Akorinitho wa Mbere 6
Kũngĩkorwo kũrĩ mũndũ ũmwe wanyu ũhĩtĩirie ũrĩa ũngĩ-rĩ, no akĩgerie gũthiĩ kũrĩ andũ arĩa matetigĩrĩte Yahweh nĩguo mamatuithanie cira, handũ ha gũthiĩ mbere ya andũ arĩa aamũre?
Kaĩ inyuĩ mũtoĩ atĩ andũ arĩa aamũre nĩo magaatuĩra andũ a gũkũ thĩ cira? Na angĩkorwo nĩ inyuĩ mũgaacirithia andũ a gũkũ thĩ-rĩ, githĩ mũtikĩrĩ na ũhoti wa gũtua macira marĩa manini
Kaĩ inyuĩ mũtoĩ atĩ nĩ ithuĩ tũgaatuĩra araika cira? Ĩ maũndũ ma mũtũũrĩre ũyũ-rĩ, githĩ tũtiagĩrĩirwo nĩ kũmacira makĩria!
Nĩ ũndũ ũcio kũngĩkorwo na mũndũ wanyu ũhĩtĩirio maũndũ-inĩ ta macio-rĩ, no mũthure o na andũ matangĩtĩĩka ũngano-inĩ matuĩke a kũmũcirithia!
Ndoiga ũguo nĩguo ndĩmũconore. Kwahoteka atĩa atĩ thĩinĩ wanyu gũtirĩ mũndũ mũũgĩ ũngĩhota gũtuithania etĩkia erĩ cira mangĩhĩtania?
No handũ ha ũguo-rĩ, mũrũ kana mwarĩ wa Ithe witũ atwaraga ũrĩa ũngĩ igooti-inĩ, na nĩ igooti-inĩ rĩa arĩa matetĩkĩtie!
Gũkorwo mũrĩ na macira gatagatĩ-inĩ kanyu nĩ kuonania atĩ nĩ mũhootetwo biũ. Githĩ ti kaba mwĩtĩkagĩre gwĩkwo ũũru? Githĩ ti kaba mwĩtĩkagĩre kũhenio?
Handũ ha ũguo-rĩ, nĩ mũhenanagia na mũgekana ũũru, na acio mwĩkaga ũguo-rĩ, nĩ ariũ na aarĩ a Ithe wanyu.
Kaĩ inyuĩ mũtoĩ atĩ andũ arĩa aaganu matikagaya ũthamaki wa Yahweh? Mũtikanaheneke: Gũtirĩ ahũri maraya, kana ahoi mĩhianano, kana itharia, kana arũme arĩa metuaga ta aka, kana arũme arĩa makomaga na arũme arĩa angĩ kĩĩmwĩrĩ,
kana aici, kana andũ arĩa akoroku, kana arĩu, kana acambania, o na kana atunyani makaagaya ũthamaki wa Yahweh
Na ũguo nĩguo amwe anyu mwatariĩ. No nĩ mwathambirio, na mũkĩamũrĩrwo Yahweh, na mũgĩtuwo athingu thĩinĩ wa rĩĩtwa rĩa Mwathi Yahshua Messiya o na nĩ ũndũ wa Roho wa Kĩhoti witũ.
“Niĩ ndirigĩrĩirio gwĩka ũndũ o wothe,” no ti ũndũ o wothe ũrĩ kĩguni. “Niĩ ndirigĩrĩirio gwĩka ũndũ o wothe,” no ndingĩathwo nĩ ũndũ o na ũrĩkũ.
“Irio nĩ cia nda na nda nĩ ya irio,” no Yahweh nĩ agacinina cierĩ. Mwĩrĩ ti wa kũhũthĩrwo na ũmaraya, no nĩ wa gũtungata Yahweh, nake Yahweh aathage mwĩrĩ ũcio.
Yahweh nĩ ariũkirie Yahshua kuuma kũrĩ arĩa akuũ nĩ ũndũ wa hinya wake, na o na ithuĩ nĩ agatũriũkia na hinya o ro ũcio.
Kaĩ inyuĩ mũtoĩ atĩ mĩĩrĩ yanyu nĩ ciĩga cia Messiya we mwene? Nĩ ũndũ ũcio, no ngĩoye ciĩga icio cia Messiya nĩguo ndĩcinyitithanie na mũmaraya? Kũroaga gũtuĩka ũguo!
Kaĩ inyuĩ mũtoĩ atĩ mũndũ ũrĩa wĩnyitithanagia na mũmaraya, matuĩkaga mwĩrĩ ũmwe nake? Nĩgũkorwo nĩ kwĩrĩtwo atĩrĩ, “Acio erĩ magaatuĩka mwĩrĩ ũmwe.”
No mũndũ ũrĩa wĩnyitithanagia na Yahweh atuĩkaga ũmwe nake thĩinĩ wa roho.
Ũragĩrai mehia ma ũmaraya. Mehia marĩa mangĩ mothe mekagwo nĩ mũndũ marĩ nja ya mwĩrĩ wake, no mũndũ ũrĩa ũhũraga ũmaraya-rĩ, nĩ mwĩrĩ wake mwene ehagĩria.
Kaĩ inyuĩ mũtoĩ atĩ mĩĩrĩ yanyu nĩ hekarũ ya Roho Mwamũre ũrĩa ũrĩ thĩinĩ wanyu, ũrĩa mwaheirwo nĩ Yahweh? Inyuĩ mũtirĩ anyu inyuĩ ene;
inyuĩ mwagũrirwo na thogora. Nĩ ũndũ ũcio-rĩ, tĩithagiai Yahweh na mĩĩrĩ yanyu.