Akorinitho wa Mbere 9

Githĩ niĩ ndirĩ na wĩyathi? Githĩ niĩ ndirĩ mũtũmwo? Githĩ niĩ ndionire Yahshua Mwathi witũ? Anga inyuĩ mũtirĩ maciaro ma wĩra wakwa thĩinĩ wa Yahweh

O na angĩkorwo andũ arĩa angĩ mationaga ta ndĩ mũtũmwo-rĩ, ti-itherũ niĩ harĩ inyuĩ ndĩ mũtũmwo! Nĩgũkorwo nĩ inyuĩ mũhũri wa ũtũmwo wakwa thĩinĩ wa Yahweh.

Gwĩtetera gwakwa harĩ arĩa manjiirithagia nĩ gũkũ:

Githĩ ithuĩ tũtirĩ na kĩhooto gĩa kũrĩa na kũnyua

Githĩ ithuĩ tũtirĩ na kĩhooto kĩa mũndũ gũtwarana rũgendo-inĩ na mũtumia wake mwĩtĩkia, o ta ũrĩa atũmwo arĩa angĩ, na ariũ a nyina na Yahshua, o na Kepha mekaga

Kana no niĩ tũrĩ na Bar-Anaba arĩ o nginya tũrutage wĩra nĩguo tuone ũteithio witũ?

Nũ ũtungataga ta mũthigari na akeerĩha na indo ciake we mwene? Nĩ mũndũ ũrĩkũ ũhandaga mũgũnda wa mĩthabibũ na ndarĩe thabibũ cia mũgũnda ũcio? Ningĩ-rĩ, nĩ kũrĩ mũndũ ũrĩithagia rũũru na ndanyue iria rĩa rũũru rũu?

Ndĩraaria ũhoro ũyũ ndĩ na meciria ma ũ-mũndũ tu? Githĩ Watho o naguo nduugĩte o ũguo?

Nĩgũkorwo nĩ kwandĩkĩtwo Watho-inĩ wa Musa atĩrĩ, “Ndũkanohe ndegwa kanua hĩndĩ ĩrĩa ĩkũranga ngano ĩkĩmĩhũra.” Yahweh akiuga ũguo-rĩ, nĩ ndegwa aracaĩra?

Ti-itherũ oigaga ũguo nĩ ũndũ witũ, githĩ tiguo? Ĩĩ-ni, ũndũ ũyũ waandĩkirũo nĩ ũndũ witũ, tondũ rĩrĩa mũrĩmi ekũrĩma, nake mũhũri ngano amĩhũrage-rĩ, nĩ kwagĩrĩire mekage ũguo marĩ na kĩĩrĩgĩrĩro atĩ nĩ makagayana magetha.

Tũngĩkorwo ithuĩ nĩ tũhandĩte mbeũ ya kĩĩroho thĩinĩ wanyu-rĩ, kaĩ akĩrĩ ũndũ mũnene ithuĩ tũngĩgetha indo cia gũtũũria mwĩrĩ kuuma kũrĩ inyuĩ?

Angĩkorwo andũ angĩ marĩ na kĩhooto gĩa gũteithio nĩ inyuĩ-rĩ, ithuĩ githĩ tũtikĩagĩrĩirwo nĩ gũteithio makĩria? No ithuĩ tũtiahũthĩrire kĩhooto kĩu. Handũ ha ũguo-rĩ, nĩ gũkirĩrĩria tũkiragĩrĩria ũndũ o wothe nĩguo tũtikae kũhĩngĩca Ũhoro-ũrĩa-Mwega wa Messiya.

Kaĩ inyuĩ mũtoĩ atĩ andũ arĩa marutaga wĩra thĩinĩ wa hekarũ marutaga irio ciao kuuma kũu hekarũ, nao arĩa matungataga kĩgongona-inĩ magayanaga kĩrĩa kĩrutĩtwo kĩgongona-inĩ?

O ta ũguo-rĩ, Yahweh nĩ athanĩte atĩ arĩa mahunjagia Ũhoro-ũrĩa-Mwega nĩ magĩrĩirwo kuonaga gĩa kũmatũũria kuuma kũrĩ Ũhoro-ũrĩa-Mwega.

