Akorinitho wa Mbere 1
Nĩ niĩ Saũlũ, o niĩ ndeetirwo nduĩke mũtũmwo wa Messiya Yahshua nĩ ũndũ wa kwenda kwa Yahweh, ndĩratũma ngeithi ici tũrĩ hamwe na mũrũ wa Ithe witũ Sosithene,
Twandĩkĩra Ũngano wa Yahweh ũrĩa ũrĩ Korinitho, kũrĩ arĩa othe maamũrĩtwo thĩinĩ wa Messiya Yahshua na magetwo matuĩke andũ aamũre, o hamwe na arĩa othe marĩ kũndũ guothe makayagĩra rĩĩtwa rĩa Mwathi witũ Yahshua Messiya, o we Mwathi wao na witũ:
Wega na thayũ irogĩa kũrĩ inyuĩ ciumĩte kũrĩ Yahweh Ithe witũ na Mwathi Yahshua Messiya.
Nĩ njokagĩria Yahweh ngatho hĩndĩ ciothe nĩ ũndũ wanyu, nĩ ũndũ wa wega wake ũrĩa mũheetwo thĩinĩ wa Messiya Yahshua.
Nĩgũkorwo thĩinĩ wake nĩ mũtongetio maũndũ-inĩ mothe, mũgatongio ũhoro-inĩ wa mĩario yanyu yothe o na ũhoro-inĩ wothe wa kũmenya maũndũ,
tondũ-rĩ, ũira witũ ũkoniĩ Messiya nĩ wekĩrirwo hinya thĩinĩ wanyu.
Nĩ ũndũ ũcio gũtirĩ kĩheo gĩa kĩĩroho o na kĩmwe mũtarĩ nakĩo, o mũgĩetagĩrĩra na kĩyo kũguũranĩrio kwa Mwathi witũ Yahshua Messiya.
Nake nĩ arĩmũikaragia mũrĩ na hinya nginya mũthia, nĩguo mũtikanakorwo mũrĩ na ũcuke mũthenya ũrĩa wa Mwathi witũ Yahshua Messiya.
Yahweh nĩ mwĩhokeku, o we ũrĩa wamwĩtire nĩguo mũkorwo na ngwatanĩro na Mũriũ Yahshua Messiya, Mwathi witũ.
Rĩu-rĩ, inyuĩ ariũ na aarĩ a Ithe witũ, ndamũthaitha thĩinĩ wa rĩĩtwa rĩa Mwathi witũ Yahshua Messiya, atĩ inyuothe mũiguane o mũndũ na ũrĩa ũngĩ, nĩguo mũtikagĩe na nyamũkano gatagatĩ-inĩ kanyu, no mũikare mũiguanĩte, na mũrĩ na meciria o mamwe, na ngoro o ĩmwe
Tondũ rĩrĩ ariũ na aarĩ a Ithe witũ, nĩ menyithĩtio nĩ andũ amwe a kuuma nyũmba ya Kiloe atĩ nĩ kũrĩ na ngũĩ gatagatĩ-inĩ kanyu.
Ũrĩa ndĩroiga nĩ atĩrĩ: Ũmwe wanyu oigaga atĩ, “Niĩ nũmagĩrĩra Saũlũ”; ũngĩ akoiga atĩ, “Niĩ nũmagĩrĩra Apolo”; nake ũngĩ akoiga atĩ, “Niĩ nũmagĩrĩra Kepha”; o na ningĩ ũngĩ akoiga atĩ, “Niĩ nũmagĩrĩra Messiya.”
Kaĩ Messiya agayanĩtio? Saũlũ-rĩ, nĩwe waacuuririo mũtĩ igũrũ nĩ ũndũ wanyu? Mwabatithirio thĩinĩ wa rĩĩtwa rĩa Saũlũ?
Nĩ ngũcokia ngatho nĩ ũndũ gũtirĩ o na ũmwe wanyu niĩ ndaabatithirie, o tiga Kirisipo na Gayo.
Nĩ ũndũ ũcio gũtirĩ mũndũ o na ũmwe ũngiuga atĩ mwabatithirio thĩinĩ wa rĩĩtwa rĩakwa.
