Akorinitho wa Mbere 14
Rũmagĩrĩrai mĩthiĩre ya wendani, na mwĩrirĩrie mũno iheo cia kĩĩroho, na makĩria mwĩriragĩrie kĩheo kĩa ũheani ũhoro wa Yahweh.
Nĩgũkorwo mũndũ ũrĩa wothe waragia na rũthiomi-rĩ, ti andũ aaragĩria no nĩ Yahweh aaragĩria. Ti-itherũ, gũtirĩ mũndũ ũtaũkagĩrwo nĩ ũrĩa aroiga; no nĩ maũndũ ma hitho aaragia na roho wake
No mũndũ ũrĩa ũheanaga ũhoro wa Yahweh aaragĩria andũ akamekĩra hinya, na akamomĩrĩria, na akamahoreria.
Mũndũ ũrĩa waragia na rũthiomi nĩwe mwene wĩongagĩrĩra hinya, no ũrĩa ũheanaga ũhoro wa Yahweh nĩ Ũngano ongagĩrĩra hinya.
No nyende inyuothe mwaragie na thiomi, no makĩria ingĩenda inyuothe mũrathage mohoro. Mũndũ ũrĩa ũrathaga ũhoro nĩ akĩrĩte ũrĩa waragia na thiomi, tiga no akorirwo nĩ egũtaũra thiomi icio, nĩguo Ũngano wongererwo hinya.
No rĩu, ariũ na aarĩ a Ithe witũ, ingĩũka kũrĩ inyuĩ na njarie na thiomi-rĩ, ingĩmũguna nakĩ, tiga no ndĩmũreheire ũguũrio, kana ũmenyo, kana ũrathi, o na kana kiugo kĩa ũrutani
O na ha ũhoro ũkoniĩ indo iria itarĩ muoyo iria igambaga, indo ta mũtũrirũ kana kĩnanda kĩa mũgeto-rĩ, mũndũ angĩgĩkũũrana atĩa rwĩmbo rũrĩa rũrenda kũinwo, tiga hakorirwo na ngũũrani njega ya mĩgambo?
Ningĩ-rĩ, angĩkorwo karumbeta gatikũruta mũgambo ũgũkũũrĩkana ũrĩa ũkuuga-rĩ, nũ ũngĩkĩĩhaarĩria gũthiĩ mbaara-inĩ
Ũguo noguo ũhoro wanyu ũtariĩ. Tiga mwaririe na ciugo ikũmenyeka na rũthiomi rwanyu-rĩ, nĩ mũndũ ũrĩkũ ũngĩmenya ũrĩa mũroiga? Mũngĩkorwo o mũkĩarĩria rĩera.
Ti-itherũ nĩ kũrĩ mĩthemba mĩingĩ ya thiomi gũkũ thĩ, no gũtirĩ rũthiomi o na rũmwe rũtarĩ ũrĩa ruugaga
No angĩkorwo ndingĩmenya ũrĩa mũndũ aroiga-rĩ, niĩ ngĩrĩ mũrũrĩrĩ harĩ mũndũ ũcio ũraaria, nake nĩ mũrũrĩrĩ harĩ niĩ.
Ũguo noguo o na inyuĩ mũtariĩ. Kuona atĩ nĩ mwĩrirĩirie mũno iheo cia kĩĩroho-rĩ, kĩgeragiei kuongerera iheo iria ciakaga Ũngano ũkagĩa na hinya.
Na tondũ ũcio-rĩ, mũndũ ũrĩa waragia na rũthiomi rũgeni nĩ ahoyage nĩguo ahote gũtaũra ũrĩa aroiga
Nĩ ũndũ-rĩ, ingĩkorwo ndĩrahoya ngĩthiomaga-rĩ, roho wakwa nĩguo ũrahoya, no meciria makwa matirĩ na maciaro.
Nĩ ũndũ ũcio-rĩ, ngũgĩĩka atĩa? Niĩ ndĩrĩhoyaga Yahweh na roho wakwa, na ningĩ hoyage na meciria makwa; o na kũina ndĩrĩinaga na roho wakwa, na ningĩ nyinage na meciria makwa o namo.
Ningĩ-rĩ, ũngĩkorwo ũkĩgooca Yahweh na roho waku tu-rĩ, mũndũ wa arĩa marĩ gatagatĩ kanyu ũtarataũkĩrwo, angĩkiuga “Amein” atĩa mahoya-inĩ maku ma gũcokia ngatho, kuona atĩ ndaramenya ũrĩa ũroiga
No ũkorwo ũgĩcokia ngatho wega mũno, no mũndũ ũcio ũngĩ ndanongererwo hinya nĩ ũhoro ũcio.
Nĩ ngũcokeria Yahweh ngatho nĩgũkorwo niĩ nĩ njaragia na thiomi makĩria manyu inyuothe
No Ũngano-inĩ-rĩ, nĩ kaba njarie ciugo ithano ndĩramenya wega nĩguo ngĩrute andũ arĩa angĩ ũhoro nacio, gũkĩra njarie ciugo ngiri ikũmi cia gũthioma.
Ariũ na aarĩ a Ithe witũ, tigagai gwĩciragia ta ciana. Harĩ ũhoro wa maũndũ marĩa moru-rĩ, tuĩkai tũkenge, no mwĩcirĩrie-inĩ wanyu mũtuĩke andũ agima.
