkĩre Roho ũrĩa weranĩirwo.
Ariũ na aarĩ a Ithe witũ, rekei ndĩmuonie na ngerekano yumanĩte na maũndũ marĩa mũũĩ. O ta ũrĩa gũtarĩ mũndũ ũngĩhota kweheria ũndũ kana kuongerera ũndũ harĩ kĩrĩkanĩro kĩrĩa gĩthondeketwo nĩ mũndũ-rĩ, no taguo ũhoro ũyũ ũtariĩ.
Maũndũ marĩa meranĩirwo, meerĩirwo Iburahĩmu na mbeũ yake. Maandĩko matiugĩte “mbeũ ciake”, ta arĩ ũhoro wa andũ aingĩ, no moigĩte “na mbeũ yake”, ũguo nĩ kuuga mũndũ ũmwe, na nĩwe Messiya.
Ũrĩa ndĩrenda kuuga nĩ atĩrĩ: Watho, ũcio wokire thutha wa mĩaka 430, ndũngĩeheria kĩrĩkanĩro kĩrĩa gĩekĩrĩtwo ho nĩ Yahweh mbere ĩyo, na ndũngĩtũma kĩĩranĩro kĩu gĩtuĩke gĩa tũhũ.
Nĩ ũndũ-rĩ, angĩkorwo igai rĩngĩoneka nĩ ũndũ wa Watho-rĩ, rĩtikiumanĩte na kĩĩranĩro; no Yahweh, nĩ ũndũ wa wega wake, nĩ aheire Iburahĩmu igai na ũndũ wa kĩĩranĩro.
Watho-rĩ, wakĩrĩ wa bata ũrĩkũ? Wongereirwo kũrĩ kĩĩranĩro nĩguo wonanagie mahĩtia o nginya rĩrĩa mbeũ ĩrĩa kĩrĩkanĩro kĩeranĩire ĩgoka. Watho ũcio wathanirwo nĩ araika ũkĩnengererio andũ na guoko kwa mũiguithania.
No rĩrĩ, mũiguithania ndakoragwo arũgamĩrĩire o mwena ũmwe; no Yahweh nĩ ũmwe.
Nĩ ũndũ ũcio-rĩ, kaĩ Watho ũreganĩte na ciĩranĩro cia Yahweh? Aca ti ũguo! Tondũ korwo kwarĩ na Watho waheanirwo nĩguo andũ magĩe na muoyo-rĩ, ti-itherũ o naguo ũthingu nĩ ũngĩakĩrehirwo nĩ Watho.
No Maandĩko moigaga atĩ andũ a thĩ nĩ mohetwo nĩ mehia, nĩgetha kĩĩranĩro kĩrĩa kĩheanagwo nĩ ũndũ wa gwĩtĩkia Yahshua Messiya kĩheagwo o arĩa metĩkĩtie.
Ũhoro wa gwĩtĩkia ũtanooka-rĩ, twarĩ ohe nĩ Watho, tũkahingĩrĩrio o nginya wĩtĩkio ũkaaguũranĩrio.
Nĩ ũndũ ũcio Watho nĩguo waheirwo ũhoti wa gũtũtwara kũrĩ Messiya, nĩguo tũtuwo athingu na ũndũ wa gwĩtĩkia.
Na rĩrĩ, kuona atĩ rĩu ũhoro wa gwĩtĩkia nĩ mũkinyu, tũtingĩcoka kũrũgamĩrĩrwo nĩ watho.
Inyuothe mũrĩ ciana cia Yahweh nĩ ũndũ wa gwĩtĩkia Messiya Yahshua,
nĩgũkorwo inyuothe arĩa mwabatithirio thĩinĩ wa Messiya nĩ mwĩhumbĩte Messiya.
Nĩ ũndũ ũcio gũtingĩcoka gũthuuranio Mũyahudi kana Mũyunani, na gũtirĩ ngombo kana mũndũ ũtarĩ ngombo, na gũtirĩ mũndũ mũrũme kana mũndũ-wa-nja, nĩgũkorwo inyuothe mũrĩ ũmwe ki thĩinĩ wa Messiya Yahshua.
Angĩkorwo mũrĩ a Messiya-rĩ, mũkĩrĩ a mbeũ ya Iburahĩmu, na mũrĩ agai a kũgaya kũringana na kĩĩranĩro kĩu kĩĩranĩirwo.