Akorinitho wa Mbere 7
Na rĩrĩ, ha ũhoro wa maũndũ marĩa mwanyandĩkĩire marũa nĩ ũndũ wamo, ngũmwĩra atĩrĩ: Nĩ wega mũndũ mũrũme kwaga kũhikania.
No tondũ wa ũrĩa ũmaraya ũingĩhĩte-rĩ, o mũndũ mũrũme nĩ agĩrĩirwo nĩ kũgĩa na mũtumia wake mwene, na mũndũ-wa-nja agĩe na mũthuri wake mwene.
Mũthuri nĩ agĩrĩirwo nĩ kũhingagĩria mũtumia wake bata wake wa kĩhiko, o nake mũtumia ahingagĩrie mũthuriwe bata wake.
Mũtumia ndangĩĩathĩra mwĩrĩ wake mwene, tondũ nĩ wake na mũthuriwe. Ũguo no taguo mũthuri atangĩĩathĩra mwĩrĩ wake mwene, tondũ nĩ wake na mũtumia wake.
Tigagai kũimana, o tiga rĩrĩa mũngĩkorwo mũiguanĩire, naguo gũkorwo nĩ kwa ihinda, nĩgetha mũgĩage na ihinda rĩa kũhoya. Thutha ũcio no mũcoke hamwe rĩngĩ, nĩguo Shaitani ndakamũgerie tondũ wanyu kũremwo kwĩgirĩrĩria.
Ũhoro ũcio ndawaaria ta arĩ rũtha ngũheana, no ti gwathana ngwathana.
No nyende andũ othe mahaane ta ũrĩa niĩ ndariĩ. No o mũndũ aheetwo kĩheo gĩake mwene kuuma kũrĩ Yahweh; mũndũ ũmwe aheetwo kĩheo gĩkĩ, na ũrĩa ũngĩ akaheo kĩrĩa kĩngĩ.
Na rĩrĩ, nĩ ũndũ wa andũ arĩa matahikanĩtie na atumia a ndigwa, nguuga ũũ: Nĩ wega maikare o ũguo matahikanĩtie, o ta ũrĩa niĩ ndariĩ.
No angĩkorwo matingĩhota kwĩgirĩrĩria-rĩ, nĩ mahike na mahikanie, tondũ nĩ kaba kũhikania gũkĩra gũikara makĩhĩahĩaga.
Kũrĩ andũ arĩa mahikĩte na makahikania-rĩ, ngwathana ũũ, no ti niĩ, nĩ Yahweh ũgwathana: Mũtumia ndakanatigane na mũthuriwe
No aangĩka ũguo-rĩ, nĩ agĩikare atarĩ mũhiku, kana akorwo ti ũguo, acokerere mũthuriwe. Ningĩ mũthuri ndakanaingate mũtumia wake.
Nĩ ũndũ wa acio angĩ nguuga ũũ, no nĩ niĩ ndĩroiga, ti Yahweh: Angĩkorwo mũrũ wa Ithe witũ arĩ na mũtumia ũtetĩkĩtie, na mũtumia ũcio etĩkĩre matũũranie-rĩ, nĩ atige kũmũingata
Nake mũtumia angĩkorwo arĩ na mũthuri ũtetĩkĩtie, na mũthuri ũcio etĩkĩre matũũranie-rĩ, nĩ atige kũmũingata.
Nĩgũkorwo mũthuri ũrĩa ũtetĩkĩtie nĩ amũrĩtwo nĩ ũndũ wa mũtumia wake, nake mũtumia ũrĩa ũtarĩ mwĩtĩkia nĩ amũrĩtwo nĩ ũndũ wa mũthuri wake mwĩtĩkia. Kũngĩaga gũtuĩka ũguo-rĩ, ciana cianyu no ituĩke ti nyamũre, no ũrĩa kũrĩ rĩu nĩ atĩ nĩ nyamũre.
No rĩrĩ, mũndũ ũcio ũtetĩkĩtie angĩthiĩ-rĩ, nĩ arekwo athiĩ. Nĩgũkorwo mũndũ mũrũme, kana mũndũ-wa-nja ũrĩa wĩtĩkĩtie ti muohe nĩ ũhoro ta ũcio; Yahweh atwĩtĩte tũtũũranagie na thayũ.
Wee mũtumia-rĩ, ũũĩ atĩa kana nĩwe ũkaahonokia mũthuri waku? O na wee mũthuri-rĩ, ũũĩ atĩa kana nĩwe ũkaahonokia mũtumia waku?
No rĩrĩ, mũndũ o mũndũ nĩ aikare mũtũũrĩre ũrĩa Yahweh aamũgaĩire, o ũrĩa Yahweh aamwĩtĩire. Ũyũ nĩguo watho ũrĩa ngwatha maũngano mothe.
Mũndũ angĩkorwo eetirwo arĩ mũruu-rĩ, nĩ atige gũikara ta atarĩ mũruu. Mũndũ ũrĩa ũtaarĩ mũruu rĩrĩa eetirwo nĩ atige kũrua.
Kũrua gũtirĩ bata; o na kwaga kũrua gũtirĩ bata. Ũndũ ũrĩa ũrĩ bata nĩ kũmenyerera Maathani ma Yahweh.
O mũndũ nĩ aikarage o ũrĩa aatariĩ rĩrĩa Yahweh aamwĩtire.
Wee warĩ ngombo rĩrĩa wetirwo? Ũndũ ũcio ndũgagũtange, no korwo wahota kuona njĩra ya kuuma ũkombo-inĩ-rĩ, gerera yo.
