Akorinitho wa Keerĩ 6

Tondũ tũrĩ aruti a wĩra hamwe na Yahweh-rĩ, nĩ tũkũmũringĩrĩria mũtikae kwamũkĩra wega wa Yahweh o ũguo tũhũ.

Nĩgũkorwo ekuuga atĩrĩ, “Hĩndĩ ya gwĩtĩkĩrĩka-rĩ, nĩ ndagũthikĩrĩirie, naguo mũthenya wa kũhonokanio-rĩ, nĩ ndagũteithirie.” Ta kĩonee-i! rĩrĩ nĩrĩo ihinda rĩa gwĩtĩkĩrĩka nĩ Yahweh, naguo ũyũ nĩguo mũthenya wa kũhonokanio.

Ithuĩ-rĩ, tũtitũmaga hagĩe na ũndũ ũngĩhĩnga mũndũ nĩguo ũtungata witũ ndũkonerwo mahĩtia.

Aca, ithuĩ tũrĩ ta ndungata cia Yahweh nĩ twĩgathagĩrĩria maũndũ-inĩ mothe: nĩ ũndũ wa kũũmĩrĩria maũndũ maingĩ; na gũkirĩrĩria mathĩna na moritũ, na mĩtangĩko;

na ũndũ wa kũhũrwo, na kuohwo njera, na kũreherwo ngũĩ; na kũruta wĩra mũritũ, na kũũrwo nĩ toro ũtukũ, na ngʼaragu;

ningĩ nĩ ũndũ wa gũtũũra na ũthingu, na ũtaũku, na gũkirĩrĩria, na gũtugana thĩinĩ wa Roho Mwamũre, na kũgĩa na wendani ũtarĩ na ũhinga;

o na kwaria ũhoro wa ma, na gũkorwo tũrĩ na hinya wa Yahweh; nĩgũkorwo tũnyitĩte indo cia mbaara cia ũthingu guoko-inĩ kwa ũrĩo na kwa ũmotho;

rĩmwe tũheagwo gĩtĩo, na rĩrĩa rĩngĩ tũgaconorwo, rĩmwe tũgacuukĩrwo maũndũ moru na rĩngĩ mega; ningĩ o na tũrĩ andũ a ma, tũgatuwo a maheni;

rĩmwe tũgatuwo nĩ tũũĩkaine, no rĩrĩa rĩngĩ tũgatuwo ta tũtoĩkaine; ningĩ tũkahaana ta tũrakua, no tũrĩ o muoyo; tũhũragwo, no tũtiũragagwo;

o na tũngĩonwo ta tũrĩ na kĩeha, ithuĩ tũkoragwo tũkenete hĩndĩ ciothe; tuonekaga tũrĩ athĩni, no nĩ tũtuaga andũ aingĩ itonga; tũtuagwo ta tũtarĩ kĩndũ, no indo ciothe nĩ ciitũ.

Akorinitho aya, tũramwarĩria hatarĩ ũndũ tũkũmũhitha, na tũkamũhingũrĩra ngoro ciitũ biũ.

Inyuĩ mũtihatĩkĩtwo thĩini witũ, nĩ kwĩhatĩka mwĩhatĩkĩte nda-inĩ cianyu inyuĩ-ene.

O ta ũguo tũmwĩkĩte-rĩ, ndĩramwarĩria ta ciana ciakwa, o na inyuĩ hingũrai ngoro cianyu biũ.

Mũtikae kuohanio na arĩa matetĩkĩtie ta mwĩkĩrĩtwo icoki rĩmwe nao. Tondũ-rĩ, ũthingu na waganu ingĩgwatanĩra atĩa? Kana ũtheri na nduma-rĩ, ingĩgĩa na ngwatanĩro ĩrĩkũ?

Messiya na Beliali-rĩ, marĩ na ũiguano ũrĩkũ? Nake mũndũ ũrĩa wĩtĩkĩtie na ũrĩa ũtetĩkĩtie-rĩ, marĩ na ngwatanĩro ĩrĩkũ?

Hekarũ ya Yahweh yakĩhota atĩa kũiguana na mĩhianano? Nĩgũkorwo ithuĩ nĩ ithuĩ hekarũ ya Kĩhoti ũrĩa ũrĩ muoyo. O ta ũrĩa Yahweh oigĩte atĩrĩ: “Nĩ ndĩrĩtũũranagia nao, na njeerage gatagatĩ-inĩ kao, nduĩke Kĩhoti wao, nao matuĩke andũ akwa.”

“Nĩ ũndũ ũcio-rĩ, umai kũrĩ o na mwĩyamũranie nao, ũguo nĩguo Yahweh ekuuga. Mũtikahutie kĩndũ kĩrĩ thahu, na niĩ nĩ ngũmwamũkĩra.”

“Nĩ ngũtuĩka Ithe wanyu, na inyuĩ mũtuĩke ariũ akwa na aarĩ akwa, ũguo nĩguo Yahweh El Shaddai ekuuga.”