Akorinitho wa Keerĩ 3
Anga nĩ tũraambĩrĩria gũcoka kwĩgathĩrĩria? Kana hihi nĩ tũbataire kũheo marũa ma gũtũgathĩrĩria kũrĩ inyuĩ kana moimĩte kũrĩ inyuĩ ta andũ arĩa angĩ?
Inyuĩ ene nĩ inyuĩ marũa maitũ, maandĩkĩtwo ngoro-inĩ ciitũ, mamenyekete na magathomagwo nĩ andũ othe.
Inyuĩ nĩ muonanagia atĩ mũrĩ marũa moimĩte kũrĩ Messiya, inyuĩ mũrĩ maciaro ma ũtungata witũ, marũa mataandĩkĩtwo na rangi, no maandĩkĩtwo na Roho wa Kĩhoti ũrĩa ũrĩ muoyo. Matiandĩkĩtwo ihengere-inĩ cia mahiga, no maandĩkĩtwo ihengere-inĩ cia ngoro cia andũ.
Ũcio nĩguo ũũmĩrĩru witũ harĩ Yahweh nĩ ũndũ wa Messiya.
Na ti atĩ tũrĩ na ũhoti ithuĩ ene tũngĩĩgathĩra, no ũhoti witũ uumaga kũrĩ Yahweh.
Nĩwe ũtũhotithĩtie tũtuĩke ndungata cia kĩrĩkanĩro kĩrĩa kĩerũ, nakĩo ti kĩa ũhoro ũrĩa mwandĩke, no nĩ kĩa Roho; nĩgũkorwo ũhoro ũrĩa mwandĩke nĩ kũũraga ũragaga, no Roho aheanaga muoyo.
Na rĩrĩ, angĩkorwo ũtungata ũrĩa wa tene, ũrĩa wandĩkĩtwo na ndemwa ihengere-inĩ cia mahiga, wokire ũrĩ na riri, o nginya andũ a Isiraeli makĩremwo nĩ gũikara marorete ũthiũ wa Musa tondũ wa ũrĩa warĩ na riri, o na gũtuĩka riri ũcio nĩ wathiraga-rĩ,
githĩ ũtungata wa Roho to ũgĩkorwo ũkĩrĩ na riri makĩria?
Angĩkorwo ũtungata ũrĩa ũtuaga andũ ehia nĩ ũrĩ riri-rĩ, githĩ ũtungata ũrĩa ũrehaga ũthingu ndũngĩgĩkorwo ũrĩ na riri makĩria!
Nĩgũkorwo ũhoro ũrĩa warĩ na riri mbere, rĩu ndũrĩ na riri ũkĩringithanio na riri ũcio ũngĩ ũũkĩrĩte.
Na angĩkorwo ũhoro ũcio wathiraga wokire na riri-rĩ, ũcio ũngĩ wa gũtũũra ndũngĩgĩkorwo na riri makĩria!
Nĩ ũndũ ũcio-rĩ, twaragia ũhoro tũũmĩrĩirie mũno, nĩ ũndũ wa kĩĩrĩgĩrĩro kĩu.
Ithuĩ tũtitariĩ ta Musa, ũrĩa wehumbagĩra ũthiũ na gĩtambaya nĩguo agirĩrĩrie andũ a Isiraeli gũcũthĩrĩria ũthiũ wake rĩrĩa ũkengi ũcio wathiraga.
No rĩrĩ, meciria mao nĩ maritirio, nĩgũkorwo nginya ũmũthĩ gĩtambaya o kĩu gĩkoragwo o ho hĩndĩ ĩrĩa kĩrĩkanĩro kĩu gĩkũrũ kĩao gĩgũthomwo. Gĩtambaya kĩu gĩtirĩ kĩeherio, tondũ kĩeheragio nĩ ũndũ wa gwĩtĩkia Messiya.
O na nginya ũmũthĩ rĩrĩa Watho wa Musa ũgũthomwo-rĩ, gĩtambaya kĩu no kĩhumbagĩra ngoro ciao.
No rĩrĩa rĩothe mũndũ o na ũ agarũrũkĩra Yahweh-rĩ, gĩtambaya kĩu nĩ kĩeheragio
Na rĩrĩ, Yahweh nĩwe Roho, na harĩa Roho wa Yahweh arĩ, hau nĩ harĩ na wĩyathi.
Na ithuĩ ithuothe arĩa tũtahumbĩrĩte mothiũ maitũ, nĩ tũhenahenagia riri wa Yahweh ta tũrĩ icicio, na nĩ tũgarũragwo nĩguo tũhaanane nake tũrĩ na riri wa gũtũũra ũrĩa ũthiaga o ũkĩongererekaga, o uumĩte kũrĩ Yahweh, ũrĩa arĩ we Roho.