Ahibirania 3

Nĩ ũndũ ũcio, inyuĩ ariũ na aarĩ a Ithe witũ aamũre, o inyuĩ mũgwatanĩire ũhoro wa gwĩtwo kũrĩa kuumĩte na igũrũ, mwĩcũranagiei ũhoro wa Yahshua, o we mũtũmwo na mũthĩnjĩri-Yahweh ũrĩa mũnene ũrĩa tuumbũraga ũhoro wake

We aarĩ mwĩhokeku kũrĩ ũrĩa wamwamũrire, o ta ũrĩa Musa aarĩ mwĩhokeku maũndũ-inĩ mothe ma nyũmba ya Yahweh.

Yahshua nĩ onekanĩte aagĩrĩire kũheo gĩtĩo kĩnene gũkĩra Musa, o ta ũrĩa mwaki wa nyũmba aagĩrĩirwo nĩ gũtĩĩo gũkĩra nyũmba yo nyene

Nĩgũkorwo nyũmba o yothe nĩ ĩrĩ mũndũ ũrĩa wamĩakire, no Yahweh nĩwe mwaki wa indo ciothe.

Nake Musa, aarĩ mwĩhokeku maũndũ-inĩ mothe ma nyũmba ya Yahweh arĩ o ndungata, agakĩrutaga ũira wa maũndũ marĩa makaaheanwo thutha-inĩ.

No Messiya arĩ Mũriũ aarĩ mwĩhokeku na akarũgamĩrĩra nyũmba ya Yahweh. Na ithuĩ tũrĩ nyũmba ĩyo yake, tũngĩikara tũrũmĩtie ũmĩrĩru witũ na kĩĩrĩgĩrĩro kĩrĩa twĩrahagĩra.

Nĩ ũndũ-rĩ, o ta ũrĩa Roho Mwamũre oigaga, atĩrĩ: “Ũmũthĩ, mũngĩigua mũgambo wake,

mũtikomie ngoro cianyu ta hĩndĩ ĩrĩa mwanemeire, andũ makĩngeria marĩ kũu werũ-inĩ,

kũrĩa maithe manyu maangeririe na makĩndoria, na makĩona ciĩko ciakwa, ihinda rĩa mĩaka mĩrongo ĩna.

Nĩkĩo ndaarakarĩire rũciaro rũu, ngĩkiuga atĩrĩ, ‘Ngoro cia andũ aya itururaga hĩndĩ ciothe, na matirĩ maamenya njĩra ciakwa.’

Nĩ ũndũ ũcio ngĩĩhĩta na mwĩhĩtwa ndakarĩte, ngiuga atĩrĩ, ‘Matirĩ hĩndĩ magaatonya kĩhurũko-inĩ gĩakwa.’ ”

Ariũ na aarĩ a Ithe witũ, mwĩmenyererei hatikagĩe o na ũmwe wanyu ũrĩ na ngoro ĩĩhagia na ĩtetĩkagia, ĩrĩa ĩgarũrũkaga, ĩgatigana na Kĩhoti ũrĩa ũrĩ muoyo

No ũmanagĩrĩriai mũndũ na ũrĩa ũngĩ o mũthenya, o rĩrĩa rĩothe mũthenya ũrĩĩtagwo Ũmũthĩ, nĩgetha gũtikagĩe o na ũmwe wanyu ũkũũmio ngoro nĩ ũndũ wa kũhenererio nĩ mehia.

Tondũ ũcio, tũngĩrũmia wega mwĩhoko ũrĩa twarĩ naguo kuuma o kĩambĩrĩria nginya ithirĩro-rĩ, nĩ tũgaatuĩka a kũgwatanĩra hamwe na Messiya.

O ta ũrĩa kwĩrĩtwo, atĩrĩ: “Ũmũthĩ, mũngĩigua mũgambo wake, mũtikomie ngoro cianyu ta hĩndĩ ĩrĩa mwanemeire.”

Nĩ andũ arĩkũ acio maaiguire na makĩmũkararia? Githĩ ti arĩa othe moimĩte Misiri matongoretio nĩ Musa?

Ningĩ-rĩ, nĩ andũ arĩkũ aarakarĩire mĩaka ĩyo mĩrongo ĩna? Githĩ ti arĩa meehirie, na magĩkua, o arĩa ciimba ciao ciagũire kũu werũ-inĩ?

Ningĩ-rĩ, nĩ andũ arĩkũ Yahweh ehĩtire na mwĩhĩtwa atĩ gũtirĩ hĩndĩ magaatonya ũhurũko-inĩ wake, tiga o andũ acio maaregire kũmwathĩkĩra?

Tũgakĩona atĩrĩ, matiahotire gũtonya kuo nĩ ũndũ wa kwaga gwĩtĩkia kwao.