Ĩĩ, o na ningĩ nĩ ndabatithirie andũ a nyũmba ya Stefana; no tiga acio, ndingĩririkana kana nĩ kũrĩ mũndũ ũngĩ ndaabatithirie
Nĩ gũkorwo Messiya ndaandũmire ngabatithanie, no aandũmire ngahunjie Ũhoro-ũrĩa-Mwega, no ti ndĩũheane na ũũgĩ wa mũndũ, nĩgetha gũcuurio mũtĩ-inĩ kwa Messiya gũtikae kwagithio kĩene.
Nĩgũkorwo ndũmĩrĩri ya gũkua kwa Messiya nĩ ũrimũ kũrĩ arĩa marora, no kũrĩ ithuĩ arĩa tũrahonokio-rĩ, ũndũ ũcio nĩ hinya wa Yahweh.
Nĩgũkorwo kwandĩkĩtwo atĩrĩ: “Ũũgĩ wa andũ arĩa ogĩ nĩ kũũnina ngaũnina; naguo ũmenyo wa andũ arĩa imenyi ndĩkĩũtue wa tũhũ.”
Mũndũ ũrĩa mũũgĩ-rĩ, akĩrĩ kũ? Mũndũ ũrĩa mũthomu-rĩ, akĩrĩ kũ? Arĩ ha mũciri ũrĩa ũũĩ gũcira maũndũ ma mahinda maya tũrĩ? Githĩ Yahweh ndatuĩte ũũgĩ wa thĩ ĩno ũrimũ?
Nĩgũkorwo Yahweh na ũndũ wa ũũgĩ wake nĩ onire atĩ andũ a thĩ ĩno na ũũgĩ wao matikaamũmenya, akĩona kwagĩrĩire ahũthĩre maũndũ ma ũrimũ marĩa tũhunjagia nĩgetha ahonokie arĩa mamwĩtĩkagia.
Ayahudi metagia ciama, nao Ayunani macaragia ũũgĩ,
no ithuĩ tũhunjagia ũhoro wa Messiya arĩ mũcuurie mũtĩ igũrũ: maũndũ macio nĩ mũhĩnga kũrĩ Ayahudi na ũrimũ kũrĩ andũ-a-Ndũrĩrĩ,
no kũrĩ arĩa Yahweh etĩte, Ayahudi o na Ayunani, Messiya nĩwe hinya wa Yahweh na ũũgĩ wa Yahweh.
Nĩgũkorwo ũrimũ wa Yahweh nĩ mũũgĩ gũkĩra ũũgĩ wa mũndũ, naguo ũhũthũ wa Yahweh nĩ mũritũ gũkĩra hinya wa mũndũ.
Ariũ na aarĩ a Ithe witũ, ta gĩciriei ũrĩa mwatariĩ rĩrĩa mwetirwo. Ti aingĩ anyu ogĩ na ũũgĩ wa andũ a gũkũ thĩ; na ti aingĩ mangĩaguucĩrĩirie andũ; o na ti aingĩ maciarĩirwo mĩciĩ ĩrĩa ĩrĩ igweta.
No Yahweh aathurire maũndũ marĩa ma ũrimũ ma thĩ ĩno nĩguo aconorithie andũ arĩa ogĩ; ningĩ Yahweh aathurire maũndũ marĩa matarĩ hinya ma thĩ ĩno nĩguo aconorithie arĩa marĩ hinya
Agĩthura maũndũ marĩa mahũthũ ma thĩ ĩno, na marĩa matarĩ ma gũtĩĩka, o gwata marĩa matarĩ maũndũ kũrĩ, nĩgetha aagithie kĩene maũndũ marĩa andũ matuaga atĩ nĩ ma bata,
nĩgetha mũndũ o na ũ ndakanetĩe mbere ya Yahweh.
No rĩrĩ, nĩwe ũtũmĩte mũkorwo mũrĩ thĩinĩ wa Messiya Yahshua, ũrĩa ũtuĩkĩte ũũgĩ uumĩte kũrĩ Yahweh nĩ ũndũ witũ, ũguo nĩ kuuga, ũthingu witũ, na waamũri, na gũkũũrwo.
Nĩ ũndũ ũcio, o ta ũrĩa kwandĩkĩtwo atĩrĩ: “Mũndũ ũrĩa ũkwĩraha, nĩ erahage nĩ ũndũ wa Yahweh.”