Akolosai 3

Na rĩrĩ, kuona atĩ rĩu nĩ mũriũkĩtio hamwe na Messiya-rĩ, ngoro cianyu nĩ ikĩrũmbũyagie maũndũ marĩa ma igũrũ, o kũrĩa Messiya aikarĩte guoko-inĩ kwa ũrĩo kwa Yahweh.

Meciria manyu nĩ meciragie maũndũ marĩa ma igũrũ, no ti maũndũ marĩa ma thĩ ĩno.

Nĩgũkorwo nĩ mwakuire, naguo muoyo wanyu rĩu nĩ mũhithe hamwe na Messiya thĩinĩ wa Yahweh.

Na rĩrĩa Messiya, ũrĩa arĩ we muoyo witũ, akoonekana-rĩ, hĩndĩ ĩyo o na inyuĩ nĩ mũkonekana hamwe nake mũrĩ na riri.

Nĩ ũndũ ũcio-rĩ, tuagai maũndũ mothe ma mwĩrĩ ũyũ wa ndũire ta makuĩte namo nĩ ta: ũhũũri-maraya, na meciria mathũku, na thuti cia mwĩrĩ, na merirĩria moru, na ũkoroku, naguo no ũndũ ũmwe na kũhoya mĩhianano.

Tondũ wa maũndũ macio, mangʼũrĩ ma Yahweh nĩ maroka,

na inyuĩ mwatũire mũthiaga na mĩthiĩre ĩyo mũtũũrĩre-inĩ ũrĩa mwatũũraga mbere ĩyo.

No rĩu no nginya mwĩaũre maũndũ maya mothe, namo nĩ, marakara, na mangʼũrĩ, na rũmena, na kũruma Yahweh, na kwaria maũndũ ma thoni na kanua.

Tigagai kũhenania mũndũ na ũrĩa ũngĩ, kuona atĩ nĩ mwĩyaũrĩte mũndũ ũrĩa wa tene na ciĩko ciake,

na mũkehumba mũndũ ũngĩ mwerũ, ũrĩa werũhagio nginya agĩe na ũmenyo na agĩe na mũhianĩre wa ũrĩa wamũũmbire.

Na ũhoro-inĩ ũcio hatirĩ Mũyunani kana Mũyahudi, mũndũ mũruu kana mũndũ ũtarĩ mũruu, kana mũndũ mũcenji, kana Mũsikuthi, kana mũndũ ngombo kana ũtarĩ ngombo, no Messiya nĩwe maũndũ mothe, na arĩ thĩinĩ wa maũndũ mothe.

Nĩ ũndũ ũcio-rĩ, tondũ mũrĩ andũ athure nĩ Yahweh, andũ aamũre na mendetwo mũno nĩwe, mwĩhumbei ũiguanĩri wa tha, na gũtugana, na kwĩnyihia, na kũhorera na gũkirĩrĩria.

Kiranagĩrĩriai mũndũ na ũrĩa ũngĩ, na mũrekanagĩre rĩrĩa mũndũ angĩkorwo ekĩtwo ũũru nĩ ũrĩa ũngĩ. Rekanagĩrai o ta ũrĩa Messiya aamũrekeire inyuĩ.

Ningĩ gũkĩra maũndũ macio mothe mega-rĩ, gĩai na wendani, tondũ nĩguo wohanagia maũndũ mothe hamwe nĩguo maagĩrĩre kũna.

Rekei thayũ wa Messiya wathanage ngoro-inĩ cianyu, tondũ inyuĩ mũrĩ ta ciĩga cia mwĩrĩ ũmwe-rĩ, mwetĩirwo thayũ. Na ningĩ mũcokagie ngatho.

Rekei ũhoro wa Messiya ũtũũrage ũingĩhĩte mũno thĩinĩ wanyu, mũkĩrutanaga na mũgĩtaaranaga mũndũ na ũrĩa ũngĩ mũrĩ na ũũgĩ mũingĩ, o mũkĩinaga thaburi, na nyĩmbo cia Yahweh, o na nyĩmbo cia kĩĩroho, mũrĩ na ngatho harĩ Yahweh ngoro-inĩ cianyu.

Na ũndũ ũrĩa wothe mũrĩĩkaga, mũkĩaria kana mũgĩĩka ũndũ, wĩkagei wothe rĩĩtwa-inĩ rĩa Mwathi Yahshua, mũgĩcokagĩria Yahweh Ithe witũ ngatho thĩinĩ wake.

Inyuĩ atumia-rĩ, mwĩnyihagĩriei athuri anyu, o ta ũrĩa kwagĩrĩire thĩinĩ wa Messiya.

Na inyuĩ athuri-rĩ, endagai atumia anyu na mũtikamakũũmage.

O na inyuĩ ciana-rĩ, athĩkagĩrai aciari anyu maũndũ-inĩ mothe, nĩgũkorwo gwĩka ũguo nĩ gũkenagia Yahweh.

Na inyuĩ maithe-rĩ, mũtikarakaragie ciana cianyu, itikae gũkua ngoro.

Na inyuĩ ngombo-rĩ, athĩkagĩrai aathani anyu a gũkũ thĩ maũndũ-inĩ mothe, na to hĩndĩ ĩrĩa maramuona atĩ nĩgetha mamwende, no maathĩkagĩrei mũrĩ na ngoro itarĩ na ũhinga na nĩ ũndũ wa gũtĩa Yahweh.

Na rĩrĩ, ũndũ o wothe ũrĩa mũrĩĩkaga, wĩkagei na ngoro yanyu yothe, ta arĩ Yahweh mũrarutĩra wĩra, no ti andũ,

mũkĩmenyaga atĩ nĩ mũkaamũkĩra igai kuuma kũrĩ Yahweh rĩrĩ kĩheo kĩanyu. Nĩ Messiya Yahshua mũtungatagĩra.

Mũndũ o wothe ũrĩa wĩkaga ũũru nĩ akarĩhwo kũringana na ũũru wake, na gũtirĩ gũtĩĩra mũndũ maũthĩ.