Akorinitho wa Keerĩ 1

Nĩ niĩ Saũlũ, mũtũmwo wa Messiya Yahshua nĩ ũndũ wa kwenda kwa Yahweh, tũrĩ na Timotheo mũrũ wa Ithe witũ, Twatũma marũa maya kũrĩ Ũngano wa Yahweh ũrĩa ũrĩ Korinitho, o hamwe na andũ othe aamũre arĩa marĩ Akaia guothe:

Wega na thayũ kuuma kũrĩ Yahweh Ithe witũ o na Mwathi Yahshua Messiya iroikara na inyuĩ.

Yahweh na Ithe wa Mwathi witũ Yahshua Messiya arorathimwo, o we Ithe witũ wa tha, na Kĩhoti mwene ũhoro wothe wa kũũmanĩrĩria,

ũrĩa ũtũũmagĩrĩria mathĩna-inĩ maitũ mothe, nĩguo na ithuĩ tũhotage kũhoreragia arĩa marĩ na thĩna o wothe na ũndũ wa kũũmĩrĩrio kũrĩa ithuĩ ene tũũmĩrĩirio nakuo nĩ Yahweh.

Nĩgũkorwo o ta ũrĩa kũnyarirwo kwa Messiya kũingĩhĩte thĩinĩ witũ-rĩ, ũguo noguo kũũmanĩrĩria gwitũ kũingĩhĩte nĩ ũndũ wa Messiya.

Tũngĩthĩnio-rĩ, tũthĩnagio nĩguo mũũmĩrĩrio na mũhonokio; tũngĩũmĩrĩrio-rĩ, tũũmagĩrĩrio nĩguo na inyuĩ mũgĩe na ũũmĩrĩru, ũrĩa ũciaraga gũkirĩrĩria mũkĩnyarirwo na mathĩna o ta marĩa tũthĩnagio namo.

Nakĩo kĩĩrĩgĩrĩro kĩrĩa tũrĩ nakĩo nĩ ũndũ wanyu nĩ kĩrũmu, tondũ nĩ tũũĩ atĩ o ta ũrĩa mũgwatanagĩra na ithuĩ maũndũ-inĩ marĩa tũnyariragwo namo-rĩ, no taguo mũgwatanagĩra na ithuĩ ũhoro-inĩ wa kũũmanĩrĩria o naguo.

Ariũ na aarĩ a Ithe witũ, tũtikwenda mũkorwo mũtoĩ mathĩna marĩa twarĩ namo bũrũri wa Asia. Twarĩ hatĩka-inĩ nene mũno makĩria ma ũrĩa tũngĩahotire gũkirĩrĩria, nginya ha ũhoro witũ wa gũtũũra muoyo tũkĩyũũmĩra tha.

Ti-itherũ, ngoro-inĩ ciitũ twaiguaga tũtuĩrĩirwo gũkua. No kwahanĩkire ũguo nĩguo tũtikae kwĩĩhoka ithuĩ ene, no twĩhoke Yahweh, ũrĩa ũriũkagia arĩa akuũ.

Nĩwe watũhonokirie ũgwati-inĩ ũcio wahaanaga wa gĩkuũ, na nowe ũgaatũhonokia. We nĩwe twĩrĩgĩrĩire atĩ no egũthiĩ na mbere gũtũhonokia,

inyuĩ na inyuĩ mũgĩtũteithagia na gũtũhoera. Nao andũ aingĩ nĩ marĩcokagia ngatho nĩ ũndũ witũ, tondũ wa wega ũcio tũtugĩtwo naguo arĩ macokio ma mahoya ma andũ aingĩ.

Na rĩrĩ, ũndũ ũyũ nĩguo twĩrahagĩra: Thamiri ciitũ nĩcio itũmenyithagia atĩ mĩthiĩre iitũ ĩrĩa tũikaraga nayo gũkũ thĩ, na makĩria ũrĩa tũikaranagia na inyuĩ, nĩ ya wĩnyihia na ya ũhoro wa ma kuuma kũrĩ Yahweh. Tũtiĩkaga ũguo kũringana na ũũgĩ wa thĩ, no nĩ kũringana na wega wa Yahweh.

Nĩgũkorwo tũtiramwandĩkĩra ũndũ o na ũrĩkũ mũtangĩhota gũthoma kana gũtaũkĩrwo nĩguo. Na ngwĩhoka atĩ,

o ta ũrĩa mũtũmenyete hanini, nĩ mũrĩtaũkĩrwo biũ atĩ no mũhote kwĩraha nĩ ũndũ witũ, o ta ũrĩa tũkeraha nĩ ũndũ wanyu mũthenya ũrĩa wa Mwathi Yahshua.

Na tondũ wa ũrĩa ndaarĩ na mwĩhoko wa ũndũ ũcio-rĩ, nĩ ndabangĩte njũke kwanyu mbere nĩguo mũgunĩke maita merĩ

Ndabangĩte ndĩmũceerere ngĩthiĩ Makedonia, na njokere kũu kwanyu ngiuma Makedonia, na inyuĩ nĩguo mũcoke mũndũme Yahuda.

Hĩndĩ ĩrĩa ndaabangaga ũndũ ũcio-rĩ, kaĩ ndekaga ũguo na itherũ? Kana hihi haaragĩria mĩbango yakwa na njĩra ya kĩ-mwĩrĩ nĩguo rĩmwe njugage, “Ĩĩ, ĩĩ,” na rĩrĩa rĩngĩ ngoiga “Aca, aca”?

No ti-itherũ, o ta ũrĩa Yahweh arĩ mwĩhokeku-rĩ, ndũmĩrĩri iitũ kũrĩ inyuĩ ti “Ĩĩ” na rĩngĩ “Aca.”

Nĩgũkorwo Mũrũ wa Yahweh, Yahshua Messiya, ũrĩa mwahunjĩirio ũhoro wake nĩ niĩ, na Sila, na Timotheo, ũhoro wake ndwarĩ wa kuuga, “Ĩĩ” ũgacoka ũkoiga “Aca,” no thĩinĩ wake gũtũũraga o “Ĩĩ.”

Nĩgũkorwo ciĩranĩro cia Yahweh, o na cingĩhĩte atĩa-rĩ, ciothe nĩ “Ĩĩ” thĩinĩ wa Messiya. Na nĩ ũndũ ũcio thĩinĩ wake, ithuĩ tũkoigaga “Amein” nĩgetha Yahweh atĩithagio.

Na rĩrĩ, Yahweh nĩwe ũtũmaga ithuĩ hamwe na inyuĩ twĩhande wega thĩinĩ wa Messiya. Nĩwe watũitĩrĩirie maguta,

na agĩtũhũra mũhũri wa kuonania atĩ tũrĩ ake, na agĩtũhe Roho wake thĩinĩ wa ngoro ciitũ arĩ ta mwĩhoko wa kũrũgamĩrĩra maũndũ marĩa magoka.

Yahweh nĩwe mũira wakwa, na nĩ oĩ atĩ niĩ ndaagire gũcoka Korinitho nĩ ũndũ wa kũmũcaĩra.

Ũguo ti kuuga atĩ nĩ tũramwatha ũhoro-inĩ wa wĩtĩkio wanyu, no nĩ atĩ tũrutithanagia wĩra na inyuĩ nĩgetha mũkenage, tondũ mũtũũrĩte mwĩhandĩte wega nĩ ũndũ wa wĩtĩkio wanyu.