Ahibirania 1

Matukũ-inĩ ma tene Yahweh nĩ arĩirie maithe maitũ na tũnua twa anabii maita maingĩ, na njĩra mwanya mwanya,

no matukũ-inĩ maya ma kũrigĩrĩria-rĩ, ithuĩ nĩ atwarĩirie na njĩra ya Mũriũ, ũrĩa aatuire mũgai wa indo ciothe, o we ũrĩa thĩ yothe yombirwo na ũndũ wake.

Mũrũwe-rĩ, nĩwe wonanagia ũkengi wa riri wake, na nĩwe mũhianĩre mũkinyanĩru kũna wa ũrĩa Yahweh atariĩ, ningĩ nĩwe ũnyitĩrĩire indo ciothe na kiugo gĩake kĩrĩ hinya. Nake aarĩkia kũhukia Mehia ma andũ biũ-rĩ, nĩ aikarire thĩ guoko-inĩ kwa ũrĩo kwa Ũnene kũu igũrũ

Nĩ ũndũ ũcio agĩtuĩka mũnene gũkĩra araika, o ta ũrĩa rĩĩtwa rĩrĩa aagaĩirwo rĩrĩ inene gũkĩra rĩao.

Nĩ ũndũ-rĩ, nĩ mũraika ũrĩkũ Yahweh arĩ eera atĩrĩ, “Wee nĩwe Mũrũ wakwa; ũmũthĩ nĩ ndatuĩka Thoguo”? O na kana akĩmwĩra atĩrĩ, “Nĩ niĩ ngũtuĩka Ithe, nake atuĩke Mũrũ wakwa”?

Na ningĩ-rĩ, Yahweh aarehe irigithathi rĩake gũkũ thĩ, oigire atĩrĩ, “Araika othe a Yahweh nĩ mamũinamĩrĩre, mamũhoe.”

Akĩaria ũhoro wa araika oigire atĩrĩ, “Atũmaga araika ake matuĩke huho, nacio ndungata ciake agacitua nĩnĩmbĩ cia mwaki.”

No ha ũhoro ũkoniĩ Mũriũ ekuuga atĩrĩ, “Wee Kĩhoti, gĩtĩ gĩaku kĩa ũnene nĩ gĩgatũũra tene na tene, nakĩo kĩhooto nĩkĩo gĩgaatuĩka mũthĩgi wa ũthamaki waku.

Wee wendete ũthingu no ũgathũũra waganu; nĩ ũndũ ũcio, Yahweh, o we Kĩhoti waku, nĩ akwambararĩtie gũkĩra athiritũ aku othe na ũndũ wa gũgũitĩrĩria maguta ma gĩkeno.”

Ningĩ akoiga atĩrĩ, “Wee Yahweh, o kĩambĩrĩria-inĩ, nĩ waarire mĩthingi ya thĩ, o narĩo igũrũ nĩ wĩra wa moko maku.

Icio nĩ gũthira igaathira, no wee nĩ gũtũũra ũgaatũũra; igaathira o ta nguo.

Ũgaacikũnja o ta ũrĩa nguo ndaya ikũnjagwo; ikaagarũrũka o ta ũrĩa nguo igarũrũkaga. No wee ndũgarũrũkaga, na mĩaka yaku ndĩrĩ hĩndĩ ĩgaathira.”

Nĩ ũndũ-rĩ, nĩ mũraika ũrĩkũ Yahweh arĩ eera atĩrĩ, “Ikara thĩ guoko-inĩ gwakwa kwa ũrĩo, nginya rĩrĩa ngaatũma thũ ciaku ituĩke gaturwa ka makinya maku”?

Githĩ araika othe ti maroho ma gũtungata, matũmĩtwo matungatagĩre arĩa makaagaya ũhonokio?