Ahibirania 5

Rĩu-rĩ, mũthĩnjĩri-Yahweh ũrĩa mũnene o wothe athuragwo kuuma gatagatĩ ka andũ na agatuwo wa kũmarũgamĩrĩra maũndũ-inĩ marĩa makoniĩ Yahweh, nĩguo arutage maruta na magongona nĩ ũndũ wa kũhoroheria mehia.

Nake nĩ ahotaga gũkirĩrĩria arĩa matarĩ na ũmenyo o na arĩa maturuurĩte, kuona atĩ o nake nĩ arĩ ũhũthũ wake

Ũndũ ũyũ nĩguo ũtũmaga arute magongona ma kũhoroheria mehia make mwene, o ta ũrĩa amarutaga nĩ ũndũ wa mehia ma kĩrĩndĩ.

Gũtirĩ mũndũ wĩheaga gĩtĩo kĩu we mwene; no nginya akorwo etĩtwo nĩ Yahweh, o ta ũrĩa Harũni eetirwo.

Nĩ ũndũ ũcio, o nake Messiya ndaigana kwĩyoera ũgooci wa gũtuĩka mũthĩnjĩri-Yahweh ũrĩa mũnene. No nĩ Yahweh wamwĩrire atĩrĩ, “Wee nĩwe Mũrũ wakwa; ũmũthĩ nĩ ndatuĩka Thoguo.”

Na handũ hangĩ oigĩte atĩrĩ, “Wee ũrĩ mũthĩnjĩri-Yahweh nginya tene, wa irũngo-inĩ rĩa ũthĩnjĩri rĩa Melikisedeki.”

Matukũ-inĩ marĩa Yahshua aatũũraga gũkũ thĩ-rĩ, nĩ ahoyaga na agathaitha Yahweh, agĩkayaga mũno agĩitaga maithori kũrĩ ũcio ũngĩahotire kũmũhonokia kuuma gĩkuũ-inĩ, na nĩ aiguagwo nĩ ũndũ wa kwĩnyihia gwake.

O na gũtuĩka aarĩ mũriũ, nĩ erutire gwathĩka nĩ ũndũ wa ũrĩa aanyarirĩkire,

na aarĩkia gũtuwo mwagĩrĩru kũna, agĩtuĩka kĩhumo kĩa ũhonokio ũrĩa ũtagaathira harĩ arĩa othe mamwathĩkagĩra,

nake Yahweh akĩmũtua mũthĩnjĩri-Yahweh mũnene irũngo-inĩ rĩa ũthĩnjĩri wa Melikisedeki.

Nĩ tũrĩ na maũndũ maingĩ tũngĩmwĩra makoniĩ ũhoro ũyũ, no nĩ hinya kũmũtaarĩria tondũ mũtinyitaga maũndũ narua.

Nĩ ũndũ-rĩ, o na gũtuĩka rĩu mwagĩrĩirwo nĩgũkorwo mũrĩ arutani-rĩ, nĩ mũbatarĩte mũndũ wa kũmũruta maũndũ marĩa mwarutĩtwo kĩambĩrĩria ma kiugo kĩa Yahweh o rĩngĩ. Inyuĩ mũbataire kũheo iria, no ti irio nyũmũ!

Mũndũ o wothe ũnyuaga iria, tondũ no gakenge-rĩ, ndangĩmenya wega ũhoro wa ũrutani wa ũthingu

No irio iria nyũmũ nĩ cia andũ arĩa agima, arĩa nĩ ũndũ wa kũmenyera gũcihũthĩra kaingĩ, nĩ merutĩte gũkũũrana wega na ũũru.