Akorinitho wa Keerĩ 7
Arata akwa endwa, kuona atĩ nĩ twĩrĩirwo maũndũ macio-rĩ, nĩ twĩtheriei, tũtigane na ũndũ o wothe ũrĩa ũthũkagia mũndũ mwĩrĩ na roho, na tũhingagie ũhoro wa kwĩyamũrĩra Yahweh nĩ ũndũ wa gwĩtigĩra Yahweh.
Rĩu-rĩ, tũhei handũ ngoro-inĩ cianyu. Tũtirĩ mũndũ o na ũrĩkũ tũhĩtĩirie, na tũtirĩ mũndũ o na ũrĩkũ tũthũkĩtie, na gũtirĩ mũndũ o na ũrĩkũ tũhinyĩrĩirie.
Ndiroiga ũguo nĩguo ndĩmũtuĩre; nĩ njugĩte rĩngĩ atĩ mũrĩ na handũ thĩinĩ wa ngoro ciitũ, kuona atĩ tũgũtũũra muoyo kana tũkuanĩre na inyuĩ.
Ndĩ na ũũmĩrĩru mũnene ngĩmwarĩria; nĩ ndĩĩrahaga mũno nĩ ũndũ wanyu. Mathĩna-inĩ maitũ mothe, nĩ ngoragwo nyũmĩrĩirie mũno, na gĩkeno gĩakwa gĩgakĩrĩrĩria.
Nĩgũkorwo rĩrĩa twakinyire Makedonia, mwĩrĩ ũyũ witũ ndwagĩire na kĩhurũko, no gũthĩnio twathĩnagio o harĩa hothe twathiaga; kũu nja kwarĩ na ngũĩ, na ngoro-inĩ ciitũ twarĩ na guoya.
No Yahweh ũrĩa ũhoragĩria arĩa makuĩte ngoro, nĩ atũhoreririe nĩ ũndũ wa gũũka gwa Tito,
na to ũndũ wa gũũka gwake gwiki, no ningĩ nĩ ũndũ wa ũhorerania ũrĩa mwamũheete. Nĩ atũheire ũhoro wa ũrĩa mwendaga kũnyona, na kĩeha kĩnene kĩrĩa mũrĩ nakĩo, o na ũrĩa mwĩtangaga mũno nĩ ũndũ wakwa; nĩ ũndũ ũcio gĩkeno gĩakwa gĩkĩongerereka gũkĩra mbere.
O na ingĩkorwo nĩ ndatũmire mũgĩe na kĩeha nĩ ũndũ wa marũa makwa-rĩ, ndikwĩrira. O na gũkorwo kũrĩ hĩndĩ nderirire nĩ ũndũ ũcio-rĩ, nguona atĩ marũa makwa nĩ mamũiguithirie kĩeha, no nĩ gwa kahinda o kanini,
no rĩu ndĩ na gĩkeno, ti tondũ nĩ mwaiguithirio kĩeha, no nĩ tondũ kĩeha kĩanyu nĩ gĩatũmire mũhere. Nĩgũkorwo mwagĩire na kĩeha o ta ũrĩa Yahweh endaga, na nĩ ũndũ ũcio ithuĩ tũtirĩ ũndũ mũũru o na ũmwe twamwĩkire.
Kĩeha kĩrĩa kiumanĩte kũrĩ Yahweh kĩrehaga ũhoro wa kũhera kũrĩa gũtũmaga andũ mahonoke, na gũtirĩ wĩriraga gwĩka ũguo, no kĩeha kĩa maũndũ ma thĩ kĩrehaga gĩkuũ.
Atĩrĩrĩ, ta kĩonei kĩeha kĩu kiumanĩte na Yahweh kĩrĩa gĩciarĩte thĩinĩ wanyu: Nĩ gĩtũmĩte mũgĩe na kĩyo kĩnene, o na wendo mũnene wa gwĩkũũra, na gwakanwo nĩ ngoro, na kĩmako, na kwĩrirĩria kũnene, na kwĩrũmbũiya, o na wetereri wa kuona atĩ kĩhooto nĩ kĩahingio. Maũndũ-inĩ mothe-rĩ, nĩ mwĩonanĩtie inyuĩ ene atĩ mũtirĩ na ũcuuke ũndũ-inĩ ũyũ.
Nĩ ũndũ ũcio, o na gwatuĩka nĩ ndamwandĩkĩire marũa-rĩ, ndiamaandĩkire nĩ ũndũ wa mũndũ ũrĩa wehĩtie, kana nĩ ũndũ wa ũrĩa wahĩtĩirio, no nĩgetha mũhote kũmenya inyuĩ ene mũrĩ mbere ya Yahweh ũrĩa mwĩheanĩte nĩ ũndũ witũ.
Maũndũ maya mothe-rĩ, nĩmo matũmĩte tũũmĩrĩrio. O ũndũ ũmwe na kũũmĩrĩrio gwitũ-rĩ, makĩria nĩ twakenire nĩ ũndũ wa kuona ũrĩa Tito aakenete, tondũ roho wake nĩ wekĩrĩtwo hinya nĩ inyuĩ inyuothe.
Nĩ nderahĩire Tito nĩ ũndũ wanyu, na inyuĩ mũtianjonorire. No o ta ũrĩa maũndũ mothe marĩa twamwĩrire maarĩ ma ma-rĩ, noguo kwĩraha gwitũ nĩ ũndũ wanyu harĩ Tito o nakuo gũtuĩkĩte ũhoro wa ma.
Naguo wendo ũrĩa amwendete naguo nĩ ũkĩrĩrĩirie kũneneha aaririkana ũrĩa inyuothe mwaathĩkire, na ũrĩa mwamwamũkĩrire mũrĩ na gwĩtigĩra na kũinaina
Ndĩ na gĩkeno tondũ rĩu ndĩ na mwĩhoko mũkinyanĩru thĩinĩ wanyu.