Akorinitho wa Mbere 10
Na rĩrĩ, ariũ na aarĩ a Ithe witũ, ndikwenda mũkorwo mũtoĩ ũndũ ũyũ, atĩ maithe maitũ ma tene othe maatongoragio nĩ itu, na atĩ othe nĩ maringire iria
Othe nĩ mabatithirio matuĩke andũ a Musa marĩ rungu rwa itu rĩu, o na marĩ iria-inĩ rĩu.
Na othe maarĩaga irio o imwe cia kĩĩroho,
na maanyuaga maĩ o mamwe ma kĩĩroho; nĩgũkorwo maanyuire kuuma rwaro-inĩ rwa ihiga rwa kĩĩroho rũrĩa rwatwaranaga nao, naruo rwaro rũu rwarĩ Messiya.
O na kũrĩ ũguo-rĩ, aingĩ ao matiigana gũkenia Yahweh; nao makĩng'aũranĩrio werũ-inĩ.
Na rĩrĩ, maũndũ macio meekĩkire marĩ ta cionereria, nĩgetha ngoro ciitũ itikerirĩrie gwĩka maũndũ moru ta macio mekire.
Mũtigatuĩke ahoi mĩhianano, ta ũrĩa amwe ao maatariĩ; o ta ũrĩa kwandĩkĩtwo atĩrĩ: “Andũ acio magĩikara thĩ kũrĩa na kũnyua, magĩcoka magĩũkĩra kũina na gwĩkenia.”
Ningĩ tũtikahũre ũmaraya, ta ũrĩa amwe ao mekire, nao magĩkua andũ ngiri mĩrongo ĩĩrĩ na ithatũ mũthenya ũmwe.
O na ningĩ tũtikanagerie Yahweh, ta ũrĩa amwe ao mekire, nao makĩninwo nĩ nyoka.
Na mũtikae kũng'ong'oira, ta ũrĩa amwe ao mekire, nao makĩũragwo nĩ mũraika ũrĩa mũninani.
Maũndũ macio meekĩkire kũrĩ o marĩ cionereria, na makĩandĩkwo marĩ ma gũtũkaania, ithuĩ tũkinyĩrĩirwo nĩ kũhingio kwa mahinda.
Nĩ ũndũ ũcio, ũngĩĩra nĩ ũrũgamĩte wega-rĩ, menyerera ndũkae kũgũa!
Mũtirĩ mwagerio na magerio mangĩ tiga o marĩa makoraga andũ. Nake Yahweh nĩ mwĩhokeku; ndangĩĩtĩkĩra mũgerio na magerio marĩa mũtangĩhota gwĩtiiria. No rĩrĩa mũkũgerio-rĩ, nĩ arĩmuonagĩrĩria njĩra ya kũũrĩra nĩguo mũhotage gwĩtiiria magerio macio.
Nĩ ũndũ ũcio, arata akwa endwa, ũragĩrai ũhoro wa kũhoya mĩhianano.
Ndĩraarĩria andũ ogĩ; mwĩkũũranĩrei ũrĩa ndĩroiga.
Gĩkombe gĩa gũcokia ngatho kĩrĩa tũcokagia ngatho nĩ ũndũ wakĩo-rĩ, githĩ ti kũgwatanĩra thakame ya Messiya? Na githĩ mũgate ũrĩa twenyũraga ti kũgwatanĩra mwĩrĩ wa Messiya
Na tondũ mũgate ũcio nĩ ũmwe-rĩ, ithuĩ, o na tũrĩ aingĩ, tũrĩ o mwĩrĩ ũmwe, nĩgũkorwo ithuĩ othe tũrĩaga mũgate o ũcio ũmwe.
Ta mwĩcũraniei ũhoro wa andũ a Isiraeli: Arĩa marĩaga irio cia igongona-rĩ, githĩ matigwatanagĩra kĩgongona kĩu?
