Ahibirania 13

Thiĩi na mbere gũkorũo na wendo ta wa andũ a nyũmba ĩmwe.

Mũtikariganĩrũo kũnyitanaga ũgeni, nĩ gũkorũo kũgerera gwĩka ũguo amwe nĩ maanyitire araika ũgeni matekũmenya

Ririkanagai arĩa marĩ njera, ta muohetwo hamwe nao, o na arĩa maranyarirũo, tondũ o na inyuĩ mũrĩ thĩinĩ wa mwĩrĩ

Kĩhiko nĩ kĩheagwo gĩtĩo nĩ andũ othe, na ũrĩrĩ wa kĩhiko ũigagwo ũtarĩ na thahu, tondũ Yahweh nĩ agaatuĩra arĩa meingĩragia thĩinĩ wa ngomanio itagĩrĩire, o hamwe na itharia

Mĩario-inĩ yanyu-rĩ, tigagai gũkorwo na ũcumĩkĩri, na mũiganagĩre na indo iria mũrĩ nacio. Nĩ gũkorũo we oigĩte ũũ: “Ndirĩ hĩndĩ ngaagũtiga, na ndirĩ hĩndĩ ngaagũtirika.”

Nĩgetha tũkoragwo na ũmĩrĩru mũnene wa kuuga: “Yahweh nĩwe mũndeithia; ndigwĩtigĩra. Mũndũ-rĩ, angĩnjĩka atĩa hihi?”

Ririkanagai arĩa matongoragia gatagatĩ-inĩ kanyu, o acio mamũrutĩte kiugo kĩa Yahweh, na mwecũrania ũhoro wa moimĩrĩro ma mĩthiĩre yao-rĩ, mwĩgerekanagiei na wĩtĩkio wao.

Yahshua Messiya atũũraga arĩ o we ira na ũmũthĩ, na tene na tene.

Mũtikahĩtithio nĩ morutani ma mĩthemba ngũrani na mageni, nĩ gũkorũo nĩ kaba ngoro yongererũo hinya nĩ ũtugi mũnene handũ ha irio, o icio itagunaga arĩa macithingataga.

Tũrĩ na kĩgongona kĩrĩa arĩa marutaga ũtungata mwamũre hema-inĩ matari etĩkĩrie kũrĩa kuuma harĩ kĩo

Nĩ gũkorũo mĩĩrĩ ya nyamũ iria thakame yacio ĩtwaragwo harĩa hamũre nĩ mũthĩnjĩri-Yahweh ũrĩa mũnene ĩrĩ igongona rĩa mehia ĩcinagĩrũo nja ya kambĩ

Nĩ ũndũ ũcio, Yahshua o nake nĩ aanyamarĩkĩire nja ya kĩhingo gĩa itũũra nĩguo aamũre andũ na thakame yake mwene

Hakĩrĩ ũguo-rĩ, nĩ tũthiĩi harĩ we nja ya kambĩ, tũkirĩrĩirie gũconorithio ta ũrĩa we aaconorithirio,

tondũ gũkũ tũtirĩ na itũũra rĩngĩtũũra, ĩndĩ tũrathingata na kĩyo itũũra rĩrĩa rĩroka.

Kũgerera harĩ we, hingo ciothe nĩ tũrutagĩre Yahweh igongona rĩa kũgooca, ũguo nĩ kuuga, maciaro ma mĩromo itũ ĩrĩa yumbũraga rĩĩtwa rĩake mbere ya andũ

Makĩria ma ũguo, mũtikanariganĩrũo gwĩkaga wega na kũgayagĩra arĩa angĩ kĩrĩa mũrĩ nakĩo, nĩ ũndũ Yahweh nĩ akenagio mũno nĩ magongona ta macio.

Athĩkagĩrai arĩa matongoragia gatagatĩ-inĩ kanyu na mũmenyihagĩrie, nĩ gũkorũo maikaraga meiguĩte nĩ ũndũ wanyu o ta andũ makoorio ũhoro wanyu, nĩguo mekage ũguo makenete no ti magĩcayaga, tondũ ũndũ ũcio no ũkorũo na moimĩrĩro moru harĩ inyuĩ.

Thiĩi na mbere gũtũhoera, nĩ gũkorũo tũrehoka atĩ tũrĩ na thamiri njega, tondũ twendaga gũikara tũrĩ ehokeku maũndũ-inĩ mothe.

No makĩria ndĩramũũria mũhoyage nĩguo njokio kũrĩ inyuĩ o narua.

Rĩu Kĩhoti wa thayũ, ũrĩa wacokirie Mwathi witũ Yahshua, o we mũrĩithi ũrĩa mũnene wa ng’ondu kuuma kũrĩ arĩa akuũ, na thakame ya kĩrĩkanĩro gĩa tene na tene,

aromũhe kĩndũ kĩrĩa gĩothe kĩega nĩguo mwĩkage wendi wake, agĩkaga thĩinĩ witũ maũndũ marĩa mamũkenagia kũgerera Yahshua Messiya, nake arogoocagwo tene na tene. Amein.

Rĩu-rĩ, ndĩramũthaitha ariũ a Ithe witũ atĩ mũthikĩrĩrie mũtegũthethũka kiugo gĩkĩ gĩa kũmwĩkĩra hinya ngoro, nĩ gũkorũo ndamwandĩkĩra marũa makuhĩ

Ngwenda mũmenye atĩ mũrũ wa Ithe witũ Timotheo nĩ ohoretwo. Angĩũka ica ikuhĩ, nĩ tũgaakorũo hamwe nake rĩrĩa tũkoonana na inyuĩ.

Ngeithĩriai arĩa othe matongoragia gatagatĩ-inĩ kanyu o hamwe na arĩa othe aamũre. Nĩ mwageithio nĩ arĩa marĩ Italia.

Ũtugi mũnene ũroikara hamwe na inyuĩ inyuothe.