Akorinitho wa Mbere 5
Nĩ ma ndeto nĩ iraario atĩ thĩinĩ wanyu kũrĩ na ũtharia, na nĩ ũtharia mũthemba ũrĩa ũtangĩoneka o na kũrĩ andũ arĩa matetĩkĩtie Yahweh: Naguo nĩ atĩ ũmwe wanyu nĩ akomete na mũtumia wa ithe.
Na inyuĩ mũgakenera ũndũ ũcio! Githĩ mũtiagĩrĩirwo nĩgũkorwo mũiyũrĩtwo nĩ kĩeha, nĩguo mũndũ ũcio wĩkĩte ũguo mũmũingate, ehere ngwatanĩro-inĩ yanyu?
O na ndakorwo ndirĩ hamwe na inyuĩ kũu, ndĩ hamwe na inyuĩ thĩinĩ wa roho, na nĩ ndĩkĩtie gũtuĩra mũndũ ũcio wĩkĩte ũguo cira, o ta ndĩ hamwe na inyuĩ.
Hĩndĩ ĩrĩa mũrĩkorwo mũnganĩte thĩinĩ wa rĩĩtwa rĩa Mwathi witũ Yahshua, na niĩ ndĩ hamwe na inyuĩ thĩinĩ wa roho, o na hinya wa Mwathi witũ Yahshua ũrĩ ho-rĩ,
mũndũ ũcio mũneanei kũrĩ Shaitani, nĩgetha mehia make ma kĩĩmwĩrĩ maninwo, naguo roho wake ũkahonokio mũthenya ũrĩa wa Mwathi witũ Yahshua.
Mwĩgatho ũcio wanyu ti mwega. Kaĩ inyuĩ mũtoĩ atĩ ndawa nini ya kũimbia mĩgate nĩ ĩtũmaga kĩmere gĩothe kĩimbe?
Eheriai ndawa ĩyo ya kũimbia mĩgate ĩrĩa ya tene biũ nĩguo mũtuĩke kĩmere kĩerũ gĩtarĩ na ndawa ya kũimbia, tondũ ũguo nĩguo mũtariĩ. Nĩgũkorwo Messiya, o we gatũrũme gaitũ ka Bathaka, nĩ arĩkĩtie kũrutwo igongona.
Nĩ ũndũ ũcio-rĩ, nĩ tũkũngũĩre Gĩathĩ, ti na ndawa ĩyo ya tene ya kũimbia mĩgate, ĩyo ya rũmena na ya waganu, no tũkũngũĩre na mũgate ũtarĩ na ndawa ya kũimbia, o guo mũgate wa thamiri njega na wa ũhoro wa ma.
Nĩ ndĩmwandĩkĩire marũa-inĩ makwa ngamwĩra mũtigage kũgĩaga thiritũ na andũ arĩa ahũri maraya,
ũguo ti kuuga mweheranĩre na andũ a thĩ ĩno, arĩa ahũri maraya, kana arĩa akoroku, kana arĩa atunyani, o na kana arĩa ahoi mĩhianano. Mũngĩĩka ũguo-rĩ, no mũkiumire gũkũ thĩ.
No rĩu, ndĩramwandĩkĩra nĩguo mũtikagĩe thiritũ na mũndũ o na ũrĩkũ ũrĩa wĩĩtaga mũrũ kana mwarĩ wa Ithe witũ, no nĩ mũhũri maraya, kana nĩ mũkoroku, kana nĩ mũhoi mĩhianano kana nĩ mũndũ wa gũcambania, o na kana nĩ mũrĩu kana nĩ mũtunyani. Mũndũ ta ũcio mũtikarĩanĩre nake.
Ũkĩrĩ wĩra wakwa gũcirithia arĩa matarĩ a Ũngano? Githĩ inyuĩ mũtikĩagĩrĩirwo nĩ gũcirithia arĩa marĩ a Ũngano?
Yahweh nĩwe ũgaacirithia arĩa marĩ nja. “Ingatai mũndũ ũcio mwaganu oime thĩinĩ wanyu.”