Ahibirania 12
Nĩ ũndũ ũcio, kuona atĩ nĩ tũrigicĩirio nĩ aira aingĩ ũguo mahaana ta itu inene-rĩ, nĩ twĩyaũrei kĩrĩa gĩothe gĩtũritũhĩire, o na wĩhia ũrĩa ũtũrigicaga mũno, na tũgĩtengʼere ihenya rĩrĩa tũigĩirwo mbere iitũ tũkirĩrĩirie.
Nĩ tũcũthĩrĩrie Yahshua, ũrĩa mwambĩrĩria na mũkinyanĩria wa gwĩtĩkia gwitũ, ũrĩa nĩ ũndũ wa gĩkeno kĩrĩa aigĩirwo mbere yake-rĩ, nĩ omĩrĩirie gũcuurio mũtĩ-inĩ, atekũũria gũconorwo, na rĩu aikarĩte thĩ guoko-inĩ kwa ũrĩo gwa gĩtĩ kĩa ũnene kĩa Yahweh.
Rĩu-rĩ, cũraniai ũhoro wa ũcio wakirĩrĩirie ngarari nyingĩ ũguo kuuma kũrĩ andũ ehia, nĩgetha mũtikananoge kana mũũrwo nĩ hinya ngoro-inĩ.
Inyuĩ mũkĩgiana na mehia-rĩ, mũtirĩ mũrarũa o nginya mũgaita thakame.
Na nĩ mũriganĩirwo nĩ kiugo gĩa kũmũũmĩrĩria kĩrĩa kĩmwaragĩria ta ciana ciake, atĩrĩ: “Mũrũ wakwa, ndũkahũthie irũithia rĩa Yahweh, o na ndũkoorwo nĩ hinya hĩndĩ ĩrĩa egũgũkũũma,
nĩgũkorwo Yahweh nĩ arũithagia arĩa endete, na akaherithia ũrĩa wothe etĩkĩrĩte atuĩke mwana wake.”
Inyuĩ kiragĩrĩriai mathĩna ta marĩ irũithia; nĩgũkorwo Yahweh aramwĩka ũguo ta mũrĩ ciana ciake. Nĩ ũndũ-rĩ, nĩ mwana ũrĩkũ ũtarũithagio nĩ ithe?
Mũngĩkĩaga kũrũithio (na gũtirĩ mũndũ ũtarũithagio), inyuĩ mũkĩrĩ ciana cia mũka wa njĩra-inĩ, no ti ciana ciake
Ningĩ-rĩ, ithuothe twanakorwo na maithe maitũ marĩa maatũciarire na mũciarĩre wa mwĩrĩ, arĩa maatũrũithagia na ithuĩ tũkamatĩa nĩ ũndũ wa ũguo. Tũkĩagĩrĩire kwĩnyihĩria atĩa Ithe wa maroho maitũ nĩguo tũtũũre muoyo!
Maithe maitũ nĩ matũrũithirie gwa kahinda kanini o ta ũrĩa moonaga kwagĩrĩire; no Yahweh atũrũithagia tũteithĩke, nĩguo tũgwatanĩre nake kwamũrwo gwake.
Gũtirĩ irũithia rĩonekaga rĩ rĩega ihinda-inĩ ta rĩu, tiga rĩrĩ rĩa o ruo. No thutha-inĩ-rĩ, nĩ rĩciaraga magetha ma ũthingu na thayũ harĩ andũ arĩa merutaga narĩo.
Nĩ ũndũ ũcio-rĩ, tambũrũkiai moko manyu marĩa macunjurĩte, na maru manyu marĩa maregeru nĩguo magĩe hinya.
“Rũngariai njĩra cia magũrũ manyu,” nĩgetha ũrĩa ũthuaga ndakae kuonja, no nĩ kaba ahonio.
Mwĩrutanĩriei mũno gũikarania na andũ othe na thayũ, na gũtuĩka aamũre; tondũ hatarĩ kwĩyamũrĩra Yahweh-rĩ, gũtirĩ mũndũ ũkona Yahweh.
