Ahibirania 7
Rĩu-rĩ, Melikisedeki ũcio, aarĩ mũthamaki wa Salemu na mũthĩnjĩri-Yahweh, o Kĩhoti-Ũrĩa-ũrĩ-Igũrũ-Mũno. Nĩwe watũngire Iburahĩmu akĩinũka aarĩkia kũhoota athamaki, na akĩmũrathima,
nake Iburahĩmu akĩmũhe gĩcunjĩ gĩa ikũmi kĩa indo ciothe. Rĩĩtwa rĩake rĩgĩtaũrwo mbere nĩ kuuga “Mũthamaki wa Ũthingu”; ningĩ “Mũthamaki wa Salemu” nĩ kuuga “mũthamaki wa thayũ”.
Ndaarĩ na ithe kana nyina, kana kĩruka gĩake, na ndaarĩ na kĩambĩrĩria kĩa matukũ kana mũthia wa muoyo wake, nĩ ũndũ ũcio, we ahaana ta Mũrũ wa Yahweh, egũtũũra arĩ mũthĩnjĩri-Yahweh nginya tene.
Ta mwĩcirie ũrĩa aarĩ mũnene: Atĩ o na ithe witũ Iburahĩmu nĩ amũgaĩire gĩcunjĩ gĩa ikũmi kĩa indo iria aatahĩte
Na rĩrĩ, Watho uugĩte atĩ andũ a rũciaro rwa Lawii arĩa matuĩkaga athĩnjĩri-Yahweh metagie gĩcunjĩ gĩa ikũmi kuuma kũrĩ andũ, ũguo nĩ kuuga ariũ a ithe wao, o na gwatuĩka ariũ a ithe wao nĩ a rũciaro rwa Iburahĩmu.
No mũndũ ũcio ndaarĩ wa rũciaro rwa Lawi, no nĩ amũkĩrire gĩcunjĩ gĩa ikũmi kuuma kũrĩ Iburahĩmu, na akĩrathima ũcio werĩirwo ciĩranĩro.
Na hatirĩ nganja atĩ mũndũ ũrĩa mũnini nĩwe ũrathimagwo nĩ ũrĩa mũnene.
Tũgakĩona atĩ, mwena ũmwe gĩcunjĩ kĩu gĩa ikũmi kĩũnganagio nĩ andũ arĩa macokaga gũkua, na nĩo Alawii; naguo mwena ũcio ũngĩ, kĩrutagĩrwo mũndũ ũrĩa uumbũrĩtwo ũhoro wake atĩ atũũraga o muoyo
O na mũndũ no oige atĩ Lawii, ũcio ũrutagĩrwo gĩcunjĩ kĩu gĩa ikũmi, we mwene nĩ arutire gĩcunjĩ kĩu na njĩra ya Iburahĩmu,
tondũ hĩndĩ ĩrĩa Melikisedeki aacemanirie na Iburahĩmu, Lawii aarĩ mũthimo-inĩ wa ithe ũcio wa tene.
Korwo ũkinyanĩru kũna nĩ ũngĩonekanire na njĩra ya ũthĩnjĩri-Yahweh wa Alawii-rĩ, (nĩ ũndũ kĩrĩndĩ kĩaheirwo Watho na njĩra ĩyo), gwakĩrĩ bata ũngĩ ũrĩkũ gũũke mũthĩnjĩri-Yahweh ũngĩ wa irũngo-inĩ rĩa ũthĩnjĩri rĩa Melikisedeki, na ndatuĩke wa irũngo-inĩ rĩa ũthĩnjĩri wa Harũni?
Nĩgũkorwo ũhoro wa ũthĩnjĩri-Yahweh ũngĩgarũrĩrwo-rĩ, o naguo Watho no nginya ũgarũrĩrwo.
Nake mũndũ ũrĩa maũndũ maya maarĩtio nĩ ũndũ wake oimĩte mũhĩrĩga-inĩ ũngĩ, ũrĩa gũtarĩ mũndũ waguo ũrĩ watungatĩra Yahweh kĩgongona-inĩ.
