Akorinitho wa Mbere 13

O na ingĩaria na thiomi cia andũ o na cia araika, no ngorwo itarĩ na wendani-rĩ, ingĩkorwo ndĩ o ta kĩndũ kĩa rũthuku kĩrĩa kĩgambaga kĩaringwo, kana o ta thani ĩrĩa ĩhũrithanagio ĩkagamba.

Ingĩkorwo ndĩ na kĩheo gĩa kũratha ũhoro, na ngorwo no hote kũmenya maũndũ mothe ma hitho na ngagĩa na ũmenyo wothe, na ingĩkorwo ndĩ na wĩtĩkio ũrĩa ũngĩhota gũthaamia irĩma, no ndirĩ na wendani-rĩ, ndirĩ bata o na hanini.

Ingĩheana indo ciakwa ciothe kũrĩ andũ arĩa athĩni, o na heane mwĩrĩ wakwa ũcinwo, no ngorwo ndirĩ na wendani-rĩ, ndingĩgunĩka.

Wendani nĩ ũkiranagĩrĩria, na wendani nĩ ũtuganaga. Ndũiguanagĩra ũiru, na ndwĩgathaga, o na ndũrĩ mwĩtĩo.

Wendani ndũrĩ rũtũrĩko, na ndũcaragia ũrĩa ũngĩĩguna, o na ndũhiũhaga kũrakara, na ndũtaraga maita marĩa ũhĩtĩirio.

Ningĩ wendani ndũkenagĩra ũũru, no nĩ ũkenagĩra ũhoro wa ma

Wendani nĩ ũgitanagĩra hĩndĩ ciothe, na ũgetĩkia maũndũ mothe, na nĩ wĩrĩgagĩrĩra hĩndĩ ciothe, o na ũkomĩrĩria hĩndĩ ciothe.

Wendani ndũthiraga. No akorwo nĩ morathi, nĩ magathira; o na thiomi nĩ igathira; na kũmenya maũndũ o nakuo nĩ gũgathira.

Nĩgũkorwo tũmenyaga maũndũ o gĩcunjĩ, na tũrathaga maũndũ o gĩcunjĩ,

no hĩndĩ ĩrĩa ũndũ ũrĩa mũkinyanĩru ũgoka-rĩ, ũndũ ũrĩa ũtarĩ mũkinyanĩru nĩ ũgaathira

Hĩndĩ ĩrĩa ndaarĩ kaana-rĩ, ndaaragia o ta kaana, na ndeeciragia o ta kaana, na ndaataranagia maũndũ o ta kaana. No hĩndĩ ĩrĩa ndaatuĩkire mũndũ mũgima-rĩ, ngĩtigana na maũndũ ma wana.

Rĩu tuonaga maũndũ na mairia, ta kuona na gĩcicio; no hĩndĩ ĩyo tũkonaga ta andũ makĩonana ũthiũ kwa ũthiũ. Rĩu njũĩ maũndũ o gĩcunjĩ; hĩndĩ ĩyo nĩ ngamenya maũndũ wega, o ta ũrĩa niĩ njũũĩo wega.

Na rĩu, maũndũ maya matatũ nĩ ma gũtũũra: wĩtĩkio, na kĩĩrĩgĩrĩro, o na wendani. No ũrĩa mũnene wamo nĩ wendani.