Nĩgũkorwo mũndũ ũrĩa warĩ ngombo rĩrĩa Yahweh aamwĩtire-rĩ, ũcio nĩ mũndũ wa Yahweh ũtarĩ ngombo; ningĩ no taguo, ũrĩa warĩ mũndũ muohore rĩrĩa Yahweh aamwĩtire-rĩ, ũcio nĩ ngombo ya Messiya.
Inyuĩ mwagũrirwo goro; mũtigatuĩke ngombo cia andũ
Ariũ na aarĩ a Ithe witũ, o ũndũ ũrĩa mũndũ eehokeirwo nĩ Yahweh-rĩ, nĩ aikarage o ũguo ũndũ ũcio Yahweh aamwĩtĩire.
Rĩu-rĩ, ũhoro wĩgiĩ airĩtu nĩ ũyũ: Ndirĩ na watho uumĩte kũrĩ Yahweh, no nĩ ngũheana itua rĩakwa ta mũndũ mwĩhokeku nĩ ũndũ wa kũiguĩrwo tha nĩ Yahweh.
Nĩ ũndũ wa mathĩna ma mahinda maya-rĩ, nguona arĩ wega mũikarage o ũrĩa mũndũ atariĩ.
Wee nĩ ũhikanĩtie? Ndũkaingate mũkaguo! Wee nawe hihi ndũhikanĩtie? Tiga kũhikania.
No ũngĩhikania-rĩ, wee ndwĩhĩtie; o na mũirĩtu angĩhika-rĩ, o nake ndehĩtie. No andũ arĩa marahika kana makahikania-rĩ, nĩ marĩonaga mathĩna maingĩ mũtũũrĩre-inĩ ũyũ, na nĩmo ndĩrenda kũmũrigĩrĩria.
Ũndũ ũrĩa ndĩrenda kuuga, ariũ na aarĩ a Ithe witũ, nĩ atĩ ihinda nĩ inini. Kuuma rĩu andũ arĩa marĩ na aka nĩ kwagĩrĩire maikarage ta matarĩ nao;
arĩa maracakaya nĩ maikarage ta mataracakaya; nao arĩa makenete nĩ maikarage ta matakenete; o na arĩa mekũgũra indo, nĩ maikarage ta matarĩ kĩndũ marĩ.
nao arĩa mahũthagĩra indo cia thĩ ĩno, nĩ maikarage ta matohanĩtio nacio. Nĩgũkorwo ũrĩa thĩ ĩno ĩhaana rĩu-rĩ, nĩ gũthira ĩrathira.
Niĩ ingĩenda inyuĩ mũikarage mũtegwĩtanga. Mũndũ ũrĩa ũtahikanĩtie etangaga na maũndũ ma Yahweh, na eciragia o ũrĩa angĩkenia Yahweh
No mũndũ ũrĩa ũhikanĩtie etangaga na maũndũ ma gũkũ thĩ, na eciragia o ũrĩa angĩkenia mũtumia wake,
naguo wendi wa ngoro yake nĩ mũgayũkanu. Mũndũ-wa-nja ũtarĩ mũhiku kana mũirĩtu etangaga na maũndũ ma Yahweh: Muoroto wake nĩ kwĩheana harĩ Yahweh mwĩrĩ na roho. No mũndũ-wa-nja mũhiku etangaga na maũndũ ma thĩ ĩno, na eciragia o ũrĩa angĩkenia mũthuriwe.
Ndĩramwarĩria maũndũ maya nĩgetha mũgunĩke, ti atĩ nĩguo ndĩmũrigĩrĩrie, no nĩgetha mũikarage na mĩthiĩre ĩrĩa yagĩrĩire, mwĩheanĩte biũ harĩ Yahweh mũtekũgucĩrĩrio nĩ maũndũ mangĩ.
Mũndũ o wothe angĩona atĩ nĩ arahĩtĩria mũirĩtu ũrĩa orĩtie, nake mũirĩtu ũcio akorwo matukũ make ma ũirĩtu wake nĩ marahĩtũka-rĩ, mũndũ ũcio angĩigua nĩ agĩrĩirwo nĩ kũhikania-rĩ, nĩ eke o ũguo ekwenda. Ti kwĩhia ekwĩhia. Nĩ magĩrĩirwo mahikanie
No rĩrĩ, ũrĩa ũtuĩte na ngoro yake atekũringĩrĩrio, no nĩwe mwene wĩyendeire, na agatua itua atĩ ndekũhikia mũirĩtu ũcio-rĩ, mũndũ ũcio o nake nĩ ekĩte ũrĩa kwagĩrĩire.
Nĩ ũndũ ũcio-rĩ, mũndũ ũrĩa ũhikagia mũirĩtu ũrĩa orĩtie nĩ ekaga ũrĩa kwagĩrĩire, no ũrĩa ũngĩaga kũmũhikia nĩ ekaga wega makĩria.
Mũtumia nĩ ohanĩtio na mũthuriwe rĩrĩa rĩothe mũthuriwe arĩ muoyo. No mũthuriwe angĩkua, nĩ muohore na no ahikĩre mũndũ o ũrĩa angĩenda, no mũndũ ũcio no nginya akorwo nĩ etĩkĩtie Yahweh.
No itua rĩakwa nĩ atĩrĩ, mũtumia ũcio angĩaga kũhika rĩngĩ, no akorwo arĩ na gĩkeno makĩria. Na ngwĩciria atĩ niĩ o na niĩ ndĩ na Roho wa Yahweh.