Ahibirania 10
Rĩu-rĩ, Watho no kĩĩruru kĩa maũndũ mega marĩa magoka, no ti mũhianĩre wa maũndũ marĩa mo mene. Nĩ ũndũ ũcio Watho ndũngĩhota gũtũma magongona marĩa marutagwo o mwaka o mwaka mategũtigithĩrio matũme andũ arĩa mokaga kũhoya Yahweh maagĩrĩre kũna
Tondũ korwo nĩ kwahotekire-rĩ, githĩ magongona macio matingĩagĩtigire kũrutwo? Nĩgũkorwo andũ nĩ mangĩamũrĩtwo o rĩmwe rĩa kũigana, na matingĩacokire gwĩcukĩra mehia mao.
No rĩrĩ, magongona macio maarĩ ma kũririkanania mehia mwaka o mwaka,
tondũ gũtingĩhoteka thakame ya ndegwa na ya mbũri yeherie mehia.
Nĩ ũndũ ũcio, hĩndĩ ĩrĩa Messiya ookire gũkũ thĩ, oigire atĩrĩ: “Wee ti magongona na maruta weriragĩria, no nĩ mwĩrĩ wahaarĩrĩirie;
ndwakenirio nĩ maruta ma njino, o na kana maruta ma kũhoroheria mehia.
Hĩndĩ ĩyo ngiuga atĩrĩ, ‘Niĩ ũyũ haha, o ta ũrĩa ũhoro wakwa wandĩkĩtwo ibuku-inĩ rĩa gĩkũnjo, atĩrĩ: Njũkĩte gwĩka wendi waku, Wee Yahweh.’ ”
Mbere oigire atĩrĩ, “Magongona na maruta, na maruta ma njino, o na maruta ma kũhoroherio mehia, ti mo weriragĩria, o na kana ũgakenio nĩmo” (o na gũtuĩka Watho nĩ waathanĩte marutagwo)
Ningĩ akiuga atĩrĩ, “Niĩ ũyũ haha, njũkĩte gwĩka wendi waku.” Eeheragia ũhoro wa mbere nĩguo ahande ũcio wa kerĩ.
Na nĩ ũndũ wa kwenda kũu-rĩ, nĩ tũtuĩtwo aamũre nĩ ũndũ wa igongona rĩa mwĩrĩ wa Yahshua Messiya rĩrĩa aarutire ihinda rĩmwe rĩa kũigana.
Mũthenya o mũthenya mũthĩnjĩri-Yahweh o wothe arũgamaga na akaruta mawĩra make makoniĩ kĩrĩra kĩa Yahweh, agakĩruta magongona o ro macio kaingĩ kaingĩ, no nĩ magongona matangĩhota kweheria mehia
No rĩrĩ, mũthĩnjĩri Yahweh ũyũ aarĩkia kũruta igongona rĩmwe rĩa kũigana rĩa kweheria mehia, nĩ aikarire thĩ guoko-inĩ kwa ũrĩo kwa Yahweh.
Kuuma hĩndĩ ĩyo nĩ atũũraga etereire o nginya rĩrĩa thũ ciake igaatuwo gaturwa ka makinya make,
nĩ tondũ na ũndũ wa igongona rĩu rĩmwe, nĩ atũmĩte arĩa maratuwo aamũre maagĩrĩre kũna nginya tene.
O nake Roho Mwamũre nĩ atumbũragĩra ũhoro ũyũ. O mbere akoiga atĩrĩ:
“Gĩkĩ nĩkĩo kĩrĩkanĩro kĩrĩa ngaarĩkanĩra nao thutha wa matukũ macio, ũguo nĩguo Yahweh ekuuga. Nĩ ngekĩra mawatho makwa ngoro-inĩ ciao, na ndĩmaandĩke meciria-inĩ mao.”
Ningĩ agacoka akoiga atĩrĩ: “Ndigacoka kũririkana mehia mao na ciĩko ciao cia ũremi o rĩ o rĩ.”
Na rĩrĩ, mehia marĩkia kũrekanĩrwo-rĩ, gũtingĩcoka kũrutwo igongona rĩngĩ rĩa kweheria mehia.
