Ahibirania 2

Nĩ ũndũ ũcio-rĩ, nĩ twagĩrĩirwo kũrũmbũiya mũno ũhoro ũrĩa twanaigua, nĩguo tũtikae gũtũgũgio tweherio kuuma harĩ guo.

Tondũ-rĩ, angĩkorwo ũhoro ũrĩa waririo nĩ araika warĩ mũrũmu-rĩ, na mũndũ o wothe wareganaga na ũhoro ũcio na akaũremera nĩ aherithagio o ũrĩa kwagĩrĩire-rĩ,

tũngĩkĩaga atĩa kũherithio tũngĩnyarara ũhonokio mũnene ũũ? Ũhonokio ũyũ, ũrĩa waambire kũhunjio nĩ Yahshua, nĩ wacokire gwĩkĩrwo hinya kũrĩ ithuĩ nĩ andũ arĩa maamũiguire.

Ningĩ Yahweh agĩĩkĩra ũhoro ũyũ ũira atĩ nĩ wa ma na ũndũ wa kuonania marũũri na morirũ, o na kũringa ciama cia mĩthemba mĩingĩ, na akĩheana iheo cia Roho Mwamũre kũrĩ andũ kũringana na wendi wake.

Thĩ ĩrĩa tũkwaria ũhoro wayo, araika tio maaheetwo wathani wayo.

No nĩ harĩ mũndũ mũna ũheanĩte ũira handũ hamwe akoiga atĩrĩ: “Mũndũ akĩrĩ kĩ tondũ ũikaraga ũkĩmwĩciragia, nake mũrũ wa mũndũ akĩrĩ kĩ atĩ nĩkĩo ũmũmenyagĩrĩra?

Watũmire atigie o hanini aiganane na araika, na ũkĩmũhumba thũmbĩ ya riri o na gĩtĩo,

na ũkĩiga indo ciothe rungu rwa magũrũ make aciathage.” Nake akĩiga indo ciothe rungu rwa mũndũ-rĩ, hatirĩ kĩndũ o na kĩrĩkũ Yahweh aatigire gĩtarĩ watho-inĩ wa mũndũ. No rĩu tũtionaga indo ciothe irĩ watho-inĩ wa mũndũ.

No tuonaga Yahshua, ũrĩa gwa kahinda kanini watuĩtwo mũnini gũkĩra araika, no rĩu ekĩrĩtwo thũmbĩ ya riri na ya gĩtĩo nĩ tondũ nĩ anyarirĩkire na agĩkua, nĩgetha, nĩ ũndũ wa Wega wa Yahweh atuĩke wa gũcama gĩkuũ handũ ha andũ othe.

Nĩgũkorwo nĩ kwagĩrĩire atĩ Yahweh, ũrĩa wombire indo ciothe na itũũraga nĩ ũndũ wake-rĩ, atũme mwambĩrĩria wa ũhonokio wao aagĩrĩre kũna kũna na ũndũ wa kũnyamario nĩguo arehe ciana nyingĩ riri-inĩ wake.

Yahshua ũrĩa ũtũmaga andũ matuĩke aamũre, o hamwe na acio matuĩtwo aamũre, othe matuĩkaga andũ a nyũmba ĩmwe. Nĩ ũndũ ũcio Yahshua ndaconokaga akĩmeta ariũ na aarĩ a Ithe.

Akoiga atĩrĩ, “Nĩ ngoimbũra rĩĩtwa rĩaku kũrĩ ariũ na aarĩ a Baba; nĩ ngainaga nyĩmbo cia gũkũgooca ndĩ kĩũngano-inĩ.”

Ningĩ akoiga atĩrĩ, “Niĩ ngũiga mwĩhoko wakwa harĩ Yahweh.” O na ningĩ akoiga atĩrĩ, “Niĩ ũyũ haha, na ciana iria Yahweh aaheete.”

Kuona atĩ ciana icio irĩ na mwĩrĩ na thakame-rĩ, we o nake aatuĩkire o tao mwĩrĩ-inĩ, nĩgetha na ũndũ wa gĩkuũ gĩake ahote kwananga ũrĩa ũrĩ na hinya wa gĩkuũ, nake nĩwe mũcukani,

na ohore arĩa matũire mohetwo ũkombo-inĩ matukũ mao mothe nĩ ũndũ wa gwĩtigĩra gĩkuũ.

Nĩgũkorwo ti-itherũ ti araika ateithagia, no ateithagia rũciaro rwa Iburahĩmu.

Na nĩ ũndũ ũcio no nginya angĩahaananirio na ariũ na aarĩ a Ithe maũndũ-inĩ mothe, nĩguo atuĩke mũthĩnjĩri-Yahweh ũrĩa mũnene ũiyũrĩtwo nĩ tha na mwĩhokeku agĩtungatĩra Yahweh, na nĩguo arute horohio nĩ ũndũ wa mehia ma kĩrĩndĩ.

Nĩgũkorwo we mwene nĩ athĩnĩkire rĩrĩa aageragio-rĩ, nĩ ahotaga gũteithia andũ arĩa mageragio.