Ahibirania 11

Rĩu-rĩ, gwĩtĩkia nĩ kũgĩa na ma ya maũndũ marĩa twĩrĩgĩrĩire, na kũmenya na ma atĩ maũndũ marĩa tũtonaga marĩ ho.

Ũndũ ũcio nĩguo watũmire andũ arĩa maarĩ kuo tene magaathĩrĩrio.

Nĩ ũndũ wa gwĩtĩkia-rĩ, nĩ tũmenyaga atĩ thĩ yothe yombirwo na kiugo kĩa Yahweh, na nĩ ũndũ ũcio indo iria cionagwo itiathondekirwo kuuma kũrĩ indo iria cionekanaga.

Nĩ ũndũ wa gwĩtĩkia-rĩ, Habili nĩ arutĩire Yahweh igongona rĩega gũkĩra rĩa Kaini. Na nĩ ũndũ wa gwĩtĩkia nĩ agathĩrĩirio ta mũndũ mũthingu rĩrĩa Yahweh aaheanire ũira mwega nĩ gwĩtĩkĩra maruta make. Na nĩ ũndũ wa gwĩtĩkia o na rĩu no aaragia o na gũtuĩka nĩ akuire.

Na ũndũ wa gwĩtĩkia-rĩ, Enoku nĩ eheririo mũtũũrĩre-inĩ ũyũ, nĩguo ndagacame gĩkuũ; na ndacokire kuonwo tondũ Yahweh nĩ amweheririe. Nĩgũkorwo ataneherio, nĩ agathĩrĩirio atĩ aarĩ mũndũ wakenagia Yahweh.

Na rĩrĩ, gũtarĩ na wĩtĩkio gũtingĩhoteka gũkenia Yahweh, tondũ mũndũ ũrĩa wothe ũũkaga harĩ we no nginya etĩkie atĩ nĩ kũrĩ Yahweh, na atĩ nĩwe ũheaga arĩa othe mamũcaragia na kĩyo iheo ciao.

Nĩ ũndũ wa gwĩtĩkia-rĩ, hĩndĩ ĩrĩa Nuhu aamenyithirio ũhoro wa maũndũ marĩa matoonekete-rĩ, nĩ aakire thabina arĩ na wĩtigĩri wa ngoro nĩguo ahonokie andũ a nyũmba yake. Nĩ ũndũ wa gwĩtĩkia gwake nĩ atuĩrĩire thĩ cira, na agĩtuĩka mũgai wa ũthingu ũrĩa uumanaga na gwĩtĩkia.

Nĩ ũndũ wa gwĩtĩkia-rĩ, Iburahĩmu rĩrĩa eetirwo athiĩ bũrũri ũrĩa aaheagwo ũtuĩke igai rĩake, nĩ athĩkire na agĩthiĩ, o na akorwo ndaamenyaga kũrĩa aathiaga.

Nĩ ũndũ wa gwĩtĩkia-rĩ, agĩtuĩka mũtũũri bũrũri-inĩ wa kĩĩranĩro ahaana ta mũgeni bũrũri-inĩ wene; aatũũraga hema-inĩ, o ũndũ ũmwe na Isaaka na Jakubu, arĩa maarĩ agai a kĩĩranĩro kĩu hamwe nake.

Nĩgũkorwo nĩ atanyaga kuona itũũra rĩrĩ na mĩthingi mĩrũmu, rĩrĩa mũthondeki na mwaki warĩo nĩ Yahweh.

Nĩ ũndũ wa gwĩtĩkia-rĩ, Iburahĩmu, o na gũtuĩka nĩ atindĩkĩte matukũ, nake Sara aarĩ thata, nĩ ahotithirio gũtuĩka ithe wa mwana tondũ nĩ atuĩte atĩ Ũrĩa weranĩire kĩĩranĩro kĩu aarĩ mwĩhokeku.

Na nĩ ũndũ ũcio kuuma harĩ mũndũ ũyũ ũmwe, o na arĩ ta mũndũ mũkuũ-rĩ, gũgĩciarwo njiaro nyingĩ o ta njata cia igũrũ, o na ta mũthanga ũrĩa ũtangĩtarĩka ũrĩ hũgũrũrũ-inĩ cia iria.

Andũ aya othe maatũũrire marũmĩtie wĩtĩkio nginya rĩrĩa maakuire. Matiigana kũhingĩrio maũndũ marĩa meerĩirwo; no nĩ mamonaga marĩ o kũraya na makamakenera. Nao nĩ moimbũraga atĩ o nĩ ageni na agendi gũkũ thĩ.

Andũ arĩa moigaga maũndũ ta macio monanagia atĩ nĩ gwetha methaga bũrũri ũrĩa ũrĩ wao kĩũmbe

Korwo nĩ meciragia ũhoro wa bũrũri ũrĩa moimĩte-rĩ, nĩ mangĩagĩte na mweke wa gũcoka kuo.

Handũ ha ũguo, o meriragĩria bũrũri mwega kũrĩ ũcio, naguo nĩ bũrũri wa igũrũ. Nĩ ũndũ ũcio Yahweh ndaconokaga gwĩtwo Kĩhoti wao, nĩgũkorwo nĩ ahaarĩirie itũũra inene nĩ ũndũ wao.

Nĩ ũndũ wa gwĩtĩkia-rĩ, Iburahĩmu, rĩrĩa aageririo nĩ Yahweh, nĩ arutire Isaaka atuĩke igongona. Ũcio werĩirwo ciĩranĩro nĩ ehaarĩirie kũruta mũrũ wake wa mũmwe igongona,

o na gũtuĩka Yahweh nĩ amwĩrĩte atĩrĩ, “Rũciaro rũrĩa rũgeetanio nawe rũkoima harĩ Isaaka.”

