Agalatia 2

Mĩaka ikũmi na ĩna yathira nĩ ndambatire rĩngĩ Yahrushalayim, na ihinda rĩrĩ tũgĩthiĩ hamwe na Bar-Naba o na tũgĩthiĩ na Tito.

Ndathiire tondũ Yahweh nĩ anguũrĩirie thiĩ kuo, na nĩguo ngataarĩrie atũmwo Ũhoro-ũrĩa-Mwega ũrĩa hunjagĩria andũ-a-Ndũrĩrĩ. No ndataarĩirie o arĩa monekaga marĩ atongoria hatarĩ andũ angĩ, nĩgetha gũtigatuĩke atĩ ihenya rĩrĩa ndatengʼeraga, o na kana rĩrĩa ndatengʼerete, rĩarĩ rĩa tũhũ.

No o na Tito, ũrĩa warĩ hamwe na niĩ, ndaringĩrĩirio kũrua, o na gũtuĩka aarĩ Mũyunani.

Ũhoro ũyũ wa kũrua wagĩire ho tondũ nĩ kwarĩ na ariũ na aarĩ a Ithe witũ a maheni arĩa maatonyete gatagatĩ gaitũ na hitho marĩ athigani nĩguo matuĩrie ũhoro wa wĩyathi ũrĩa tũkoragwo naguo tũrĩ thĩinĩ wa Messiya Yahshua, makĩenda gũtũtua ngombo.

Tũtietĩkĩrire ũhoro wao o na hanini, nĩgetha ma ya Ũhoro-ũrĩa-Mwega ĩtũũre na inyuĩ.

Nao andũ arĩa moonekaga ta arĩ o anene-rĩ, (harĩ niĩ hatiarĩ na ũtiganu o ũrĩa mangĩakorirwo marĩ, nĩgũkorwo Yahweh ndaroraga mũndũ ũrĩa ahaana) andũ acio gũtirĩ ũndũ moongereire harĩ ndũmĩrĩri yakwa.

O na rĩrĩ, o nĩ moonire atĩ niĩ nĩ ndehokeirwo wĩra wa kũhunjia Ũhoro-ũrĩa-Mwega kũrĩ andũ-a-Ndũrĩrĩ, o ta ũrĩa Kepha eehokeirwo wĩra wa kũhunjĩria Ayahudi.

Nĩgũkorwo Yahweh ũrĩa warutaga wĩra thĩinĩ wa ũtungata wa Kepha arĩ mũtũmwo kũrĩ Ayahudi, nowe warutaga wĩra ũtungata-inĩ wakwa ndĩ mũtũmwo kũrĩ andũ-a-Ndũrĩrĩ.

Ningĩ Jakubu, na Kepha, na Johana, arĩa moonagwo marĩ itugĩ cia gũtiira ũngano-rĩ, nĩ matwamũkĩrire tũrĩ hamwe na Bar-Naba na guoko kwa ũrĩo kwa ngwatanĩro, rĩrĩa maamenyire wega wa Yahweh ũrĩa ndaaheetwo. Nĩ metĩkĩrire atĩ ithuĩ tũthiĩ tũkahunjĩrie andũ-a-Ndũrĩrĩ, nao mathiĩ kũrĩ Ayahudi.

Ũndũ ũrĩa maatwĩrire twĩkage nĩ atĩ tũririkanage athĩni na noguo ũndũ ũrĩa niĩ mwene ndaarĩ na kĩyo gĩa gwĩka.

Na rĩrĩ, hĩndĩ ĩrĩa Kepha ookire Antiokia, nĩ ndamũkararirie mbere ya andũ tondũ nĩ ahĩtĩtie mũno.

Andũ amwe moimĩte kũrĩ Jakubu matanakinya-rĩ, Kepha nĩ arĩanagĩra na andũ-a-Ndũrĩrĩ, no rĩrĩa maakinyire, akĩmeherera, na akĩĩamũrania na andũ-a-Ndũrĩrĩ tondũ nĩ etigagĩra andũ arĩa maarĩ a gĩkundi kĩa andũ arĩa maruaga.

O na Ayahudi arĩa angĩ makĩnyitanĩra na Kepha ũhinga-inĩ wake, o nginya o na Bar-Naba akĩhĩtithio nĩ ũhinga ũcio wao.

Rĩrĩa ndonire atĩ matiekaga kũringana na ma ya Ũhoro-ũrĩa-Mwega, ngĩĩra Kepha atĩrĩ, andũ othe makĩiguaga, “Angĩkorwo wee ũrĩ Mũyahudi, ũtũũraga na mĩtugo ya andũ-a-Ndũrĩrĩ na ti ta Mũyahudi-rĩ, ũngĩkĩhota atĩa kũhatĩrĩria andũ-a-Ndũrĩrĩ atĩ nĩguo marũmĩrĩre mĩtugo ya Ayahudi?

“Ithuĩ arĩa tũciarĩtwo tũrĩ Ayahudi na tũtarĩ ehia ta andũ-a-Ndũrĩrĩ-rĩ,

nĩ tũũĩ atĩ mũndũ ndatuĩkaga mũthingu nĩ ũndũ wa gwathĩkĩra Watho, no atuĩkaga mũthingu nĩ ũndũ wa gwĩtĩkia Yahshua Messiya. Nĩ ũndũ ũcio o na ithuĩ twĩtĩkĩtie Messiya Yahshua nĩguo tũtuwo athingu nĩ ũndũ wa gwĩtĩkia Messiya, no ti ũndũ wa gwathĩkĩra Watho, tondũ gũtirĩ mũndũ ũgaatuwo mũthingu nĩ ũndũ wa gwathĩkĩra Watho.

“Angĩgĩkorwo rĩrĩa tũgũcaria gũtuwo athingu nĩ Messiya kuonanagia atĩ ithuĩ ene tũrĩ ehia-rĩ, ũguo nĩ kuuga atĩ Messiya atungatagĩra mehia? Hĩ! Kũroaga gũtuĩka ũguo

Angĩkorwo nĩ ngwaka rĩngĩ kĩrĩa ndaanangire-rĩ, nĩ kuonania atĩ niĩ nĩ nyunĩte Watho.

Nĩgũkorwo na ũndũ wa Watho nĩ ndakuĩrĩire Watho ũcio nĩguo ndũũre muoyo ndĩ wa Yahweh.

Niĩ nĩ ndĩkĩtie gũcuuranĩrio hamwe na Messiya, na rĩu ti niĩ ndũũraga muoyo, no Messiya nĩwe ũtũũraga muoyo thĩinĩ wakwa. Muoyo ũrĩa ndũũraga mwĩrĩ-inĩ ũyũ ndũũraga na ũndũ wa gwĩtĩkia Mũrũ wa Yahweh, ũrĩa wanyendire na akĩĩruta nĩ ũndũ wakwa.

Ndingĩĩtĩkĩra gũtua wega wa Yahweh kĩndũ gĩa tũhũ, tondũ kũngĩtuĩka atĩ ũthingu wonekaga nĩ ũndũ wa Watho-rĩ, Messiya aakuire tũhũ!”