Akorinitho wa Keerĩ 4
Tondũ ũcio, kuona atĩ nĩ tũrĩ na ũtungata ũcio nĩ ũndũ wa tha cia Yahweh-rĩ, tũtiũragwo nĩ hinya.
No ithuĩ nĩ tũreganĩte na mĩthiĩre ya hitho na ya thoni; ithuĩ tũtithiaga na mĩthiĩre ya wara na tũtitukanagia kiugo kĩa Yahweh na maheni. Handũ ha ũguo-rĩ, nĩ ũhoro wa ma tũheanaga hatarĩ ũndũ tũkuongerera, na tũrĩ mbere ya Yahweh, nĩ tũgeragia gũtũma thamiri cia o mũndũ itwĩtĩkĩre.
O na angĩkorwo ũhoro witũ ũrĩa tũhunjagia nĩ mũhumbĩre-rĩ, ũhumbĩrĩtwo kũrĩ arĩa maroora.
Nayo Elohim ya mahinda maya, nĩ ĩtũmĩte meciria ma andũ arĩa matetĩkĩtie matumane, nĩgetha matigathererwo nĩ ũtheri wa Ũhoro-ũrĩa-Mwega wa riri wa Messiya, o we ũrĩa arĩ we mũhaanĩre wa Yahweh.
Nĩgũkorwo ti ũhoro witũ ithuĩ ene tũhunjagia, no tũhunjagia Yahshua Messiya arĩ we Mwathi, na ithuĩ tũrĩ ndungata cianyu nĩ ũndũ wa Yahshua.
Tondũ Kĩhoti ũrĩa woigire, “Ũtheri nĩ ware nduma-inĩ,” nĩwe watũmire ũtheri wake ware ngoro-inĩ ciitũ nĩguo tũheo ũtheri wa kũmenyithagia andũ riri wa Yahweh ũcio wonekaga ũthiũ-inĩ wa Messiya.
No rĩrĩ, ithuĩ tũkuuĩte kĩgĩna kĩu tũhaana ta tũrĩ na nyũngũ cia rĩũmba nĩgetha kũmenyeke atĩ ũhoti ũyũ mũnene uumĩte kũrĩ Yahweh no nduumaga kũrĩ ithuĩ.
Ithuĩ tũhatĩkĩtwo mũno na mĩena yothe, no tũtihehenjetwo; nĩ tũrigĩtwo nĩ wa gwĩka, no tũtikuĩte ngoro;
na nĩ tũnyarirĩtwo, no tũtitiganĩirio; nĩ tũrũndĩtwo, no tũtininĩtwo
Hĩndĩ ciothe tũkoragwo tũkuuĩte gĩkuũ kĩa Yahshua na mĩĩrĩ iitũ, nĩguo muoyo wa Yahshua o naguo ũguũranagĩrio thĩinĩ wa mĩĩrĩ iitũ.
Nĩgũkorwo ithuĩ arĩa tũrĩ muoyo tũtũire tũneanagwo gĩkuũ-inĩ nĩ ũndũ wa Yahshua, nĩgetha muoyo wake ũguũranagĩrio thĩinĩ wa mĩĩrĩ ĩno iitũ ĩkuaga
Nĩ ũndũ wa ũguo-rĩ, gĩkuũ kĩrutaga wĩra thĩinĩ witũ, no muoyo ũkaruta wĩra thĩinĩ wanyu.
Nĩ kwandĩkĩtwo atĩrĩ: “Tondũ nĩ ndetĩkirie; nĩkĩo ndaaririe.” Nĩ ũndũ wa roho o ro ũcio wa wĩtĩkio-rĩ, o na ithuĩ nĩ twĩtĩkĩtie na nĩ ũndũ ũcio tũkaaria,
tondũ nĩ tũũĩ atĩ ũrĩa wariũkirie Mwathi Yahshua kuuma kũrĩ arĩa akuũ, o na ithuĩ nĩ agatũriũkia hamwe na Yahshua, na atũrũgamie mbere yake hamwe na inyuĩ.
Maũndũ maya mothe nĩ ma kũmũguna, nĩgetha wega ũrĩa ũrakinyĩrĩra andũ aingĩ makĩria ũtũme ngatho ciyũrĩrĩre nĩgetha Yahweh akumagio.
Tondũ ũcio tũtiũragwo nĩ hinya. O na gũtuĩka mwena wa nja nĩ tũrathirĩrĩkĩra, no mũndũ wa thĩinĩ nĩ kwerũhio erũhagio o mũthenya.
Nĩgũkorwo mathĩna maitũ mahũthũ na ma ihinda inini maratũma tũreherwo riri ũmakĩrĩte wa tene na tene.
Nĩ ũndũ ũcio, tũticũthagĩrĩria kĩrĩa kĩroneka, no tũcũthagĩrĩria kĩrĩa gĩtonekaga. Nĩgũkorwo kĩrĩa kĩonekaga nĩ gĩa kahinda, no kĩrĩa gĩtonekaga nĩ gĩa gũtũũra tene na tene.