Akorinitho wa Mbere 8

Na rĩrĩ, ũhoro wa irio iria ikoragwo irutĩirwo mĩhianano-rĩ, nĩ tũũĩ atĩ ithuothe tũrĩ na ũmenyo ũhoro-inĩ ũcio. Ũmenyo nĩ ũtũmaga mũndũ etũũgĩrie, no wendo nĩ gwaka wakaga.

Mũndũ ũrĩa wĩciragia atĩ nĩ oĩ ũndũ-rĩ, ndoĩ ũndũ ũcio wega ta ũrĩa aagĩrĩirwo nĩ kũũmenya.

No mũndũ ũrĩa wendete Yahweh, ũcio nĩwe ũũĩo nĩ Yahweh.

Nĩ ũndũ ũcio, ha ũhoro ũkoniĩ kũrĩa irio iria irutĩirwo mĩhianano-rĩ, nĩ tũũĩ atĩ gũkũ thĩ mũhianano nĩ kĩndũ gĩa tũhũ, na atĩ gũtirĩ Yahweh ũngĩ tiga o ũrĩa ũmwe.

Tondũ o na kũngĩkorwo nĩ kũrĩ indo ciĩtagwo Elohim, irĩ kũũrĩa igũrũ kana irĩ gũkũ thĩ-rĩ, amu ti-itherũ nĩ kũrĩ na “Elohim” nyingĩ na “Adonai” aingĩ,

no harĩ ithuĩ-rĩ, Yahweh no ũmwe, na nĩwe Ithe witũ, na indo ciothe cioimire kũrĩ we na tũtũũraga muoyo nĩ ũndũ wake; na kũrĩ na Mwathi o ũmwe, nake nĩwe Yahshua Messiya, o we ũrĩa indo ciothe ciagĩire nĩ ũndũ wake, na nowe ũtũtũũragia muoyo.

No ti andũ othe moĩ ũguo. Andũ amwe nĩ ũndũ wa ũrĩa matũũrĩte mamenyerete mĩhianano, o na hĩndĩ ĩrĩa mekũrĩa irio ta icio meciragia atĩ nĩ irutĩirwo mũhianano, na tondũ thamiri ciao itirĩ hinya-rĩ, makanyitwo nĩ thahu.

No irio iria tũrĩaga itingĩtũma tũkuhĩrĩrie Yahweh; tũtingĩthũkio nĩ kwaga gũcirĩa, na tũtingĩagĩrio nĩ gũcirĩa.

O na kũrĩ ũguo-rĩ, menyererai atĩ wĩyathi ũcio wanyu ndũgatuĩke mũhĩnga kũrĩ arĩa matarĩ na hinya

Nĩgũkorwo mũndũ o wothe ũrĩ na thamiri ĩtarĩ na hinya, angĩmuona inyuĩ mũrĩ na ũmenyo ũyũ mũkĩrĩĩra irio thĩinĩ wa hekarũ ya mũhianano-rĩ, githĩ ndangĩũmĩrĩria arĩe kĩrĩa kĩrutĩirwo mĩhianano?

Nĩ ũndũ ũcio-rĩ, mũrũ kana mwarĩ wa Ithe witũ ũcio thamiri yake ĩtarĩ na hinya, o ũcio Messiya aakuĩrĩire-rĩ, agathũkio nĩ ũmenyo wanyu.

Hĩndĩ ĩrĩa mwehĩria ariũ na aarĩ a Ithe witũ na njĩra ĩyo, na mũgatiihia thamiri ciao icio itarĩ hinya-rĩ, nĩ Messiya mwehĩria.

Nĩ ũndũ ũcio, angĩkorwo kĩrĩa ndĩrarĩa no gĩtũme mũrũ kana mwarĩ wa Ithe witũ agũe mehia-inĩ-rĩ, ndikĩagĩrĩirwo nĩ kũrĩa nyama rĩngĩ, nĩguo ndigatũme agũe.