Akorinitho wa Keerĩ 9
Na rĩrĩ, ndikuona harĩ bata ndĩmwandĩkĩre ũhoro wa ũteithio ũrĩa wagĩrĩire kũheo andũ arĩa aamũre.
Nĩgũkorwo nĩ njũĩ kĩyo kĩanyu gĩa kwenda gũteithia, na nĩ ngoretwo ngĩĩrahĩra ũndũ ũcio kũrĩ andũ a Makedonia, ngamera atĩ kuuma mwaka ũcio ũrathirire, inyuĩ andũ a Akaia mũtũire mwĩhaarĩirie kũheana; na kĩyo kĩu kĩanyu nĩkĩo kĩarahũrĩte aingĩ ao
No nĩ ngũtũma ariũ a Ithe witũ nĩguo kwĩraha gwitũ nĩ ũndũ wanyu ũhoro-inĩ ũyũ wa mũhothi gũtigatuĩke gwa tũhũ, no mũgaakorwo mwĩhaarĩirie, o ta ũrĩa ndoigire atĩ nĩ mwĩhaarĩirie.
Nĩgũkorwo andũ amwe a Makedonia mangĩrehane na niĩ makore mũtehaarĩirie-rĩ, ithuĩ, o na tũtekũmũgweta-rĩ, nĩ tũgaaconoka nĩ ũndũ wa ũguo tũmwĩhokete.
Nĩ ũndũ ũcio, nĩ ndĩronire arĩ wega gũthaitha ariũ a Ithe witũ maambe mamũceerere ihinda rĩu rĩtanakinya, nĩguo marĩkĩrĩrie mĩbango ya kĩheo kĩa ũtana kĩrĩa mweranĩire. Hĩndĩ ĩyo kĩheo kĩu nĩ gĩgakorwo kĩrĩ ho, na kĩheanĩtwo na kwĩyendera, no ti na kũringĩrĩrio.
Ririkanai ũũ: Mũndũ ũrĩa ũhandaga tũnini akaagetha o tũnini, nake ũrĩa ũhandaga nyingĩ akaagetha nyingĩ.
O mũndũ aagĩrĩirwo nĩ kũheana kĩrĩa atuĩte na ngoro yake nĩ ekũheana, na ndakaheane atekwenda kana ta arĩ kũringĩrĩrio, nĩgũkorwo Yahweh endaga mũndũ ũrĩa ũheanaga akenete.
Nake Yahweh arĩ na ũhoti wa gũtũma mũingĩhĩrwo nĩ maũndũ mothe ma wega wake, nĩguo maũndũ-inĩ mothe na mahinda-inĩ mothe, mũkoragwo na kĩrĩa gĩothe mũbatarĩtio nĩkĩo, nĩguo mũkoragwo mũingĩhĩtie indo cia kũruta wĩra o wothe mwega.
O ta ũrĩa kwandĩkĩtwo atĩrĩ: “Nĩ ahurunjĩte iheo ciake akahe andũ arĩa athĩni; ũthingu wake ũtũũraga nginya tene na tene.”
Na rĩrĩ, ũrĩa ũheaga mũhandi mbeũ na akamũhe irio cia kũrĩa, nĩ arĩmũheaga mbeũ cia kũhanda, na atũme cingĩhe, na ongerere magetha ma ũthingu wanyu
Na inyuĩ nĩ mũrĩtongagio na njĩra ciothe nĩguo mũheanage na ũtana hĩndĩ ciothe, naguo ũtana wanyu, nĩ ũndũ wa wĩra witũ, ũtũmage Yahweh acokagĩrio ngatho.
Ũteithio ũyũ mũraruta ti kuuga atĩ no andũ a Yahweh mũrahingĩria mabata mao, no nĩ ũtũmaga Yahweh acokagĩrio ngatho na njĩra nyingĩ.
Na tondũ wa ũtungata ũcio mwĩonanĩtie naguo ũrĩa mũhaana-rĩ, andũ nĩ marĩgoocaga Yahweh nĩ ũndũ wa ũrĩa mwathĩkĩire Ũhoro-ũrĩa-Mwega wa Messiya ũrĩa muumbũraga atĩ nĩ mũwĩtĩkĩtie, na nĩ ũndũ wa ũtana wanyu wa kũgwatanĩra nao o na wa kũgwatanĩra na andũ arĩa angĩ othe.
Na rĩrĩa mekũmũhoera, ngoro ciao nĩ imwĩciragia, tondũ wa ũrĩa wega wa Yahweh ũrĩa inyuĩ mũheetwo ũkĩrĩrĩirie kũingĩha.
Yahweh arocokerio ngatho nĩ ũndũ wa kĩheo gĩake kĩrĩa gĩtangiugĩka na ciugo ũrĩa gĩtariĩ!