Akorinitho wa Mbere 11
Mwĩgerekaniei na niĩ, ta ũrĩa ndĩgerekanagia na Messiya.
Nĩ ngũmũgaathĩrĩria nĩ ũndũ wa kũndirikana maũndũ-inĩ mothe, na nĩ ũndũ wa gũtũũra mũrũmĩtie morutani macio, o ta ũrĩa ndamũrutire.
Rĩu-rĩ, nĩ ngwenda mũmenye atĩ mũtwe wa mũndũ mũrũme o wothe nĩ Messiya, na mũtwe wa mũndũ-wa-nja nĩ mũndũ mũrũme, na mũtwe wa Messiya nĩ Yahweh.
Mũndũ mũrũme o wothe ũrĩa ũhoyaga kana akaratha ehumbĩrĩte mũtwe-rĩ, nĩ mũtwe wake aconorithagia.
Nake mũndũ-wa-nja o wothe ũrĩa ũhoyaga kana akaratha atahumbĩrĩte mũtwe wake-rĩ, nĩ mũtwe wake aconorithagia, tondũ ũguo no ũndũ ũmwe na kwenjwo.
Angĩkorwo mũndũ-wa-nja ndekũhumbĩra mũtwe wake-rĩ, nĩ akĩenje njuĩrĩ yake; na angĩkorwo kũrenga njuĩrĩ kana kwenjwo nĩ ũndũ wa gũconora mũndũ-wa-nja-rĩ, nĩ akĩĩhumbĩre mũtwe.
Mũndũ mũrũme ndaagĩrĩirwo nĩ kũhumbĩra mũtwe wake, kuona atĩ nĩwe mũhianĩre wa Yahweh, na nĩ riri wa Yahweh; no mũndũ-wa-nja nĩwe riri wa mũndũ mũrũme.
Nĩgũkorwo mũndũ mũrũme ndoimire harĩ mũndũ-wa-nja, no nĩ mũndũ-wa-nja woimire harĩ mũndũ mũrũme.
Mũndũ mũrũme-rĩ, tiwe wombirwo nĩ ũndũ wa mũndũ-wa-nja, no nĩ mũndũ-wa-nja wombirwo nĩ ũndũ wa mũndũ mũrũme
Nĩ ũndũ wa gĩtũmi gĩkĩ-rĩ, mũndũ-wa-nja agĩrĩirwo nĩgũkorwo na rũũri mũtwe rwa kuonania atĩ nĩ wa gwathwo nĩ ũndũ wa araika.
No ningĩ-rĩ, thĩinĩ wa Yahweh, mũndũ-wa-nja ndeiganĩtie mũndũ mũrũme atarĩ ho, nake mũndũ mũrũme ndeiganĩtie mũndũ-wa-nja atarĩ ho.
O ta ũrĩa mũndũ-wa-nja oimire harĩ mũndũ mũrũme-rĩ, no taguo mũndũ mũrũme aciaragwo nĩ mũndũ-wa-nja. No rĩrĩ, indo ciothe ciumaga kũrĩ Yahweh
Ta tuai arĩ inyuĩ: Nĩ kwagĩrĩire mũndũ-wa-nja kũhoya Yahweh atehumbĩrĩte mũtwe?
Kaĩ maũndũ ma ndũire matamũrutaga atĩ mũndũ mũrũme gũkorwo arĩ na njuĩrĩ ndaya nĩ ũndũ wa kũmũconorithia,
no mũndũ-wa-nja gũkorwo na njuĩrĩ ndaya, ũcio nĩ riri wake? Nĩgũkorwo aheetwo njuĩrĩ ndaya arĩ kĩndũ gĩa kũmũhumbĩra.
Angĩkorwo kũrĩ na mũndũ ũrĩ na ngarari na ũhoro ũyũ-rĩ, nĩ amenye atĩ ithuĩ tũtirĩ mũtugo ũngĩ, o na maũngano ma Yahweh matirĩ mũtugo ũngĩ.
Ũhoro-inĩ ũrĩa ngũmũtaarĩria rĩu-rĩ, ndirĩ na ũndũ wa kũmũgathĩra, nĩgũkorwo kũũngana kwanyu ti gwa kũmũguna no nĩ gwa kũmũthũkia.