No niĩ ndirĩ ndahũthĩra kĩhooto o na kĩmwe gĩa cio. Ningĩ ndiraandĩka ũhoro ũyũ ndĩ na kĩĩrĩgĩrĩro atĩ nĩ mũkũnjĩka maũndũ ta macio. Nĩ kaba ngue gũkĩra mũndũ o naũ agirie ndĩĩrahĩre ũndũ ũcio.

No rĩrĩ, ndingĩhota kwĩraha rĩrĩa ngũhunjia Ũhoro-ũrĩa-Mwega, nĩgũkorwo nĩ hatagĩrĩrio mũno ndĩũhunjie. Na niĩ ingĩaga kũhunjia Ũhoro-ũrĩa-Mwega kaĩ ndagĩa na haaro-ĩ!

Ingĩhunjia nĩ ũndũ wa kwĩyendera-rĩ, ndaheo mũcara; no angĩkorwo ti na ũndũ wa kwĩyendera-rĩ, niĩ no kũhingia ndĩrahingia ũndũ ũrĩa ndĩhokeirwo.

Hakĩrĩ ũguo-rĩ, mũcara wakwa ũkĩrĩ kĩ? Nĩ atĩrĩ: Atĩ harĩ ũhoro wa kũhunjia Ũhoro-ũrĩa-Mwega-rĩ, hunjagie tũhũ itekũrĩhwo, na nĩ ũndũ ũcio njage gwĩtagia kĩhooto gĩakwa rĩrĩa ngũhunjia Ũhoro-ũrĩa-Mwega.

O na gũtuĩka ndĩ muohore na ndirĩ ngombo ya mũndũ-rĩ, niĩ ndĩĩtuaga ngombo ya o mũndũ wothe, nĩguo nguucĩrĩrie andũ aingĩ o ta ũrĩa kwahoteka.

Kũrĩ Ayahudi ndaatuĩkire ta Mũyahudi nĩguo nguucagĩrĩrie Ayahudi. Na kũrĩ arĩa marĩ rungu rwa Watho-rĩ, ndaatuĩkire ta mũndũ ũrĩ rungu rwa Watho, o na gũtuĩka niĩ mwene ndirĩ rungu rwa Watho, nĩguo nguucagĩrĩrie arĩa marĩ rungu rwa Watho.

Kũrĩ arĩa matarĩ Watho-inĩ-rĩ, ndaatuĩkire ta mũndũ ũtarĩ Watho-inĩ ũcio, o na gũtuĩka ndirĩ muohore kuuma kũrĩ Watho wa Yahweh, no ndĩ Watho-inĩ wa Messiya, nĩguo nguucagĩrĩrie arĩa matarĩ Watho-inĩ ũcio.

Kũrĩ arĩa matarĩ hinya-rĩ, ndaatuĩkire ta itarĩ hinya nĩguo nguucagĩrĩrie arĩa matarĩ hinya. Nduĩkĩte maũndũ mothe kũrĩ andũ othe nĩgetha kũngĩhoteka na njĩra ciothe ngerie kũhonokia amwe ao.

Njĩkaga maũndũ maya mothe nĩ ũndũ wa Ũhoro-ũrĩa-Mwega, nĩgetha ngaagaĩrwo irathimo ciaguo.

Kaĩ inyuĩ mũtoĩ atĩ andũ arĩa mahĩtahĩtanaga ihenya-inĩ mahanyũkaga othe, no rĩrĩ, no ũmwe wao ũheagwo kĩheo? Kĩhanyũkei na njĩra ĩrĩa ĩngĩtũma mũkaaheo kĩheo

Mũndũ o wothe ũrĩa ũhĩtahĩtanaga thĩinĩ wa mathako-rĩ, ehataga na akemenyeria maũndũ-inĩ mothe hatarĩ itherũ. Mekaga ũguo nĩguo maheo thũmbĩ ĩtarĩ ya gũtũũra; no ithuĩ twĩkaga ũguo nĩguo tũkaaheo thũmbĩ ya gũtũũra nginya tene.

Nĩ ũndũ ũcio-rĩ, niĩ ndihanyũkaga ta mũndũ ũtoĩ gĩtũmi gĩa kũhanyũka; na ndirũaga ta mũndũ ũgũikia ngundi ciake agũthe rũhuho.

Aca, nĩ mwĩrĩ wakwa nduukaga ngaũtua ngombo yakwa, nĩgetha ndaarĩkia kũhunjĩria andũ arĩa angĩ-rĩ, niĩ mwene ndikanatuĩke wa kũregwo nyimwo kĩheo.