Akorinitho wa Mbere 15
Na rĩrĩ, ariũ na aarĩ a Ithe witũ, nĩ ngwenda kũmũririkania Ũhoro-ũrĩa-mwega ũrĩa ndamũhunjĩirie, na mũkĩwamũkĩra, na noguo mũtũũrĩte mũrũmĩtie
Ũhoro ũcio mwega nĩguo ũtũmaga mũhonoke, mwaikara mũrũmĩtie wega ũhoro ũrĩa ndamũhunjĩirie. Angĩkorwo ti ũguo-rĩ, ũhoro ũcio mwawĩtĩkirie o tũhũ.
Nĩgũkorwo ũhoro ũrĩa niĩ ndaamũkĩrire nĩguo ndaamũheire, ũrĩ wa mbere na wa bata mũno: Atĩ Messiya nĩ akuire nĩ ũndũ wa mehia maitũ o ta ũrĩa Maandĩko moigĩte,
na atĩ nĩ athikirwo, na atĩ mũthenya wa gatatũ akĩriũkio kũringana na ũrĩa Maandĩko macio moigĩte,
na atĩ akiumĩrĩra Kepha, na agĩcoka akiumĩrĩra arĩa Ikũmi na Erĩ
Thutha ũcio, nĩ oimĩrĩire makĩria ma ariũ na aarĩ a Ithe witũ magana matano ihinda o rĩmwe, na aingĩ ao marĩ muoyo o na rĩu, o na gũtuĩka amwe ao nĩ marĩkĩtie gũkoma.
Ningĩ agĩcoka akiumĩrĩra Jakubu na thutha wa ũguo agĩcoka akiumĩrĩra atũmwo othe,
na thutha wa acio angĩ othe akĩnyumĩrĩra o na niĩ, haana ta mũndũ waciarĩtwo atarĩ mũkinyu.
Nĩgũkorwo niĩ nĩ niĩ mũnini mũno harĩ atũmwo arĩa angĩ, o na ndiagĩrĩirwo nĩ gwĩtwo mũtũmwo, tondũ nĩ ndanyaririre Ũngano wa Yahweh.
No wega wa Yahweh nĩguo ũtũmĩte nduĩke ũguo ndariĩ, naguo wega wake kũrĩ niĩ ndwarĩ wa tũhũ. No nĩ ndarutire wĩra na kĩyo gũkĩra acio angĩ othe, no ti niĩ ndaarutaga wĩra ũcio, no nĩ wega wa Yahweh ũrĩa warĩ hamwe na niĩ warutaga wĩra ũcio.
Tondũ ũcio, o na kũngĩtuĩka nĩ niĩ kana nĩ o-rĩ, ũhoro ũyũ noguo tũhunjagia, na noguo inyuĩ mwetĩkirie.
Na rĩrĩ, kũngĩkorwo kũhunjagio atĩ Messiya nĩ ariũkirio akiuma kũrĩ arĩa akuũ-rĩ, nĩ kĩ gĩtũmaga amwe anyu moige atĩ gũtirĩ kũriũkio kwa arĩa akuũ?
Kũngĩkorwo gũtirĩ kũriũkio kwa arĩa akuũ-rĩ, o nake Messiya ndaakĩriũkirio
Na angĩkorwo Messiya ndaakĩriũkirio-rĩ, kũhunjia gwitũ no gwa tũhũ, nakuo gwĩtĩkia kwanyu no gwa tũhũ.
Makĩria ma ũguo-rĩ, ithuĩ no tũgĩkorwo tũrĩ aira a Yahweh a maheni, tondũ nĩ tuumbũrĩte atĩ Yahweh nĩ ariũkirie Messiya kuuma kũrĩ arĩa akuũ. No rĩrĩ, ndaakĩmũriũkirie angĩkorwo nĩ ma atĩ arĩa akuũ matiriũkagio.
Nĩgũkorwo kũngĩtuĩka atĩ arĩa akuũ matiriũkagio, o nake Messiya ndaakĩriũkirio
Na angĩkorwo Messiya ndaariũkirio-rĩ, gwĩtĩkia kwanyu nĩ gwa tũhũ; mũgĩtũũraga o mehia-inĩ manyu.
