Akorinitho wa Keerĩ 5

Na rĩrĩ, nĩ tũũĩ atĩ hema ĩno ya gũkũ thĩ, ĩno tũtũũraga thĩinĩ wayo, ĩngĩtharũrio-rĩ, nĩ tũrĩ na nyũmba ĩngĩ yumĩte kũrĩ Yahweh, nyũmba ĩtaakĩtwo na moko ma andũ, ya gũtũũra tene na tene ĩrĩ kũu igũrũ.

Rĩu nĩ tũcayaga, tũkĩĩriragĩria kũhumbwo na nyũmba ĩyo ĩngĩ iitũ ya kuuma igũrũ,

tondũ twahumbwo ũguo tũtigakorwo tũrĩ njaga.

Nĩgũkorwo rĩrĩa rĩothe tũrĩ thĩinĩ wa hema ĩno-rĩ, nĩ tũcayaga na tũkaritũhĩrwo, tondũ tũtiendaga kwaũrwo, no twendaga tũhumbwo na mwĩrĩ ũcio witũ wa kuuma igũrũ, nĩgetha mwĩrĩ ũyũ wa gũkua ũmerio nĩ muoyo.

Na rĩrĩ, Yahweh nĩwe ũtũmbĩte nĩ ũndũ wa gĩtũmi kĩu kĩũmbe, na nĩ atũheete Roho arĩ ta mwĩhoko wa kũrũgamĩrĩra maũndũ marĩa magoka.

Tondũ ũcio tũikaraga hĩndĩ ciothe tũrĩ na ũũmĩrĩru, tũkĩmenyaga atĩ rĩrĩa rĩothe tũikaraga thĩinĩ wa mwĩrĩ ta arĩ guo mũciĩ witũ, tũikaraga tũraihanĩrĩirie na Yahweh.

Tũtũũragio nĩ ũndũ wa gwĩtĩkia, no tũtitũũragio nĩ ũndũ wa kuona na maitho.

Nguuga atĩrĩ, nĩ tũrĩ na ũũmĩrĩru atĩ ũndũ ũrĩa tũngĩenda nĩ tũkorwo tũtarĩ mwĩrĩ-inĩ ũyũ, no tũkorwo tũrĩ hamwe na Yahweh.

Nĩ ũndũ ũcio, nĩ tũgeragia na kĩyo muoroto witũ ũtuĩke wa kũmũkenia, twakorwo tũrĩ mwĩrĩ-inĩ ũyũ witũ o na kana twakorwo tuumĩte thĩinĩ waguo.

Nĩgũkorwo no nginya ithuothe tũkaarũgama mbere ya gĩtĩ gĩa cira kĩa Messiya, nĩguo o mũndũ akaaheo kĩrĩa kĩmwagĩrĩire kũringana na maũndũ marĩa aaneka arĩ thĩinĩ wa mwĩrĩ, marĩ mega kana marĩ moru.

Kuona atĩ nĩ tũmenyete ũrĩa Yahweh aagĩrĩirwo nĩ gwĩtigĩrwo-rĩ, nĩkĩo tũgeragia kũringĩrĩria andũ. Ũrĩa tũtariĩ nĩ ũndũ ũĩkaine wega nĩ Yahweh, na nĩ ngwĩhoka atĩ o na nĩ ũĩkaine wega ngoro-inĩ cianyu.

Ti kũgeria tũrageria kwĩgathĩrĩria harĩ inyuĩ rĩngĩ, no nĩ mweke tũramũhe wa kwĩraha nĩ ũndũ witũ, nĩguo mũhotage gũcokeria arĩa merahaga na maũndũ marĩa monagwo na maitho gũkĩra marĩa marĩ ngoro-inĩ.

Tũngĩkorwo nĩ kũgũrũka tũgũrũkĩte-rĩ, tũgũrũkĩte nĩ ũndũ wa Yahweh; na tũngĩkorwo meciria maitũ nĩ mega-rĩ, tũhaana ũguo nĩ ũndũ wanyu.

Nĩgũkorwo wendo wa Messiya nĩguo ũtũringagĩrĩria, tondũ nĩ tũmenyete wega atĩ mũndũ ũmwe nĩwe wakuire nĩ ũndũ wa andũ othe, na nĩ ũndũ ũcio-rĩ, andũ othe nĩ makuire

Nake aakuire nĩ ũndũ wa andũ othe, nĩgetha arĩa matũũraga muoyo matigacoke gũtũũra muoyo nĩ ũndũ wao ene, no matũũre nĩ ũndũ wa ũcio wakuire nĩ ũndũ wao na agĩcoka akĩriũka.

Nĩ ũndũ ũcio, kuuma rĩu tũtigũcoka gũtua ũhoro wa mũndũ na njĩra ya kĩ-mwĩrĩ. O na gwatuĩka kũrĩ hĩndĩ tuonaga Messiya na njĩra ĩyo-rĩ, rĩu tũtiĩkaga ũguo.

Nĩ ũndũ ũcio, mũndũ o wothe angĩkorwo arĩ thĩinĩ wa Messiya-rĩ, nĩ atuĩkĩte kĩũmbe kĩerũ; maũndũ ma tene nĩ mathirĩte, nĩ mokĩte mangĩ merũ!

Maũndũ maya mothe moimaga kũrĩ Yahweh, ũrĩa watũiguithanirie nake we mwene thĩinĩ wa Messiya, na agĩtũhe ũtungata ũcio wa ũiguithanio:

atĩrĩ, Yahweh arĩ thĩinĩ wa Messiya nĩwe wĩĩiguithanagĩria thĩ kũrĩ we mwene, ategũtarĩra andũ mehia mao. Nake nĩ atwĩhokeire ndũmĩrĩri ĩyo ya ũiguithanio.

Nĩ ũndũ ũcio ithuĩ tũrĩ abarũthi matũmĩtwo a kwarĩrĩria Messiya, o ta arĩ Yahweh ũrathaithana na tũnua twitũ. Twamũthaitha handũ-inĩ ha Messiya atĩrĩ: Ĩtĩkĩrai kũiguithanio na Yahweh.

Yahweh nĩ atũmire ũcio ũtaarĩ na wĩhia atuĩke mwĩhia nĩ ũndũ witũ, nĩgetha thĩinĩ wake tũtuĩke ũthingu wa Yahweh.