Ahibirania 4

Nĩ ũndũ ũcio-rĩ, kuona atĩ kĩĩranĩro gĩa gũtonya ũhurũko-inĩ wake kĩrĩ o ho-rĩ, nĩ twĩmenyererei gũtikagĩe o na ũmwe wanyu ũtagagĩkinyĩra.

Nĩgũkorwo o na ithuĩ nĩ tũhunjĩirio Ũhoro-ũyũ-Mwega o tao; no ũhoro ũrĩa maaiguire ndũigana kũmaguna, tondũ arĩa maũiguire matiawamũkĩrire na wĩtĩkio.

Na rĩrĩ, ithuĩ arĩa twĩtĩkĩtie nĩ ithuĩ tũtonyaga kĩhurũko-inĩ kĩu, o ta ũrĩa Yahweh oigire atĩrĩ, “Nĩ ũndũ ũcio ngĩĩhĩta na mwĩhĩtwa ndakarĩte, ngiuga atĩrĩ, ‘Matirĩ hĩndĩ magaatonya kĩhurũko-inĩ gĩakwa.’ ” O na gũtuĩka wĩra wake nĩ wathirĩte kuuma o rĩrĩa thĩ yombirwo.

Nĩgũkorwo nĩ harĩ handũ hana aarĩtie ũhoro wa mũthenya wa mũgwanja, akoiga atĩrĩ: “Nake Yahweh akĩhurũka mũthenya wa mũgwanja, agĩtigana na wĩra wake wothe.”

O na ningĩ hau mbere nĩ oigĩte atĩrĩ, “Matirĩ hĩndĩ magaatonya ũhurũko-inĩ wakwa.”

Nĩ tũkuona atĩ nĩ kũrĩ amwe matigaire gũtonya kĩhurũko-inĩ kĩu kĩeranĩirwo, nĩgũkorwo arĩa maahunjĩirio Ũhoro-ũrĩa-Mwega mbere matiatonyire tondũ nĩ magire gwathĩka.

Nĩ ũndũ ũcio, o rĩngĩ Yahweh akĩamũra mũthenya mũna, akĩwĩĩta Ũmũthĩ, thutha wa matukũ maingĩ gũthira rĩrĩa aaririe na kanua ka Daudi, ta ũrĩa oigĩte hau mbere atĩrĩ: “Ũmũthĩ, mũngĩigua mũgambo wake, mũtikomie ngoro cianyu.”

Tondũ korwo Joshua nĩ amaheete ũhurũko-rĩ, Yahweh ndangĩacokire kwaria ũhoro wa mũthenya ũngĩ thutha ũcio

Tondũ ũcio nĩ gũtigaire Thabatũ ya kũhurũka ya andũ a Yahweh;

nĩgũkorwo mũndũ o wothe ũrĩa ũtonyaga kĩhurũko-inĩ kĩa Yahweh o nake nĩ ahurũkaga agatigana na wĩra wake, o ta ũrĩa Yahweh aahurũkire agĩtigana na wĩra wake.

Nĩ ũndũ ũcio, nĩ twĩrutanĩrie na kĩyo gũtonya ũhurũko-inĩ ũcio, nĩgetha gũtikanagĩe mũndũ o na ũrĩkũ ũkaagũa nĩ ũndũ wa kũrũmĩrĩra kĩonereria kĩa ũremi wao.

Nĩgũkorwo ũhoro wa Yahweh ũrĩ muoyo na ũrĩ hinya. Nĩ mũũgĩ gũkĩra rũhiũ rwa njora rũnooretwo mĩena yeerĩ, ũgatheeca ũkagayũkania muoyo na roho, o na ũkagayania marũngo na tombo, na ningĩ ũgatuĩria meciria na matua ma ngoro.

Gũtirĩ kĩndũ o na kĩmwe kĩa iria ciombirwo kĩhithĩtwo kuuma maitho-inĩ ma Yahweh. Indo ciothe nĩ humbũrie na ikaguũrio mbere ya maitho ma ũrĩa tũkaahe ũhoro witũ.

Nĩ ũndũ ũcio, kuona atĩ tũrĩ na mũthĩnjĩri-Yahweh mũnene mũno ũrĩa ũhungurĩte agakinya o igũrũ, na nĩwe Yahshua mũrũ wa Yahweh-rĩ, nĩ tũrũmiei na hinya wĩtĩkio ũrĩa tuumbũraga.

Nĩgũkorwo tũtirĩ na mũthĩnjĩri-Yahweh mũnene ũtangĩhota gũtũiguĩra tha ũhũthũ-inĩ witũ, no nĩ tũrĩ na ũmwe wanagerio ikĩro-inĩ ciothe o ta ithuĩ, no ndaigana kwĩhia.

Hakĩrĩ ũguo-rĩ, nĩ tũkuhĩrĩriei gĩtĩ kĩa Ũnene kĩrĩa kĩa Wega wake tũrĩ na ũũmĩrĩru, nĩgetha tũkaiguĩrwo tha, na tuone Wega wake wa gũtũteithagia hĩndĩ ĩrĩa tũbatarĩte.