Ahibirania 6

Nĩ ũndũ ũcio nĩ tũtiganei na morutani marĩa ma kĩambĩrĩria ma ũhoro wa Messiya, na tũthiĩ na mbere na gũkũra, na tũtige kwambĩrĩria gwaka mũthingi rĩngĩ wa kũrutana ũhoro wa kwĩrira nĩ ũndũ wa ciĩko iria cierekagĩria mũndũ gĩkuũ-inĩ, na ũrutani wa gwĩtĩkia thĩinĩ wa Yahweh,

na morutani ma ũbatithio, na ma kũigĩrĩrwo moko, o na ma kũriũka kwa arĩa akuũ, o na ma gũtuĩrwo cira wa tene na tene.

Na noguo tũrĩĩkaga, Yahweh angĩĩtĩkĩria.

Na rĩrĩ, nĩ ũndũ ũrĩ hinya mũno kũrĩ andũ arĩa maanathererwo nĩ ũtheri, na magacama kĩheo kĩrĩa kiumĩte igũrũ, na magakorwo matuĩtwo a ngwatanĩro ya Roho Mwamũre,

o acio macamĩte wega wa kiugo kĩa Yahweh na mahinya ma ihinda rĩrĩa rĩgooka,

andũ acio mangĩgũa na matigane na maũndũ macio-rĩ, gũtingĩhoteka kũmacokia rĩngĩ merire, nĩ tondũ nĩ gũcuurithia maracuurithia Mũrũ wa Yahweh mũtĩ igũrũ o rĩngĩ, na makamũnyararithia kũrĩ kĩrĩndĩ.

Mũgũnda ũrĩa uragĩrwo nĩ mbura kaingĩ na ũgacoka ũgaciara maciaro mega ma kũguna arĩa maũrĩmĩire-rĩ, nĩ ũrathimagwo nĩ Yahweh

No mũgũnda ũrĩa ũkũraga mĩigua na mahiũ ma nyeki-inĩ nĩ wa tũhũ, na ũrĩ ũgwati-inĩ wa kwĩrehithĩria kĩrumi. Marigĩrĩrio-inĩ nĩ gũcinwo ũgaacinwo.

Arata akwa nyendete mũno, o na tũkĩaragia ũguo, ha ũhoro wanyu-rĩ, nĩ twĩrĩgĩrĩire maũndũ mega kũrĩ macio, o marĩa marehanaga na ũhonokio.

Tondũ Yahweh ndaagĩte kĩhooto; ndakaariganĩrwo nĩ wĩra wanyu o na wendo ũrĩa muonanĩtie nĩ ũndũ wa rĩĩtwa rĩake rĩrĩa mwateithagia andũ arĩa aamũre, o na rĩu no mũrathiĩ na mbere na kũmateithia.

Tũngĩenda mũndũ o mũndũ wanyu onanie kĩyo o ta kĩu o nginya mũthia, nĩguo mũkaahingĩrio maũndũ marĩa mũtũire mwĩrĩgĩrĩire.

Tũtikwenda mũtuĩke igũta, no tũkwenda mwĩgerekanagie na andũ, arĩa nĩ ũndũ wa gwĩtĩkia na gũkirĩrĩria kwao nĩkuo gũtũmaga magaĩrwo maũndũ marĩa meranĩirwo.

Rĩrĩa Yahweh eerĩire Iburahĩmu kĩĩranĩro gĩake, eehĩtire akĩĩgwetaga we mwene, nĩgũkorwo gũtiarĩ na ũngĩ mũnene kũrĩ we wa kwĩhĩta nake,

akiuga atĩrĩ, “Ti-itherũ nĩ ngũkũrathima na ngũhe njiaro nyingĩ.”

Na nĩ ũndũ ũcio, thutha wa Iburahĩmu gweterera akirĩrĩirie-rĩ, nĩ aheirwo kĩrĩa eerĩirwo.

Tondũ rĩrĩ, andũ mehĩtaga na mũndũ ũrĩa mũnene kũmakĩra, naguo mwĩhĩtwa ũgakindĩra ũrĩa kwĩrĩtwo, na ũgakĩnina ngarari ciothe.

Na tondũ Yahweh nĩ endaga kuonania hatarĩ nganja kũrĩ agai a maũndũ marĩa meranĩirwo atĩ itua rĩake rĩrĩa aatuĩte rĩtingĩgarũrũka-rĩ, nĩ akindĩrire ũhoro ũcio na mwĩhĩtwa

Yahweh eekire ũguo na ũndũ wa maũndũ merĩ matangĩgarũrĩka, o marĩa gũtangĩhoteka Yahweh ahenanie namo, nĩgetha ithuĩ arĩa tuonete handũ ha kũũrĩra twĩgwatĩre kĩĩrĩgĩrĩro kĩrĩa tũheetwo, tũhote kũũmĩrĩria mũno.

Kĩĩrĩgĩrĩro gĩkĩ tũrĩ nakĩo kĩhaana ta nanga ya ngoro, nakĩo nĩ kĩrũmu, na nĩ kĩa ma. Nakĩo gĩtonyaga handũ-harĩa-haamũre thutha wa gĩtama kĩrĩa kĩnene,

o harĩa Yahshua, ũrĩa wathiire mbere iitũ, aatonyire ithenya riitũ. Nake nĩ atuĩkĩte mũthĩnjĩri-Yahweh ũrĩa mũnene o nginya tene, irũngo-inĩ rĩa ũthĩnjĩri wa Melikisedeki.