Ũndũ wa mbere, njiguaga atĩ rĩrĩa muongana ta Ũngano, nĩ kũgĩaga na nyamũkano gatagatĩ kanyu, na ũhoro ũcio ndingĩaga gwĩtĩkia ũmwe waguo.
Hatarĩ nganja gũtingĩaga kũgĩa na ngarari gatagatĩ-inĩ kanyu cia kuonania arĩa anyu metĩkĩrĩkĩte nĩ Yahweh
Rĩrĩa muongana hamwe, ti Irio cia Mwathi mũrĩaga,
nĩgũkorwo rĩrĩa mũkũrĩa, o mũndũ athiaga na mbere kũrĩa ategweterera ũrĩa ũngĩ. Ũmwe aikaraga ahũtiĩ, nake ũrĩa ũngĩ agaikara arĩĩtwo.
Kaĩ mũtarĩ mĩciĩ mũngĩrĩĩra na mũnyuĩre kuo? Kana nĩ Ũngano wa Yahweh mũnyararĩte na mũkenda gũconoraga arĩa matarĩ kĩndũ? Ngũkĩmwĩra atĩa? No ndĩkĩmũgathĩrĩrie nĩ ũndũ wa ũhoro ũcio? Aca, ndingĩmũgathĩrĩria!
Nĩgũkorwo ũhoro ũrĩa ndaamũkĩrire kuuma kũrĩ Yahweh noguo ndamũkinyĩirie: Mwathi Yahshua, ũtukũ ũrĩa aakunyanĩirwo, nĩ ooire mũgate,
na aarĩkia gũcokia ngatho, akĩwenyũranga, akiuga atĩrĩ, “Ũyũ nĩ mwĩrĩ wakwa, ũrĩa ũheanĩtwo nĩ ũndũ wanyu; ĩkagai ũũ nĩguo mũndirikanage.”
Ningĩ o ũndũ ũmwe, thutha wa kũrĩa irio, akĩoya gĩkombe, akiuga atĩrĩ, “Gĩkombe gĩkĩ nĩ kĩrĩkanĩro kĩrĩa kĩerũ thĩinĩ wa thakame yakwa; ĩkagai ũũ, rĩrĩa rĩothe mũrĩkĩnyuagĩra, nĩguo mũndirikanage.”
Nĩgũkorwo rĩrĩa rĩothe mũkũrĩa mũgate ũyũ na mũkanyuĩra gĩkombe gĩkĩ-rĩ, nĩ kuumbũra mũkuumbũra gũkua kwa Mwathi o nginya hĩndĩ ĩrĩa agoka.
Nĩ ũndũ ũcio, mũndũ o wothe ũkũrĩa mũgate ũcio kana akanyuĩra gĩkombe kĩu kĩa Yahshua ũrĩa gũtaagĩrĩire-rĩ, nĩ kwĩhia ehĩirie mwĩrĩ na thakame ya Yahshua.
Mũndũ nĩ ambage gwĩtuĩria mbere ya kũrĩa mũgate ũcio na kũnyuĩra gĩkombe kĩu.
Nĩgũkorwo mũndũ ũrĩa wothe ũrĩaga na akanyua ategũkũũrana mwĩrĩ wa Mwathi, nĩ ituĩro rĩake we mwene etuagĩra.
Kĩu nĩkĩo gĩtũmĩte aingĩ anyu morũo nĩ hinya, na makaaga ũgima wa mwĩrĩ, na amwe anyu nĩ marĩkĩtie gũkoma
No tũngĩĩtuĩra cira ithuĩ ene, tũtingĩtuĩka a gũcirithio.
Hĩndĩ ĩrĩa tũgũtuĩrwo cira nĩ Yahweh-rĩ, nĩ kũherithio tũherithagio nĩgetha tũtikae gũtuĩrwo cira hamwe na thĩ.
Nĩ ũndũ ũcio, ariũ na aarĩ a Ithe witũ, rĩrĩa mũũnganĩte mũrĩanĩre-rĩ, etanagĩrĩrai.
Angĩkorwo mũndũ nĩ ahũtiĩ-rĩ, agĩrĩirwo nĩ kũrĩa irio gwake mũciĩ, nĩgetha rĩrĩa muongana gũtikagĩe ũhoro wa gũtuĩrwo cira. Nĩ ngaheana ũhoro wa maũndũ macio mangĩ rĩrĩa ngoka.