Ndĩrenda kuuga atĩa? Atĩ kĩrĩa kĩrutĩirwo mũhianano nĩ kĩndũ kũrĩ, kana atĩ mũhianano guo mwene nĩ kĩndũ kũrĩ?
Aca! Ũrĩa ndĩroiga nĩ atĩ magongona ma andũ arĩa matarĩ na kwĩyamũrĩra Yahweh marutagĩrwo ndaimono, na ti Yahweh, na ndikwenda mũgĩe ngwatanĩro na ndaimono.
Mũtingĩhota kũnyuĩra gĩkombe kĩa Yahweh, na mũnyuĩre gĩkombe kĩa ndaimono o nakĩo; mũtingĩhota kũgwatanĩra metha-inĩ ya Yahweh, na mũgwatanĩre metha-inĩ ya ndaimono.
Kaĩ tũrageria kwarahũra ũiru wa Yahweh? Kaĩ tũrĩ na hinya kũmũkĩra?
“Niĩ ndirigĩrĩirio gwĩka ũndũ,” no ti ũndũ o wothe ũrĩ na kĩguni. “Niĩ ndirigĩrĩirio gwĩka ũndũ,” no ti ũndũ o wothe ũrĩ na uumithio.
Gũtirĩ mũndũ wagĩrĩirwo nĩ gũcaragia maũndũ ma kwĩguna we mwene, no nĩ acaragie maũndũ ma kũguna andũ arĩa angĩ.
Rĩagai kĩrĩa gĩothe kĩendagio thoko-inĩ ya nyama mũtekwĩyũria ciũria nĩ ũndũ wa mwĩcuko wa thamiri,
nĩgũkorwo, “Thĩ nĩ ya Yahweh, na kĩrĩa gĩothe kĩrĩ thĩinĩ wayo.”
Mũndũ ũtarĩ mwĩtĩkia angĩmwĩta mũkarĩe irio gwake, na inyuĩ mũkorwo nĩ mũkwenda gũthiĩ-rĩ, rĩa irio ciothe iria mũngĩheo mũtekwĩyũria ciũria cia mwĩcuko wa thamiri
No mũndũ angĩmwĩra atĩrĩ, “Irio ici irutĩtwo irĩ igongona,” mũtigacirĩe, nĩ ũndũ wa mũndũ ũcio wamwĩra ũguo, o na nĩ ũndũ wa mwĩcuko wa thamiri, nĩgũkorwo “Thĩ nĩ ya Yahweh, na kĩrĩa gĩothe kĩrĩ thĩinĩ wayo”;
ngiuga ũguo ti thamiri yaku ndagweta, no nĩ thamiri ya mũndũ ũcio ũngĩ. Nĩ ũndũ-rĩ, wĩyathi wakwa ũgũcirithio nĩkĩ nĩ ũndũ wa thamiri ya mũndũ ũngĩ?
Ingĩrĩanĩra irio na andũ angĩ ndĩ na ngatho-rĩ, nĩ kĩ gĩgũtũma njambio nĩ ũndũ wa kĩndũ kĩu njokeirie Yahweh ngatho nĩ ũndũ wakĩo?
Nĩ ũndũ ũcio, rĩrĩa mũkũrĩa kana rĩrĩa mũkũnyua, o na kana mũgĩĩka ũndũ o wothe-rĩ, wĩkagei nĩ ũndũ wa kwenda kũgoocithia Yahweh.
Tigai gwĩka ũndũ ũngĩhĩngithia mũndũ, arĩ Mũyahudi, kana arĩ Mũyunani, o na kana ũhĩngithie Ũngano wa Yahweh,
o ta ũrĩa niĩ ngeragia gũkenia andũ othe na njĩra o yothe. Nĩgũkorwo ndicaragia ũndũ wa kwĩguna niĩ mwene, no njaragia ũrĩa ingĩguna andũ aingĩ, nĩguo mahonoke.