Ahibirania 9

Rĩu-rĩ, kĩrĩkanĩro kĩrĩa kĩa mbere nĩ kĩarĩ na mawatho maakoniĩ ũhoro wa kũhoya Yahweh, o na ningĩ nĩ kwarĩ na handũ-harĩa-haamũre gũkũ thĩ.

Nĩ kwarĩ na hema yathondeketwo, na kanyũmba kayo ka mbere nĩ haarĩ na mũtĩ ũrĩa wa gũcuuria matawa, na metha, na mĩgate ĩrĩa mĩamũre; hau nĩho heetagwo “Handũ-harĩa-Haamũre”

Thutha wa gĩtama gĩa kerĩ haarĩ na kanyũmba geetagwo, “Handũ-harĩa-Haamũre-Mũno,”

na hau nĩho haarĩ kĩgongona gĩa thahabu gĩa gũcinĩrwo ũbumba, na nĩho haarĩ ithandũkũ rĩa kĩrĩkanĩro rĩrĩa rĩahumbĩrĩtwo na thahabu kũndũ guothe. Thĩinĩ wa ithandũkũ rĩu nĩ haarĩ na nyũngũ ya thahabu yarĩ na mana, na rũthanju rwa Harũni rũrĩa rwathundũkĩte, na ihengere cia mahiga iria ciandĩkĩtwo.

Igũrũ wa ithandũkũ rĩu nĩ haarĩ na akerubi a Riri, mahumbĩrĩte gĩtĩ-gĩa-tha. No tũtingĩhota gũtaarĩria wega rĩu ũhoro wa kĩndũ o kĩndũ.

Nacio indo ciothe ciarĩkia kũbangwo ũguo-rĩ, athĩnjĩri-Yahweh nao maatonyaga kanyũmba kau ka mbere hĩndĩ ciothe nĩguo marute wĩra wao wa ũtungata.

No rĩrĩ, mũthĩnjĩri-Yahweh ũrĩa mũnene nowe wiki watonyaga kanyũmba karĩa ga thĩinĩ, na aatonyaga o ihinda o rĩmwe mwaka, na ndangĩatonyire atakuuĩte thakame ya kũruta igongona nĩ ũndũ wake mwene na nĩ ũndũ wa mehia ma andũ marĩa meekĩte matekũmenya.

Ũndũ ũyũ nĩguo Roho Mwamũre oonanagia naguo atĩ njĩra ya gũtonya Handũ-harĩa-Haamũre-Mũno ndĩakoretwo ĩguũranĩirio ihinda rĩrĩa rĩothe hema ya mbere yarĩ ho.

Gĩkĩ gĩkĩrĩ o kĩonereria kĩa matukũ maya tũrĩ, atĩ maruta na magongona marĩa maarutagwo matingĩahotire gũtheria thamiri ya mũndũ ũrĩa mũhoi Yahweh.

Maũndũ macio makoniĩ o ũhoro wa kũrĩa na kũnyua, na magongona ma mĩthemba mĩingĩ ya gwĩtheria na mawatho ma na igũrũ tu, marĩa maathanĩtwo mekagwo nginya ihinda rĩrĩa maũndũ makeerũhio rĩgaakinya.

Rĩrĩa Messiya ookire arĩ mũthĩnjĩri-Yahweh ũrĩa mũnene wa maũndũ mega marĩa marĩ kuo-rĩ, atungataga hema-inĩ ĩrĩa nene na nginyanĩru ĩrĩa ĩtathondeketwo na moko ma andũ, naguo ũguo nĩ kuuga ti ya mũmbĩre wa thĩ ĩno.

Ndaatonyire na ũndũ wa thakame ya mbũri na njaũ; nowe aatonyire Handũ-harĩa-Haamũre-Mũno riita o rĩmwe rĩa kũigana na ũndũ wa thakame yake we mwene, arĩkĩtie gũkũũra andũ na ũkũũri ũrĩa ũtagathira.

Thakame ya mbũri na ndegwa, na mũhu wa moori ĩcinĩtwo, ciaminjaminjĩrio arĩa marĩ na thahu, nĩ ciamaamũraga na ikanina thahu mĩĩrĩ yao.