Nĩ ũndũ ũcio, ariũ na aarĩ a Ithe witũ, kuona atĩ tũrĩ na mwĩhoko wa gũtonya Handũ-harĩa-Haamũre-Mũno, na ũndũ wa thakame ya Yahshua,
tondũ nĩ atũhingũrĩire njĩra njerũ na ĩrĩ muoyo ya kũhĩtũkĩra gĩtambaya-inĩ, nakĩo nĩkĩo mwĩrĩ wake,
na kuona atĩ nĩ tũrĩ na mũthĩnjĩri-Yahweh mũnene mũno ũrĩa ũrũgamĩrĩire nyũmba ya Kĩhoti-rĩ,
nĩ tũkuhĩrĩrie Yahweh tũrĩ na ngoro itarĩ na ũhinga, na tũiyũrĩtwo nĩ wĩtĩkio kũna, nacio ngoro ciitũ iminjaminjĩirio nĩguo tũtherio thamiri ciitũ ciage ũcuke nayo mĩĩrĩ iitũ ĩthambĩtio na maĩ makembu.
Ningĩ nĩ tũrũmiei ũhoro wa kĩĩrĩgĩrĩro kĩrĩa tuumbũraga tũtegũthangania, nĩgũkorwo ũrĩa wĩranĩire kĩĩranĩro kĩu nĩ mwĩhokeku.
Hamwe na ũguo, nĩ twĩcũũranie ũrĩa tũngĩarahũrana o mũndũ na ũrĩa ũngĩ ũhoro-inĩ wa kwendana na gwĩka ciĩko njega.
Na ningĩ tũtigatige kũũnganaga hamwe, ta ũrĩa andũ amwe mamenyerete gwĩkaga, no nĩ tũmanagĩrĩriei mũndũ na ũrĩa ũngĩ, na makĩria mũno tondũ wa ũrĩa mũkuona atĩ Mũthenya ũcio nĩ ũrakuhĩrĩria.
Tondũ tũngĩthiĩ na mbere na kwĩhia na ũtũrĩka thutha wa kũmenya ũhoro-ũrĩa-wa-ma-rĩ, gũtirĩ na igongona rĩngĩ rĩa kweheria mehia rĩtigaire,
tiga o gweterera tũrĩ na guoya cira o na mwaki ũrĩrĩmbũkaga ũrĩa ũkaanina thũ cia Yahweh
Mũndũ ũrĩa wothe wareganaga na Watho wa Musa ooragagwo atekũiguĩrwo tha na ũndũ wa ũira wa andũ erĩ kana atatũ.
Mũgwĩciria mũndũ aagĩrĩirwo nĩ kũherithio mũno makĩria atĩa, ũrĩa ũrangĩrĩirie Mũrũ wa Yahweh thĩ, na agatua atĩ thakame ya kĩrĩkanĩro ĩrĩa aamũrĩtwo nayo ti nyamũre, na agacoka akaruma Roho ũrĩa ũheanaga wega wa Yahweh?
Nĩgũkorwo nĩ tũũĩ ũrĩa woigire atĩrĩ, “Kũrĩhanĩria nĩ gwakwa, na nĩ niĩ ngaarĩhanĩria,” na ningĩ akiuga atĩrĩ, “Yahweh nĩwe ũgaatuĩra andũ ake cira.”
Nĩ ũndũ wa kũguoyohia mũno mũndũ gũkumbatwo nĩ Kĩhoti ũrĩa ũrĩ muoyo.
Ririkanai matukũ ma tene thutha wanyu kwarĩrwo nĩ ũtheri, ũrĩa mweyũmĩrĩirie mbaara nene rĩrĩa mwanyariragwo.
Mahinda mamwe mwathĩnagio mbere ya kĩrĩndĩ mũkĩrumagwo; na mahinda mangĩ nĩ mwanyitanagĩra na arĩa meekagwo ũguo
Ningĩ nĩ mwaiguagĩra arĩa mohetwo njera tha, na mũgetĩkagĩra gũtunywo indo cianyu mũkenete, tondũ nĩ mwamenyete atĩ inyuĩ mwarĩ na ũtonga ũngĩ mwega makĩria na wa gũtũũra.
Nĩ ũndũ ũcio, mũtigate ũũmĩrĩru ũcio wanyu; nĩgũkorwo nĩ ũkamũrehere uumithio mũnene.
Mwagĩrĩirwo nĩ gũkirĩrĩria, nĩguo mwarĩkia gwĩka ũrĩa Yahweh endaga, mũkaamũkĩra kĩrĩa eeranĩire.
Nĩgũkorwo kahinda kanini gaathira-rĩ, “Ũrĩa ũroka nĩ egũka, na ndegũtĩĩra.
No mũndũ wakwa ũrĩa mũthingu agaatũũra muoyo nĩ ũndũ wa gwĩtĩkia. Na angĩgacoka na thutha, ngoro yakwa ndĩgakenio nĩwe.”
No ithuĩ tũtirĩ a thiritũ ya arĩa macokaga na thutha makora, no tũrĩ a thiritũ ya arĩa metĩkagia, makahonokio.