Nĩgũkorwo nĩ kũĩkaine wega atĩ Mwathi witũ oimire mũhĩrĩga-inĩ wa Yahuda, na ha ũhoro wa mũhĩrĩga ũcio-rĩ, Musa ndaigana kuuga ũndũ o na ũrĩkũ ũkoniĩ athĩnjĩri-Yahweh.
Na rĩrĩ, ũhoro ũrĩa twarĩtie no ũmenyeke wega makĩria angĩkorwo mũthĩnjĩri-Yahweh ũngĩ wa irũngo-inĩ rĩa ũthĩnjĩri wa Melikisedeki nĩ onekanĩte,
ũrĩa ũtuĩkĩte mũthĩnjĩri-Yahweh, na ti kũringana na mũtugo wa rũciaro rwake, no nĩ tondũ wa ũhoti wa muoyo ũrĩa ũtathiraga.
Nĩgũkorwo nĩ kuumbũrĩtwo atĩrĩ: “Wee ũrĩ mũthĩnjĩri-Yahweh nginya tene, wa irũngo-inĩ rĩa ũthĩnjĩri wa Melikisedeki.”
Rĩathani rĩa mbere nĩ rĩtiganĩtwo narĩo tondũ rĩtiarĩ na hinya na rĩkaaga uumithio
(nĩgũkorwo Watho ndwarĩ ũndũ watũmire wagĩrĩre kũna), no nĩ tũheetwo kĩĩrĩgĩrĩro kĩega makĩria kĩrĩa gĩtũhotithagia gũkuhĩrĩria Yahweh.
Na ũndũ ũyũ ndwekirwo hatarĩ mwĩhĩtwa! Andũ acio angĩ nĩ matuĩkaga athĩnjĩri-Yahweh hatarĩ mwĩhĩtwa,
no we aatuĩkire mũthĩnjĩri-Yahweh na mwĩhĩtwa, rĩrĩa Yahweh aamwĩrire atĩrĩ: “Yahweh nĩ ehĩtĩte, na ndangĩĩricũkwo, akoiga atĩrĩ: ‘Wee ũrĩ mũthĩnjĩri-Yahweh nginya tene.’ ”
Nĩ ũndũ wa mwĩhĩtwa ũyũ, Yahshua nĩ atuĩkĩte mũrũgamĩrĩri wa kĩrĩkanĩro kĩrĩa kĩega makĩria.
Ningĩ-rĩ, nĩ gũkoretwo na athĩnjĩri-Yahweh aingĩ ta acio hau mbere, nĩgũkorwo nĩ makuaga magakĩgirio gũthiĩ na mbere na ũtungata ũcio
No tondũ Yahshua atũũraga muoyo nginya tene-rĩ, ũthĩnjĩri-Yahweh wake nĩ wa gũtũũra nginya tene.
Nĩ ũndũ ũcio nĩ ahotaga kũhonokia kũna arĩa othe mokaga kũrĩ Yahweh magereire harĩ we, nĩgũkorwo egũtũũra amathaithanagĩrĩra.
Tondũ nĩ kwagĩrĩire tũgĩe na mũthĩnjĩri-Yahweh mũnene ta ũcio, atũhingagĩrie bata witũ, na akorwo arĩ Mwamũre, na atarĩ ũcuke, kana rĩhia, na aamũranĩtio na ehia, o na agatũũgĩrio agakĩrũka igũrũ.
We ndekũbatara kũruta magongona mũthenya o mũthenya ta ũrĩa athĩnjĩri-Yahweh anene acio angĩ meekaga, mbere nĩ ũndũ wa mehia make mwene, na thutha ũcio nĩ ũndũ wa mehia ma kĩrĩndĩ. We nĩ arutire igongona nĩ ũndũ wa mehia mao ihinda o rĩmwe rĩa kũigana hĩndĩ ĩrĩa eerutire we mwene.
Nĩgũkorwo Watho ũtuaga andũ matarĩ hinya athĩnjĩri-Yahweh anene; no mwĩhĩtwa, ũrĩa wokire thutha wa Watho, nĩ waamũrire Mũriũ, ũrĩa ũtuĩkĩte mwagĩrĩru kũna nginya tene.