Iburahĩmu nĩ atuĩte na ngoro atĩ Yahweh no ariũkie mũndũ mũkuũ, na nĩ ũndũ ũcio no kwĩrwo na ngerekano atĩ nĩ acokeirio Isaaka ta oimĩte kũrĩ arĩa akuũ.

Na ũndũ wa gwĩtĩkia-rĩ, Isaaka nĩ arathimire Jakubu na Esaũ akĩratha ũhoro wa matukũ mao ma thutha.

Nĩ ũndũ wa gwĩtĩkia-rĩ, Jakubu, rĩrĩa aarĩ hakuhĩ gũkua, nĩ arathimire ariũ a Jusufu, o mũndũ riita rĩake, na akĩhoya Yahweh enyitĩrĩire mũthĩgi wake.

Nĩ ũndũ wa gwĩtĩkia-rĩ, Jusufu, nake, ihinda rĩake rĩa mũthia rĩakuhĩrĩria, nĩ aririe ũhoro wa gũthaama kwa andũ a Isiraeli kuuma bũrũri wa Misiri, na agĩathana ũhoro ũkoniĩ mahĩndĩ make.

Nĩ ũndũ wa gwĩtĩkia-rĩ, aciari a Musa nĩ mamũhithire ihinda rĩa mĩeri ĩtatũ kuuma aaciarwo tondũ nĩ monire aarĩ mwana mwega, na matietigĩrire watho wa mũthamaki.

Nĩ ũndũ wa gwĩtĩkia-rĩ, Musa rĩrĩa aatuĩkire mũndũ mũgima nĩ aregire gwĩtwo mũrũ wa mwarĩ wa Firaũni.

Nĩ athurire kũnyariranĩrio hamwe na andũ a Yahweh, handũ ha gwĩkenia na mĩago ya wĩhia ya ihinda inini.

We nĩ atuire atĩ kũmenwo nĩ ũndũ wa Messiya nĩ uumithio mũnene gũkĩra ũtonga wa Misiri, nĩ tondũ nĩ acũthagĩrĩria gũkaaheo kĩheo.

Nĩ ũndũ wa gwĩtĩkia-rĩ, nĩ oimire Misiri ategwĩtigĩra marakara ma mũthamaki; nĩ akirĩrĩirie tondũ nĩ oonire Ũrĩa ũtonekaga.

Nĩ ũndũ wa gwĩtĩkia-rĩ, nĩ arũmirie gĩathĩ kĩa Bathaka na ũhoro wa kũminjaminjanĩrio gwa thakame, nĩguo mwanangi wa marigithathi ndakae kũhutia marigithathi ma andũ a Isiraeli.

Nĩ ũndũ wa gwĩtĩkia-rĩ, andũ nĩ matuĩkanĩirie Iria Itune ta arĩ thĩ nyũmũ maagereire; no rĩrĩa andũ a Misiri maageririe gwĩka ũguo, makĩrindanio nĩ maĩ.

Nĩ ũndũ wa gwĩtĩkia-rĩ, thingo cia Jeriko nĩ ciagũire andũ maarĩkia gũcithiũrũrũka matukũ mũgwanja.

Nĩ ũndũ wa gwĩtĩkia-rĩ, mũmaraya ũrĩa wetagwo Rahabu, tondũ wa kũnyita athigani ũgeni, ndoraganĩirio na andũ arĩa maarĩ aremi.

Ingiuga atĩa ũngĩ? Ndirĩ na ihinda rĩa kũheana ũhoro wa Gideoni, na wa Baraka, na wa Samusoni, na wa Jefitha, na wa Daudi, na wa Samũeli, o na wa anabii,

acio othe nĩ ũndũ wa gwĩtĩkia-rĩ, nĩ matoririe mothamaki, na magĩĩka maũndũ ma ũthingu na makĩĩgwatĩra kĩrĩa kĩeranĩirwo; nao makĩhinga mĩrũthi tũnua,

na makĩhoria mwaki warĩrĩmbũkaga, na makĩhonokio matikaninwo na rũhiũ rwa njora; ũhinyaru wao wagarũrirwo ũgĩtuĩka hinya; ningĩ maarũire na ũcamba mbaara-inĩ na magĩtoria mbũtũ cia ita cia ndũrĩrĩ ingĩ.

Nao andũ-a-nja makĩriũkĩrio andũ ao arĩa maakuĩte, magĩcoka muoyo. Andũ angĩ nao nĩ maregire kũrekererio, makĩnyarirwo nĩgetha makaariũkio magĩe na muoyo mwega makĩria.

Andũ angĩ nĩ manyũrũririo na makĩhũrwo na iboko, o na angĩ makĩohwo na mĩnyororo na magĩikio njera.

Nĩ mahũrirwo na mahiga; o na magĩatũranio na thoo maita merĩ; ningĩ makĩũragwo na hiũ cia njora. Maathiaga mehumbĩte njũa cia ngʼondu na cia mbũri, na marĩ ngĩa, na makanyarirwo, o na magekagwo ũũru;

thĩ ndĩamaagĩrĩire. Morũraga werũ-inĩ na irĩma-inĩ, o na ngurunga-inĩ na miungu-inĩ ya thĩ.

Andũ aya othe nĩ magathĩrĩirio nĩ ũndũ wa wĩtĩkio wao, no gũtirĩ o na ũmwe wao wahingĩirio kĩĩranĩro kĩrĩa kĩeranĩirwo.

Yahweh nĩ atũhaarĩrĩirie ũndũ mwega makĩria nĩgetha andũ acio matigatuwo aagĩrĩru ithuĩ tũtarĩ hamwe nao.