Menyererai gũtikagĩe mũndũ o na ũmwe wanyu ũkwaga gũkinyĩrwo nĩ Wega wa Yahweh, na mũtigetĩkĩrie ũndũ mũũru ũhaana ta mũri wa mũtĩ mũrũrũ ũkũre thĩinĩ wanyu, ũcoke kũrehe thĩna na ũthahie andũ aingĩ.
Tigĩrĩrai nĩ muona atĩ gũtirĩ o na ũmwe wanyu mũhũri maraya, kana mũndũ ũtetigĩrĩte Yahweh ta Esaũ, ũrĩa wendirie igai rĩa ũrigithathi wake nĩ ũndũ wa irio cia irĩa rĩmwe.
Thutha-inĩ, ta ũrĩa mũũĩ, hĩndĩ ĩrĩa eendire kũgaya kĩrathimo gĩake, nĩ aregirwo. Ndaahotire kuona kamweke ga kwĩrira, o na gwatuĩka nĩ acaririe kĩrathimo kĩu na maithori.
Mũtiũkĩte kĩrĩma-inĩ kĩrĩa kĩngĩhutio, na kĩrĩa kĩraakana mwaki; o kĩu kĩrĩ na nduma, na gĩgathimba, o na kĩrĩ na kĩhuhũkanio;
ningĩ kũrĩa kũrĩ mũgambo wa coro, o na kana mũgambo waragia na ciugo iria arĩa maaciguire maathaithanire matikaheo ũhoro ũngĩ o na ũmwe,
tondũ matingĩomĩrĩirie ũrĩa gwathanĩtwo, atĩrĩ; “O na nyamũ ĩngĩhutia kĩrĩma kĩu, no nginya ĩhũrwo na mahiga ĩkue.”
Handũ hau haarĩ na ũndũ wa kũguoyohia mũno, ũũ atĩ Musa nĩ oigire atĩrĩ, “Nĩ ndĩrainaina mũno nĩ guoya.”
No inyuĩ mũũkĩte Kĩrĩma-inĩ gĩa Zayuni, itũũra inene rĩa Kĩhoti ũrĩa mũtũũra muoyo, na nĩrĩo Yahrushalayim ya Igũrũ. Nĩ mũũkĩte kĩũngano-inĩ gĩa gĩkeno kĩrĩ araika ngiri na ngiri,
kũrĩ Ũngano wa marigithathi, arĩa marĩĩtwa mao maandĩkĩtwo kũrĩa Igũrũ. Mũũkĩte kũrĩ Yahweh, ũrĩa mũtuĩri andũ othe cira, na kũrĩ maroho ma andũ arĩa athingu matuĩkĩte akinyanĩru kũna,
na kũrĩ Yahshua ũrĩa mũiguithania wa kĩrĩkanĩro kĩrĩa kĩerũ, o na kũrĩ thakame ĩrĩa yakũminjaminjanĩrio ĩrĩa yaragia kiugo kĩega gũkĩra thakame ya Habili.
Menyererai mũtikarege ũrĩa ũkwaria. Angĩkorwo matiigana gwĩthara hĩndĩ ĩrĩa maaregire ũrĩa wamakaanagia arĩ gũkũ thĩ-rĩ, githĩ ithuĩ tũtingĩkĩaga o makĩria gwĩthara, tũngĩkĩhutatĩra ũrĩa ũtũkaanagia arĩ igũrũ?
Hĩndĩ ĩyo-rĩ, mũgambo wake nĩ wainainirie thĩ, no rĩu nĩ eranĩire akoiga atĩrĩ, “Ihinda rĩngĩ to thĩ iiki ngainainia, no nĩ ngainainia igũrũ o narĩo.”
Ciugo ici, “ihinda rĩngĩ,” ironania kweherio gwa kĩrĩa kĩngĩenyenyeka, nacio nĩ indo iria ciũmbĩtwo, nĩgetha kĩrĩa gĩtangĩenyenyeka gĩtũũre.
Nĩ ũndũ ũcio tondũ tũraamũkĩra ũthamaki ũtangĩenyenyeka-rĩ, nĩ tũcokiei ngatho na tũhoyage Yahweh na njĩra ĩrĩa yagĩrĩire, tũkĩmũtĩaga na tũkĩmwĩtigagĩra,
nĩgũkorwo “Yahweh witũ nĩ mwaki ũninanaga.”