Akorinitho wa Mbere 12

Na rĩrĩ, ariũ na aarĩ a Ithe witũ, ha ũhoro wa iheo cia kĩĩroho-rĩ, ndikwenda mũikare mũrigĩtwo nĩguo.

Inyuĩ nĩ mũũĩ atĩ hĩndĩ ĩrĩa mũteetĩkĩtie Yahweh, nĩ mwagucagĩrĩrio na mũkerekerio kũrĩ mĩhianano ĩtangĩaria.

Nĩ ũndũ ũcio ngũmwĩra atĩ, gũtirĩ mũndũ waragia ahotithĩtio nĩ Roho wa Yahweh ũngiuga atĩrĩ, “Yahshua aronyitwo nĩ kĩrumi,” na gũtirĩ mũndũ ũngĩhota kuuga atĩrĩ, “Yahshua nĩ Mũthamaki,” atatongoretio nĩ Roho Mwamũre.

Na rĩrĩ, iheo iria iheanagwo nĩ mĩthemba mĩthemba, no Roho ũrĩa ũciheanaga no ũmwe

O na njĩra cia gũtungata nĩ mĩthemba mĩthemba, no Mwathi ũrĩa ũtungatagwo no ũmwe.

Ningĩ kũrĩ mĩrutĩre ya wĩra mĩthemba mĩthemba, no Yahweh no ũmwe ũrĩa ũhotithagia maũndũ mothe gwĩkĩka thĩinĩ wa andũ othe.

Na rĩrĩ, o mũndũ nĩ aheagwo ũndũ wa kuonania atĩ arĩ na Roho, naguo ũndũ ũcio nĩ wa kũguna andũ othe.

Roho ũcio nĩwe ũheaga mũndũ ũmwe ndũmĩrĩri ya ũũgĩ ũrĩa wa Ma, na ũngĩ akaheo ũmenyo nĩ Roho o ro ũcio,

nake ũngĩ akaheo wĩtĩkio nĩ Roho o ro ũcio, na ũngĩ akaheo iheo cia kũhonania nĩ Roho o ro ũcio,

nake ũngĩ akaheo hinya wa kũringa ciama, na ũngĩ akaheo ũrathi, na ũngĩ akaheo gũkũũrana maroho, na ũngĩ akaheo kwaria na thiomi mĩthemba mĩthemba, ningĩ ũngĩ akaheo ũhoti wa gũtaũra thiomi icio.

Maũndũ macio mothe nĩ wĩra wa Roho o ro ũcio ũmwe, nake agayagĩra o mũndũ o ũrĩa ekwenda.

Mwĩrĩ wa mũndũ nĩ ũmwe, o na gwatuĩka ũrĩ ciĩga nyingĩ; ningĩ o na gwatuĩka ciĩga ciaguo ciothe nĩ nyingĩ-rĩ, ciothe no mwĩrĩ o ũmwe. Ũguo noguo Messiya atariĩ.

Nĩgũkorwo ithuothe twabatithirio na Roho ũmwe tũgĩtuĩka a mwĩrĩ ũmwe, o na tũrĩ Ayahudi kana tũrĩ Ayunani, tũrĩ ngombo o na kana tũtarĩ ngombo, na ithuothe tũkĩnyuithio Roho o ro ũcio ũmwe.

Na rĩrĩ, mwĩrĩ ndũkoragwo na kĩĩga kĩmwe, no nĩ wa ciĩga nyingĩ

Kũgũrũ kũngiuga atĩ, “Tondũ ti niĩ guoko-rĩ, ndirĩ wa mwĩrĩ ũyũ,” Ũndũ ũcio ndũngĩtũma gũtige gũtuĩka kĩĩga kĩa mwĩrĩ ũcio

Nakuo gũtũ kũngiuga atĩ, “Tondũ ti niĩ riitho-rĩ, ndirĩ wa mwĩrĩ ũcio,” nĩ ũndũ wa gĩtũmi kĩu gũtingĩtiga gũtuĩka kĩĩga kĩa mwĩrĩ ũcio

Mwĩrĩ wothe ũngĩkorwo no riitho-rĩ, kũigua tũngĩiguaga na kĩ? Mwĩrĩ wothe ũngĩkorwo no gũtũ-rĩ, kũnungĩra tũngĩnungagĩra na kĩ

No ũrĩa kũrĩ, nĩ atĩ Yahweh nĩ eekĩrire ciĩga ciothe thĩinĩ wa mwĩrĩ, agĩciĩkĩra o ta ũrĩa eendaga ciikare.

Ciĩga ciothe ingĩtuĩka nĩ kĩĩga kĩmwe-rĩ, mwĩrĩ naguo ũngĩkorwo ha?

Ũrĩa kũrĩ nĩ atĩ ciĩga nĩ nyingĩ, no mwĩrĩ nĩ ũmwe.

Riitho rĩtingĩhota kwĩra guoko atĩrĩ, “Niĩ ndirĩ na bata nawe!” Naguo mũtwe wĩre magũrũ atĩrĩ, “Niĩ ndirĩ na bata na inyuĩ!”

Handũ ha ũguo-rĩ, ciĩga cia mwĩrĩ iria cionekaga itarĩ hinya, nĩcio irĩ bata makĩria,

nacio ciĩga iria tuonaga ta itarĩ cia gũtĩo mũno-rĩ, nĩcio tũheaga gĩtĩo kĩa mwanya. Nacio ciĩga iria tuonaga ta itagĩrĩire kuoneka nĩ imenyagĩrĩrwo mũno,

o rĩrĩa ciĩga ciitũ iria itarĩ cia kũhithwo itabataragio nĩ kũmenyererwo mũno. No Yahweh nĩ anyitithanĩtie ciĩga cia mwĩrĩ na agatĩithia makĩria ciĩga iria ciagĩte gĩtĩo,

nĩgetha gũtikae kũgĩa na nyamũkano thĩinĩ wa mwĩrĩ, no nĩgetha ciĩga ciaguo imenyanagĩrĩre o kĩĩga na kĩrĩa kĩngĩ

Kĩĩga kĩmwe kĩngĩnyarirĩka, ciĩga iria ingĩ inyarirĩkaga hamwe nakĩo; nakĩo kĩĩga kĩmwe kĩngĩheo gĩtĩo-rĩ, o nacio ciĩga iria ingĩ nĩ ikenaga hamwe nakĩo.

Na rĩrĩ, inyuĩ mũrĩ mwĩrĩ wa Messiya, na o mũndũ wanyu nĩ kĩĩga kĩaguo.

Nakuo thĩinĩ wa Ũngano, Yahweh nĩ athurĩte mbere andũ amwe matuĩke atũmwo, a kerĩ anabii, a gatatũ arutani, o na ningĩ kũgĩe na aringi a ciama, o na arĩa marĩ na iheo cia kũhonania mĩrimũ, na arĩa marĩ na ũhoti wa gũteithia arĩa angĩ, na arĩa marĩ na iheo cia ũtabarĩri, na arĩa maaragia na thiomi mĩthemba mĩthemba

Andũ othe nĩ atũmwo? Andũ othe nĩ anabii? Andũ othe nĩ arutani? Andũ othe nĩ aringi a ciama

Andũ othe nĩ maheetwo iheo cia kũhonania? Andũ othe nĩ makĩaragia na thiomi? Andũ othe nĩ magĩtaũraga thiomi

No rĩrĩ, mwĩriragĩriei iheo iria irĩ bata mũno. Na rĩu nĩ ngũmuonia njĩra ĩrĩa njega makĩria.