Akorinitho wa Keerĩ 2

Nĩ ũndũ ũcio nĩ gũtua ndatuire itua atĩ ndikũmũceerera rĩngĩ ndĩmũiguithie kĩeha.

Tondũ-rĩ, ingĩkĩmũiguithia kĩeha-rĩ, nũ ũngĩgĩtigara wa kũngenia, o tiga inyuĩ arĩa njiguithĩtie kĩeha?

Ndamwandĩkĩire ũguo nĩgetha rĩrĩa ngoka ndikanaiguithio kĩeha nĩ acio njagĩrĩirwo nĩ gũkenio nĩo. Nĩ ndaarĩ na ũũmĩrĩru harĩ inyuĩ inyuothe atĩ nĩ mũngĩagwatanĩire na niĩ gĩkeno-inĩ gĩakwa, nakĩo gĩtuĩke kĩanyu.

Nĩgũkorwo ndamwandĩkĩire ndĩ mũthĩnĩku mũno, na ndĩ na ruo rwa ngoro na maithori maingĩ, ti atĩ nĩguo ndĩmũiguithie kĩeha, no nĩguo ndĩmũmenyithie wendo ũrĩa ndĩmwendete naguo.

Angĩkorwo nĩ kũrĩ mũndũ ũiguithĩtie amwe anyu kĩeha-rĩ, ti niĩ aiguithĩtie, no nĩ inyuothe aiguithĩtie kĩeha. Ndiroiga ũguo ngĩhatĩrĩria ũrĩa wĩkĩte ũguo.

Iherithia rĩrĩa aherithĩtio nĩ andũ arĩa aingĩ anyu, nĩ rĩmũiganĩte.

Rĩu inyuĩ-rĩ, nĩ mwagĩrĩirwo nĩ kũmũrekera na kũmũũmĩrĩria, nĩguo ndakae gũtorio nĩ kĩeha gĩkĩrĩte.

Nĩ ũndũ ũcio, ndamũthaitha mũmuonie atĩ no mũmwendete.

Gĩtũmi kĩrĩa gĩatũmire ndĩmwandĩkĩre marũa macio nĩ ndĩmũgerie, na menye kana no mwĩtiirie magerio na mwathĩkage maũndũ-inĩ mothe.

Mũndũ ũrĩa mũngĩrekera, o na niĩ nĩ ndamũrekera. Naguo ũndũ ũrĩa ndekanĩire-rĩ (hangĩkorwo nĩ haarĩ ũndũ o na ũrĩkũ wa kũrekanĩra), ũndũ ũcio ndaũrekanĩra nĩ ũndũ wanyu ndĩ mbere ya Messiya,

nĩguo Shaitani ndakae gũtũhoota. Nĩgũkorwo tũtirigĩtwo nĩ mawara make.

Na rĩrĩ, rĩrĩa ndaathire Teroa kũhunjia Ũhoro-ũrĩa-Mwega wa Messiya, na ngĩkora Yahweh ahingũrĩte mũrango-rĩ,

ndiigana kũgĩa na thayũ ngoro-inĩ yakwa, tondũ ndiakorire mũrũ-wa-Ithe witũ Tito kuo. Nĩ ũndũ ũcio ngiugĩra andũ akuo ũhoro, ngĩcoka ngĩthiĩ nginya Makedonia.

No rĩrĩ, Yahweh arocokererwo nĩ ngatho, o we ũrĩa ũtũtongoragia hĩndĩ ciothe na ũhootani thĩinĩ wa Messiya, nake agatũhũthagĩra ta tũrĩ mũtararĩko mwega wa kũmemerekia ũhoro wa kũmenya Messiya kũndũ guothe.

Tondũ ithuĩ tũrĩ mũtararĩko mwega wa Messiya ũrĩa ũkinyaga harĩ Yahweh, kũrĩ arĩa marahonokio o na arĩa maroora.

Kũrĩ arĩa maroora-rĩ, tũrĩ kĩheera kĩũru gĩa gĩkuũ; no kũrĩ arĩa marahonokio-rĩ, tũrĩ mũtararĩko mwega wa muoyo. Nũ ũngĩhota wĩra ta ũcio?

Ithuĩ tũtiĩkaga ta ũrĩa andũ aingĩ mekaga; tũtionjorithagia kiugo kĩa Yahweh nĩguo tuone uumithio. Handũ ha gwĩka ũguo-rĩ, ithuĩ twaragia tũrĩ na ngoro njega thĩinĩ wa Messiya mbere ya Yahweh, ta andũ matũmĩtwo nĩ Yahweh.