Thĩinĩ wa Watho nĩ kwandĩkĩtwo atĩrĩ: “Nĩ ngaarĩria andũ aya na tũnua twa andũ maaragia na thiomi ngʼeni, ndĩmaarĩrie na tũnua twa andũ maaragia na mwarĩrie wa kũngĩ, no o na ndeka ũguo matikanjigua,” ũguo nĩguo Yahweh ekuuga.
Nĩ ũndũ ũcio, kwaria na thiomi nĩ kĩmenyithia kũrĩ andũ arĩa matetĩkĩtie no ti kĩmenyithia kũrĩ arĩa metĩkĩtie; no kũratha ũhoro nĩ kwa arĩa metĩkĩtie, ti kwa arĩa matetĩkĩtie.
Tondũ ũcio Ũngano wothe ũngĩũngana na andũ othe maarie na thiomi-rĩ, na hacoke hatonye andũ matoĩ ũhoro wa thiomi, kana andũ matetĩkĩtie-rĩ, githĩ matingiuga atĩ mũrĩ agũrũki?
No mũndũ ũtarĩ mwĩtĩkia kana mũndũ ũtarĩ mũtaũkĩre nĩ ũhoro ũcio angĩtonya rĩrĩa andũ othe mararatha mohoro-rĩ, mũndũ ũcio nĩ ekũiguithio nĩ andũ othe atĩ nĩ mwĩhia na acirithio nĩo othe,
na maũndũ marĩa atũire ahithĩte ngoro-inĩ nĩ makoimbũka. Nĩ ũndũ ũcio egũithie thĩ ahoe Yahweh, akiugaga atĩrĩ, “Ti-itherũ El arĩ gatagatĩ-inĩ kanyu na ma!”
Tũgũkiuga atĩa, ariũ na aarĩ a Ithe witũ? Rĩrĩa muongana hamwe-rĩ, o mũndũ ahota gũkorwo arĩ na rwĩmbo, kana arĩ na ũndũ arenda kũrutana, kana arĩ na ũndũ aguũrĩirio, kana arĩ na thiomi, kana arĩ na ũtaũri wa thiomi. Maũndũ macio mothe no nginya mekagwo nĩ ũndũ wa gwĩkĩra Ũngano hinya.
Angĩkorwo nĩ gũkwario na rũthiomi-rĩ, nĩ kwario nĩ andũ erĩ, na makĩingĩha atatũ, na o mũndũ aarie o riita rĩake, na no nginya hagĩe na mũndũ ũngĩ wa gũtaũra.
Angĩkorwo gũtirĩ mũtaũri-rĩ, mwaria ũcio nĩ agĩkire arĩ kũu Ũngano-inĩ, na akĩĩarĩrie we mwene, na aarĩrie Yahweh.
Aheani ũhoro erĩ kana atatũ magĩrĩirwo maarie, nao andũ arĩa angĩ makũũrane wega ũrĩa kũreerwo
Na mũndũ ũikarĩte thĩ ho angĩgĩa na ũguũrio-rĩ, mwaria ũcio wa mbere nĩ akire.
Nĩgũkorwo inyuothe no mũrathe ũhoro o mũndũ riita rĩake nĩguo andũ othe marutwo maũndũ na momĩrĩrio
Namo maroho ma anabii nĩ mathĩkagĩra anabii o ene.
Nĩgũkorwo Yahweh ti Kĩhoti wa kĩrigicano no nĩ wa thayũ. Ta ũrĩa kũrĩ thĩinĩ wa ciũngano ciothe cia andũ arĩa aamũre.
Andũ-a-nja magĩrĩirwo nĩ gũikaraga makirĩte ki marĩ thĩinĩ wa Ũngano. Matiĩtĩkĩrĩtio kwaria, no nĩ maikarage menyihĩtie, o ta ũrĩa Watho uugĩte.
Angĩkorwo marĩ na ũndũ mangĩenda kũmenya-rĩ, nĩ moragie athuri ao ene kwao mũciĩ; nĩgũkorwo nĩ ũndũ ũrĩ thoni andũ-a-nja kwaragia thĩinĩ wa Ũngano.
Hĩ! Anga kiugo kĩa Yahweh kĩambĩrĩirie na inyuĩ? Kana hihi no inyuĩ inyuiki gĩakinyĩire?
Mũndũ o na ũ angĩĩciria atĩ nĩ mũnabii, kana arĩ na iheo cia kĩĩroho-rĩ, nĩ agĩtĩkĩre atĩ maũndũ maya ndĩramwandĩkĩra nĩ maũndũ marĩa maathanĩtwo nĩ Yahweh
No angĩagĩra ũndũ ũcio kĩene-rĩ, o nake we mwene nĩ akagĩrwo kĩene.
Nĩ ũndũ ũcio, ariũ na aarĩ a Ithe witũ, mwĩrirĩriei kũrathaga mohoro, na mũtikagiragie ũhoro wa kwaria na thiomi.
No maũndũ mothe nĩ mekagwo na mũtaratara ũrĩa wagĩrĩire, na mekagwo na kĩhaarĩro.