Akorinitho wa Mbere 4

Nĩ ũndũ ũcio-rĩ, andũ magĩrĩirwo nĩ gũtuonaga ta ndungata cia Messiya, na ta tũrĩ andũ arĩa mehokeirwo maũndũ ma hitho ma Yahweh

Rĩu nĩ kũbataranĩtie atĩ andũ arĩa mehokeirwo maũndũ no nginya monanie atĩ nĩ ehokeku.

Ndingĩmaka o na hanini ingĩtuĩrwo cira nĩ inyuĩ, kana nduĩrwo nĩ igooti rĩa andũ o na rĩrĩkũ; ti-itherũ o na niĩ mwene ndingĩĩtuĩra cira.

Niĩ mwene ndirĩ na ũndũ ingĩĩcukĩra, no ũndũ ũcio ndũngĩtũma nduĩke atĩ ndirĩ na mahĩtia. Yahweh nĩwe ũnduagĩra cira.

Nĩ ũndũ ũcio ndũkae gũtua cira ihinda rĩrĩa rĩamũre rĩtakinyĩte; eterera nginya Yahshua oke. Maũndũ marĩa mahithe nduma-inĩ nĩ akamoimĩria ũtheri-inĩ, na nĩ akaguũria meciria ma ngoro cia andũ. Ihinda rĩu o mũndũ nĩ akamũkĩra ngatho ciake kuuma kũrĩ Yahweh.

Rĩu-rĩ, ariũ na aarĩ a Ithe witũ, maũndũ macio ndĩramaringithania na ũhoro wakwa mwene na wa Apolo nĩguo mũgunĩke, nĩguo mwĩrute na ithuĩ gĩtũmi kĩa ũrĩa kwĩragwo atĩrĩ, “Mũtikae kwagarara ũrĩa kwandĩkĩtwo.” Nĩgetha mũtikae gwĩtĩa mũndũ ũmwe makĩria ya ũrĩa ũngĩ.

Nĩ ũndũ-rĩ, nũ ũtũmĩte wĩone ũrĩ na ngũũrani na mũndũ ũngĩ o wothe? Nĩ kĩ ũrĩ nakĩo ũtaaheirwo? Na angĩkorwo nĩ waheirwo-rĩ, ũragĩĩtĩa nĩkĩ ta atarĩ kũheo waheirwo?

Nĩ mũrĩkĩtie kũgĩa na kĩrĩa gĩothe mwendaga! Nĩ mũrĩkĩtie gũtonga! Nĩ mũtuĩkĩte athamaki, ithuĩ tũtarĩ ho! Naarĩ korwo ti-itherũ nĩ mwatuĩkire athamaki kũna nĩguo tũtuĩke a gũthamaka hamwe na inyuĩ!

Nĩgũkorwo ndĩrona atĩ ithuĩ atũmwo Yahweh atũigĩte handũ tũrĩonekaga tũrĩ thutha wa andũ arĩa angĩ othe, na ta andũ matuĩrĩirwo kũũragĩrwo thĩinĩ wa kĩhaaro kĩa mathako. Nĩ tũtuĩtwo kĩndũ gĩa kwĩrorerwo nĩ thĩ yothe, kũrĩ araika o na kũrĩ andũ.

Ithuĩ tũrĩ irimũ nĩ ũndũ wa Messiya, no inyuĩ mũrĩ andũ ogĩ mũno thĩinĩ wa Messiya! Ithuĩ nĩ kwaga twagĩte hinya, no inyuĩ mũrĩ na hinya! Inyuĩ nĩ mũheetwo gĩtĩo, no ithuĩ nĩ tũimĩtwo gĩtĩo!

Nginya ihinda rĩrĩ ithuĩ tũrĩ tũtũũrĩte tũhũtaga na tũkanyota, na tũgatarũkĩrwo nĩ nguo, ningĩ nĩ tũhũrĩtwo mũno, o na tũgaikara tũtarĩ na mĩciĩ.

Ningĩ nĩ tũrutaga wĩra na moko maitũ tũrĩ na kĩyo. Rĩrĩa twarumwo-rĩ, ithuĩ tũkarathima; na rĩrĩa twanyarirwo, tũkomĩrĩria;

o na rĩrĩa twacambio, tũcokagia ũhoro na ũhoreri. Nginya ihinda rĩrĩ tũtuĩkĩte gĩko gĩa thĩ, tũgatuĩka mahuti ma gũkũ thĩ.

Ndiraandĩka marũa maya nĩguo ndĩmũconore, no nĩguo ndĩmũtaare mũrĩ ta ciana ciakwa nyendete mũno

O na mũngĩkorwo mũrĩ na areri ngiri ikũmi thĩinĩ wa Messiya, mũtirĩ na maithe maingĩ, nĩgũkorwo thĩinĩ wa Messiya Yahshua ndatuĩkire ithe wanyu ũndũ-inĩ wa Ũhoro-ũrĩa-Mwega.

Nĩ ũndũ ũcio ndamũthaitha mwĩgerekanie na niĩ.

Nĩ ũndũ wa gĩtũmi gĩkĩ nĩ ngũmũtũmĩra Timotheo, mũrũ wakwa ũrĩa nyendete, na ũrĩa mwĩhokeku thĩinĩ wa Yahweh. Nĩ ekũmũririkania mũtũũrĩre wakwa thĩinĩ wa Messiya Yahshua, ũrĩa ũringaine na ũrĩa ndutanaga maũngano-inĩ kũndũ guothe.

Amwe anyu nĩ matuĩkĩte etĩi, makona ta itaroka kũu kũrĩ inyuĩ.

No nĩ ngũũka kũrĩ inyuĩ narua, akorwo nĩ kwenda kwa Yahweh, na hĩndĩ ĩyo nĩ ngatuĩria ũrĩa andũ aya etĩi maaragia, o hamwe na ũhoti ũrĩa marĩ naguo

Nĩgũkorwo ũthamaki wa Yahweh ti ũhoro wa kwaria, no nĩ wa kũgĩa na ũhoti.

Mũkwenda atĩa? Ngĩũke kũrĩ inyuĩ na kĩboko, kana njũke na wendo hamwe na roho wa ũhoreri?