Githĩ thakame ya Messiya, ũrĩa werutire arĩ igongona rĩtarĩ kaũgũ harĩ Yahweh nĩ ũndũ wa Roho wa tene na tene, ndĩngĩgĩkĩamũra thamiri ciitũ makĩria nĩguo itigane na ciĩko iria cierekagĩria mũndũ gĩkuũ-inĩ, nĩguo tũtungatagĩre Kĩhoti ũrĩa ũtũũraga muoyo!

Nĩ ũndũ ũcio-rĩ, Messiya nĩwe mũiguithania wa kĩrĩkanĩro kĩerũ, nĩguo arĩa metĩtwo mahote kũgaĩrwo igai rĩrĩa rĩĩranĩirwo rĩtagaathira, kuona atĩ rĩu nĩ akuĩte arĩ mũkũũri wa kũmakũũra kuuma mehia-inĩ marĩa meekĩtwo kĩrĩkanĩro-inĩ kĩrĩa kĩa mbere.

Tondũ ha ũhoro ũkoniĩ kwĩgaya-rĩ, nĩ kwagĩrĩire kũmenyeke wega atĩ ũcio wĩgaĩte nĩ akuĩte,

nĩ ũndũ kwĩgaya kũgĩaga na hinya rĩrĩa mũndũ ũrĩa wĩgaĩte aarĩkia gũkua; kwĩgaya gũtirĩ hinya rĩrĩa rĩothe ũrĩa wĩgaĩte arĩ muoyo.

Ũguo noguo o nakĩo kĩrĩkanĩro kĩa mbere gĩtingĩagĩire na hinya hatarĩ thakame.

Hĩndĩ ĩrĩa Musa aarĩkirie kũhe andũ othe maathani mothe marĩa maandĩkĩtwo watho-inĩ-rĩ, nĩ oire thakame ya njaũ, o hamwe na maĩ, na guoya mũtune, na mathĩgĩ ma mũthobi akĩminjaminjĩria ibuku rĩa gĩkũnjo o na andũ othe.

Akĩmera atĩrĩ, “Ĩno nĩyo thakame ya kĩrĩkanĩro, kĩrĩa Yahweh amwathĩte mwathĩkagĩre.”

Ningĩ o ũndũ ũmwe, akĩminjaminjĩria Hema-ya-Gũtũnganwo thakame o hamwe na indo iria ciothe ciahũthagĩrwo gũtungatĩra Yahweh nacio.

Na ti-itherũ, kũringana na Watho hakuhĩ indo ciothe ciamũragwo na thakame, na hatarĩ gũitwo gwa thakame-rĩ, gũtirĩ kũrekerwo kwa mehia.

Nĩ ũndũ ũcio, nĩ kwagĩrĩire mĩhianĩre ya indo iria irĩ igũrũ ciamũragwo na magongona macio, no indo cia igũrũ cio nyene ciamũragwo na magongona mega kũrĩ macio.

Nĩgũkorwo Messiya ndaatonyire handũ-harĩa-haamũre haakĩtwo na moko ma andũ hahaanaine na handũ harĩa ha ma; nowe aatonyire igũrũ kuo kwene, kũrĩa rĩu arũgamĩte mbere ya Yahweh nĩ ũndũ witũ

O na ndaatonyire igũrũ nĩguo erutage igongona kaingĩ kaingĩ ta ũrĩa mũthĩnjĩri-Yahweh mũnene aatonyaga Handũ-harĩa-Haamũre-Mũno o mwaka arĩ na thakame ĩtarĩ yake mwene.

Kũngĩrĩ ũguo-rĩ, Messiya angĩtũũraga anyariragwo kuuma rĩrĩa thĩ yombirwo. No rĩu, matukũ-inĩ maya ma kũrigĩrĩria, nĩ aguũranĩirio riita rĩmwe rĩa kũigana nĩguo eherie wĩhia na ũndũ wa kwĩruta atuĩke igongona we mwene.

Na o ta ũrĩa gũtuĩtwo atĩ andũ makuage o riita rĩmwe, na thutha wa ũguo magatuĩrwo cira-rĩ,

ũguo no taguo Messiya aarutirwo igongona riita o rĩmwe nĩguo eherie mehia ma andũ aingĩ; nake nĩ akaguũranĩrio riita rĩa kerĩ, no tigetha akuue mehia, no nĩgetha arehere arĩa mamwetagĩrĩra ũhonokio.