Akorinitho wa Mbere 2

Hĩndĩ ĩrĩa ndookire kũrĩ inyuĩ, ngĩmũhunjĩria ũira wa hitho ya ũhoro wa Yahweh, ariũ na aarĩ a Ithe witũ, ndiamwarĩirie na mĩario ya kanua kega kana ũũgĩ mũnene.

Nĩgũkorwo nĩ ndatuĩte itua ndirĩ ũndũ ũngĩ ngwenda kũmenya, rĩrĩa rĩothe ndaarĩ na inyuĩ, o tiga ũhoro wa Yahshua Messiya na gũcuurio gwake mũtĩ-igũrũ.

Ndookire kũrĩ inyuĩ itarĩ na hinya, na ndĩ na guoya, o na ngĩinainaga mũno.

Ndũmĩrĩri yakwa na kũhunjia gwakwa itiarĩ na ciugo cia kũguucanĩrĩria na ũũgĩ, no nĩ cionanagia hinya wa Roho,

nĩguo wĩtĩkio wanyu ndũgakorwo ũtiirĩrĩirwo nĩ ũũgĩ wa andũ, o tiga hinya wa Yahweh.

No ningĩ ithuĩ-rĩ, tũrĩ gatagatĩ-inĩ ka andũ arĩa agima twaragia ũhoro wa ndũmĩrĩri ya ũũgĩ, no tũtiaragia ũhoro wa ũũgĩ wa mahinda maya, kana wa aathani a mahinda maya arĩa matarĩ kũrĩa merekeire.

No ithuĩ-rĩ, twaragia ũhoro wa ũũgĩ wa Yahweh ũrĩa wa hitho, ũũgĩ ũrĩa watũire ũrĩ mũhithe, o ũrĩa Yahweh aathĩrĩire o mbere ya kũũmba thĩ nĩ ũndũ wa riri witũ.

Gũtirĩ o na ũmwe wa anene a mahinda maya wamenyire ũhoro ũcio, nĩgũkorwo mangĩaũmenyete-rĩ, matingĩacuuririe Mũthamaki wa riri.

Nĩgũkorwo no ta ũrĩa kwandĩkĩtwo atĩrĩ: “Maũndũ marĩa matarĩ monwo na maitho, na matarĩ maiguuo na matũ, o na matarĩ maatonya ngoro ya mũndũ, nĩmo Kĩhoti athondekeire andũ arĩa mamwendete”:

no Yahweh nĩ atũguũrĩirie maũndũ macio na ũndũ wa Roho wake. Roho nĩ athuthuuragia maũndũ mothe, o na maũndũ ma Yahweh marĩa marikĩru mũno.

Tondũ-rĩ, nũ ũũĩ meciria ma mũndũ, tiga o roho wa mũndũ ũrĩa ũrĩ thĩinĩ wake? O ta ũguo-rĩ, gũtirĩ mũndũ ũũĩ meciria ma Yahweh, o tiga Roho wa Yahweh.

Tũtiamũkĩrĩte roho wa thĩ ĩno, no tũheetwo Roho ũrĩa uumĩte kũrĩ Yahweh, nĩguo tũmenyage iheo iria Yahweh atũheete o ũguo tũhũ.

Maũndũ macio nĩmo twaragia, no tũtimaaragia na ciugo iria tũrutĩtwo na ũũgĩ wa mũndũ, no nĩ na ciugo iria tũrutagwo nĩ Roho, tũgataarĩria ũhoro wa ma wa kĩĩroho na ciugo cia kĩĩroho.

Mũndũ ũtarĩ na Roho ndetĩkagĩra maũndũ marĩa moimaga kũrĩ Roho wa Yahweh, tondũ maũndũ macio nĩ ũrimũ kũrĩ we, na ndangĩmamenya, tondũ makũũrĩkanaga na njĩra ya kĩĩroho.

Mũndũ wa kĩĩroho nĩ akũũranaga maũndũ mothe, nowe mwene gũtirĩ mũndũ ũngĩmũtuĩra.

“Nĩ ũndũ-rĩ, nũ ũngĩmenya meciria ma Yahweh, nĩguo akĩmũtaare?” No ithuĩ tũrĩ na meciria ma Messiya.