Akorinitho wa Keerĩ 8

Na rĩrĩ, ariũ na aarĩ a Ithe witũ, nĩ tũkwenda mũmenye ũhoro wa Wega wa Yahweh ũrĩa aheanĩte maũngano-inĩ ma Makedonia.

Hĩndĩ ĩrĩa andũ acio maageririo na magerio manene-rĩ, gĩkeno kĩao kĩnene na ũthĩni wao mũkĩru nĩ ciatũmire maingĩhĩrwo nĩ ũtana mũnene.

Nĩgũkorwo niĩ ndĩ mũira atĩ maaheanire indo o ta ũrĩa maahotire, o na makĩruta makĩria ma ũrĩa mangĩahotire, nĩ ũndũ wa kwĩyendera kwao.

Nao magĩtũthaitha na hinya mũno metĩkĩrio kũgwatanĩra ũhoro-inĩ wa gũteithia andũ arĩa aamũre.

Magĩĩka ũndũ ũcio matiawĩkire ta ũrĩa twerĩgĩrĩire, no maambire kwĩheana o ene kũrĩ Yahweh o na kũrĩ ithuĩ, kũringana na ũrĩa Yahweh endete.

Nĩ ũndũ ũcio nĩ twaringĩrĩirie Tito, kuona atĩ nĩwe wambĩrĩirie ũndũ ũcio, atuĩke wa kũrĩkia ũndũ ũcio wa ũtugi wanyu.

O ta ũrĩa mũgaacagĩra harĩ maũndũ mothe, nĩmo gwĩtĩkia, na ũhoro wa kwaria, na wa ũmenyo, na thĩinĩ wa kĩyo gĩkinyanĩru, o na wa wendo wanyu harĩ ithuĩ-rĩ, kĩingĩhiei wega ũyũ wa gũtugana o naguo.

Ti kũmwatha ndĩramwatha, no ndĩrenda kũgeria wendani wanyu, nyone ũrĩa ũrĩ wa ma ngĩũgerekania na kĩyo kĩa andũ arĩa angĩ.

Nĩgũkorwo nĩ mũũĩ ũhoro wa wega wa Mwathi witũ Yahshua Messiya atĩ, o na gũtuĩka aarĩ gĩtonga, nĩ atuĩkire mũthĩni nĩ ũndũ wanyu, nĩgetha inyuĩ mũtuĩke itonga na ũndũ wa ũrĩa aathĩnĩkĩte.

Ha ũhoro ũyũ-rĩ, mataaro makwa ma ũndũ ũrĩa ũmwagĩrĩire makĩria nĩ atĩrĩ: Mwaka ũcio ũrathirire nĩ inyuĩ mwarĩ a mbere, na to ũndũ wa kũheana gwiki, no o na nĩ ũndũ wa kwĩrirĩria gwĩka ũguo.

Rĩu-rĩ, kĩrĩkiei wĩra ũcio, nĩgetha kĩyo kĩanyu kĩa wendo wa gwĩka ũguo kĩiganane na kũrĩkia kwanyu kwa ũndũ ũcio, kũringana na kĩrĩa mũrĩ nakĩo.

Mũndũ angĩkorwo arĩ na wendo, kĩheo kĩu nĩ gĩĩtĩkĩrĩku kũringana na ũrĩa mũndũ arĩ na indo, ti kũringana na ũrĩa aciagĩte.

Kwĩrirĩria gwitũ ti amwe mahũthĩrio mũrigo na inyuĩ mũhinyĩrĩrio, no nĩgetha andũ othe maigananio.

Ihinda rĩrĩ mũingĩhĩtie indo-rĩ, nĩ igũteithia wagi wao, nĩgetha rĩrĩa magaakorwo na indo o nao magaateithia wagi wanyu. Hĩndĩ ĩyo andũ othe nĩ makaigananio,

o ta ũrĩa kwandĩkĩtwo atĩrĩ: “Mũndũ ũrĩa wonganĩtie nyingĩ, ndarĩ kĩndũ aatigĩirio; nake ũrĩa wonganirie nini, ndarĩ kĩndũ aagire.”

Nĩ ngũcokeria Yahweh ngatho, ũrĩa wekĩrire ngoro-inĩ ya Tito ũhoro wa kũmũrũmbũiya o ta ũrĩa niĩ ndĩ na ũhoro ũcio.

Nĩgũkorwo Tito to mathaithana maitũ aamũkĩrire, no nĩ egũka kũrĩ inyuĩ arĩ na kĩyo kĩnene nĩ ũndũ wa kwĩyendera gwake.

O na nĩ tũgũtũma Tito marĩ hamwe na mũrũ wa Ithe witũ ũrĩa ũrĩ na ngumo njega maũngano-inĩ mothe nĩ ũndũ wa ũrĩa atungatagĩra Ũhoro-ũrĩa-Mwega.

Makĩria ma ũguo, nĩwe wathurirwo nĩ maũngano nĩguo atwarane na ithuĩ ũhoro-inĩ wa mũhothi ũcio wa ũtana, o ũcio tũrutagĩra wĩra nĩguo tũgoocithie Yahweh we mwene, na tuonanie kĩyo kĩrĩa tũrĩ nakĩo gĩa kwenda gũteithia.

Nĩ tũrageria mũno kweherera ũndũ o wothe ũngĩtũma tũrutwo mahĩtia rĩrĩa tũkũramata kĩheo gĩkĩ kĩheanĩtwo na ũtana.

Nĩgũkorwo nĩ tũrerutanĩria gwĩka maũndũ marĩa mangĩonwo maagĩrĩire mbere ya Yahweh, na to harĩ we wiki, no o na ningĩ monwo marĩ maagĩrĩru nĩ andũ o nao.

Ningĩ hamwe nao, nĩ tũgũtũma mũrũ wa Ithe witũ ũngĩ, ũrĩa tuonete maita maingĩ na njĩra nyingĩ atĩ arĩ na kĩyo, o na arĩ nakĩo makĩria nĩ ũndũ wa mwĩhoko wake mũnene harĩ inyuĩ.

Naguo ũhoro wa Tito-rĩ, nĩ mũthiritũ wakwa ũrĩa tũrutithanagia wĩra nake nĩ ũndũ wanyu; na ha ũhoro ũkoniĩ ariũ a Ithe witũ-rĩ, o nĩ atũmwo a maũngano na monanagia ũgooci wa Messiya.

Tondũ ũcio oniai andũ acio ũira wa wendani wanyu, na gĩtũmi kĩrĩa gĩtũmaga twĩrahe nĩ ũndũ wanyu nĩguo maũngano mone ũndũ ũcio.