Akorinitho wa Mbere 3

Ariũ na aarĩ a Ithe witũ, ndingĩahotire kũmwarĩria ta mũrĩ andũ a kĩĩroho, no ndaamwarĩirie ta mũrĩ andũ a thĩ, o ta twana tũnini thĩinĩ wa Messiya.

Ndamũheire iria, no ti irio nyũmũ ndamũheire, nĩgũkorwo mũtiakinyĩte a gũcirĩa. Ti-itherũ o na rĩu mũtikinyĩte a gũcirĩa.

O na rĩu mũrĩ andũ a thĩ. Kuona atĩ kũrĩ na ũiru na ngũĩ thĩinĩ wanyu-rĩ, githĩ mũtikĩrĩ andũ a thĩ? Githĩ mũtiragĩĩka o ta ũrĩa andũ a ndũire mekaga?

Nĩ ũndũ-rĩ, rĩrĩa mũndũ ũmwe ekuuga atĩrĩ, “Niĩ nũmagĩrĩra Saũlũ,” nake ũrĩa ũngĩ akoiga atĩrĩ, “Niĩ nũmagĩrĩra Apolo,” githĩ mũtikĩrĩ o andũ a ndũire?

Kaĩ Apolo akĩrĩ ũ? Nake Saũlũ akĩrĩ ũ? Acio maarĩ o ndungata, iria ciatũmire mwĩtĩkie, o ta ũrĩa Yahweh aagaĩire o mũndũ wĩra wake.

Niĩ nĩ mbeũ ndahandire, nake Apolo agĩciitĩrĩria maĩ, no nĩ Yahweh watũmire ikũre.

Nĩ ũndũ ũcio ti mũndũ ũrĩa ũhandaga kana ũrĩa ũitagĩrĩria maĩ ũrĩ bata, no ũrĩa ũrĩ bata nĩ Yahweh, ũrĩa ũtũmaga ikũre.

Mũndũ ũrĩa ũhandaga na mũndũ ũrĩa ũitagĩrĩria maĩ makoragwo na muoroto ũmwe, na o mũndũ akaarĩhwo kũringana na wĩra wake we mwene.

Nĩgũkorwo tũrutithanagia wĩra hamwe na Yahweh; na inyuĩ mũrĩ mũgũnda wa Yahweh, na mwako wa Yahweh.

Nĩ ũndũ wa wega ũrĩa Yahweh aaheete, niĩ nĩ gwaka ndaakire mũthingi haana ta mwakithia ũrĩa mũũgĩ nake mũndũ ũngĩ nĩ gwaka araaka igũrũ rĩa mũthingi ũcio. No o mũndũ nĩ amenyagĩrĩre ũrĩa egwaka igũrũ rĩaguo.

Nĩgũkorwo gũtirĩ mũndũ ũngĩaka mũthingi ũngĩ tiga ũrĩa ũrĩkĩtie gwakwo, na nĩguo Yahshua Messiya.

Angĩkorwo mũndũ o na ũ egwaka igũrũ rĩa mũthingi ũyũ akĩhũthagĩra thahabu, kana betha, kana mahiga ma goro, kana mbaũ, kana nyeki, o na kana rũũa-rĩ,

wĩra wake nĩ ũkoneka ũrĩa ũtariĩ, tondũ Mũthenya ũcio nĩ ũgatũma woneke ũtheri-inĩ. Wĩra ũcio ũkaaguũrio na mwaki, nĩgũkorwo wĩra wa o mũndũ nĩ ũkagerio na mwaki ũcio.

Angĩkorwo kĩrĩa mũndũ aakĩte mũthingi-igũrũ nĩ gĩgetiiria mwaki ũcio-rĩ, nĩ akarĩhwo mũcara wake.

Angĩkorwo wĩra ũcio nĩ ũkahĩa-rĩ, nĩ akorũo nĩguo; nowe mwene nĩ akahonoka, no akahonoka ta mũndũ ũgereire mwaki-inĩ.

Kaĩ inyuĩ mũtoĩ atĩ inyuĩ ene mũrĩ hekarũ ya Yahweh, na atĩ Roho wa Yahweh atũũraga thĩinĩ wanyu?

Mũndũ o wothe angĩananga hekarũ ya Yahweh-rĩ, Yahweh nĩ akamwananga; nĩgũkorwo hekarũ ya Yahweh nĩ nyamũre, na nĩ inyuĩ hekarũ ĩyo.

Mũtikae kwĩhenia. Mũndũ o na ũrĩkũ thĩinĩ wanyu angĩkorwo nĩ eciragia nĩ mũũgĩ na ũũgĩ wa mahinda maya tũrĩ-rĩ, nĩ agĩtuĩke “kĩrimũ” nĩguo atuĩke mũũgĩ.

Nĩgũkorwo ũũgĩ wa thĩ ĩno nĩ ũrimũ maitho-inĩ ma Yahweh. O ta ũrĩa kwandĩkĩtwo atĩrĩ, “Nĩ anyitaga arĩa ogĩ wara-inĩ wao”;

o na ningĩ nĩ kwandĩkĩtwo atĩrĩ, “Yahweh nĩ oĩ atĩ meciria ma arĩa ogĩ nĩ ma tũhũ.”

Nĩ ũndũ ũcio-rĩ mũndũ o na ũrĩkũ ndakae kwĩraha na ũhoro wa andũ! Maũndũ mothe nĩ manyu,

kana nĩ Saũlũ, kana nĩ Apolo, kana nĩ Kepha, kana nĩ thĩ ĩno, kana nĩ muoyo, kana nĩ gĩkuũ, kana nĩ maũndũ marĩa marĩ ho rĩu, kana nĩ maũndũ marĩa magoka, mothe nĩ manyu,

na inyuĩ mũrĩ a Messiya, nake Messiya nĩ wa Yahweh.