Akolosai 4

Inyuĩ aathani, ĩkagĩrai ngombo cianyu maũndũ na njĩra ya ũthingu na ya kĩhooto, mũkĩmenyaga atĩ o na inyuĩ nĩ mũrĩ na Mwathi kũrĩa igũrũ.

Thiagai na mbere kũhoya, na mũikarage mwĩiguĩte ũhoro-inĩ ũcio mũgĩcokagia ngatho.

Ningĩ-rĩ, tũhoyagĩrei o na ithuĩ, nĩgetha Yahweh ahingũre mũrango nĩ ũndũ wa kiugo nĩguo tũhunjie ũhoro wa hitho ĩrĩa nyamũre ĩgiĩ Messiya, o ĩrĩa ĩtũmĩte njohwo,

na atĩ hunjie ũhoro wayo na njĩra njega o ta ũrĩa njagĩrĩirũo.

Thiagai na mĩthiĩre ya ũũgĩ kwerekera arĩa matetĩkĩtie, mũkĩhũthagĩra mahinda manyu wega biũ

Rekei ciugo cianyu ikoragwo irĩ cia ũtugi hingo ciothe, ikagĩaga na mũcamo mwega, nĩgetha mũmenyage ũrĩa mwagĩrĩirũo gũcokeria o mũndũ.

Mũrũ wa Ithe witũ Tikiko, ũrĩa nyendete na ũtungataga arĩ mwĩhokeku, o we tũtungataga nake thĩinĩ wa Yahweh nĩ ekũmũhe ũhoro wakwa wothe

Ndĩramũtũma kũrĩ inyuĩ nĩguo mũmenye ũrĩa ithuĩ tũtariĩ na nĩguo omĩrĩrie ngoro cianyu

Nĩ megũka na Onesimo, mũrũ wa Ithe witũ mwĩhokeku o we nyendete na uumĩte gatagatĩ-inĩ kanyu; nĩ mekũmwĩra maũndũ mothe marĩa marekĩka gũkũ.

Nĩ mwageithio nĩ Aristariko ũrĩa tuohetwo hamwe nake, o na Mariko ũrĩa mũihwa wa Bar-Naba (ũrĩa mwerirũo atĩ angĩgooka kũrĩ inyuĩ mũkaamũnyita ũgeni),

na Yeshua ũrĩa wĩtagwo Jusito, o acio a itari rĩa arĩa maruĩte. Acio oiki nĩo arutithania wĩra hamwe na niĩ nĩ ũndũ wa Ũthamaki wa Yahweh, na nĩ makoretwo makĩnyũmĩrĩria mũno

Nĩ mwageithio nĩ Epafara, o we ngombo ya Messiya Yahshua yumĩte gatagatĩ-inĩ kanyu. Hingo ciothe nĩ erutanagĩria nĩ ũndũ wanyu mahoya-inĩ make, nĩguo marigĩrĩrio-inĩ mũgaakorũo mwĩhandĩte biũ na mũkorũo na ũũma mũrũmu harĩ wendi wothe wa Yahweh

Tondũ niĩ ndĩ mũira atĩ nĩ erutanagĩria mũno nĩ ũndũ wanyu na nĩ ũndũ wa arĩa marĩ Laodikia na Hierapoli.

Nĩ mwageithio nĩ Luka ũrĩa ndagĩtarĩ, o ũcio twendete, Dema o nake nĩ amũgeithia

Ngeithĩriai ariũ a Ithe witũ a Laodikia na mũgeithie Numifa na kĩũngano kĩrĩa gĩcemanagia gwake mũciĩ

Na rĩrĩa mũgaakorũo mũthomeirũo marũa maya, bangai mathomerũo kĩũngano kĩa Alaodikia na inyuĩ mũthome marũa ma kuuma Laodikia

Ningĩ mwĩre Arikipo ũũ: “Menyagĩrĩra ũtungata ũrĩa wetĩkĩrire thĩinĩ wa Messiya, nĩguo ũũhingie.”

Ici nĩ ngeithi ciakwa niĩ Saũlũ, ndamwandĩkĩra na guoko gwakwa mwene. Ririkanagai cioho ciakwa. Ũtugi mũnene ũroikara hamwe na inyuĩ.