Ningĩ andũ arĩa marĩkĩtie gũkoma marĩ thĩinĩ wa Messiya-rĩ, o nao nĩ kũũra morĩte.
Na kũngĩkorwo kĩĩrĩgĩrĩro giitũ thĩinĩ wa Messiya no kĩa muoyo-inĩ ũyũ tũrĩ-rĩ, twagĩrĩirwo nĩ kũiguĩrwo tha gũkĩra andũ othe.
No rĩrĩ, ti-itherũ Messiya nĩ ariũkĩtio akoima kũrĩ arĩa akuũ, agatuĩka maciaro ma mbere ma arĩa makuĩte.
Tondũ-rĩ, o ũrĩa arĩ mũndũ watũmire gĩkuũ gĩũke thĩ, o nakuo kũriũkio kwa arĩa akuũ nĩ mũndũ watũmire gũũke.
Nĩgũkorwo o ta ũrĩa andũ othe makuaga nĩ ũndũ wa Adamu-rĩ, no taguo andũ othe magaacokio muoyo thĩinĩ wa Messiya.
No o mũndũ akaariũka ihinda rĩake mwene: Messiya arĩ we wariũkire mbere; na thutha andũ arĩa marĩ ake hĩndĩ ĩrĩa agoka.
Thutha ũcio nĩguo ihinda rĩa kũrigĩrĩria rĩgaakinya, hĩndĩ ĩrĩa akaaneana ũthamaki kũrĩ Yahweh Ithe arĩkĩtie kũnina mothamaki mothe, na wathani, o na hinya wothe
Nĩgũkorwo no nginya athamake nginya rĩrĩa agaakorwo aigĩte thũ ciake ciothe rungu rwa makinya make.
Na rĩrĩ, thũ ya mũthia kũninwo nĩ gĩkuũ.
Nĩgũkorwo “nĩ aigĩte indo ciothe rungu rwa makinya make.” Na rĩrĩa gũkwĩrwo atĩ “indo ciothe” nĩ ciigĩtwo rungu rwake, nĩ gũkũmenyeka wega atĩ Yahweh we mwene ti wa itari rĩu tondũ nĩ we waigire indo ciothe rungu rwa Messiya.
Aarĩkia gwĩka ũguo-rĩ, Mũriũ we mwene nĩ agatuĩka wa gwathagwo nĩ ũcio waigire indo ciothe rungu rwake, nĩguo Yahweh akorwo nĩ we maũndũ mothe thĩinĩ wa maũndũ mothe.
Na rĩrĩ, kũngĩkorwo gũtirĩ ũriũkio-rĩ, arĩa mabatithĩtio handũ-inĩ ha arĩa akuũ mageka atĩa? Angĩkorwo arĩa akuũ matikaariũkio o na atĩa-rĩ, andũ makĩbatithagio handũ-inĩ hao nĩkĩ?
Na ithuĩ-rĩ, twĩtonyagia ũgwati-inĩ o ithaa o ithaa nĩkĩ?
Ngũmwĩra na ma, ariũ na aarĩ a Ithe witũ, ti-itherũ, o ta ũrĩa ndĩĩrahaga nĩ ũndũ wanyu thĩinĩ wa Messiya Yahshua Mwathi witũ, atĩ niĩ nguaga o mũthenya.
Angĩkorwo ndahũranire na nyamũ cia gĩthaka kũu Efeso nĩ ũndũ wa itũmi cia ũ-mũndũ-rĩ, ndagunĩkire na kĩ? Angĩkorwo andũ arĩa akuũ matikaariũkio-rĩ, “Nĩ tũrĩe na tũnyue, nĩgũkorwo rũciũ nĩ gũkua tũgakua.”
Mũtikaheeneke: “Thiritũ njũru nĩ ĩthũkagia mĩtugo mĩega.”
Arahũkai mwĩigue ta ũrĩa mwagĩrĩirwo, na mũtigage kwĩhia; nĩgũkorwo andũ amwe matiũĩ Yahweh: ndoiga ũguo nĩgetha ndĩmũconore.
No mũndũ ahota kũũria atĩrĩ, “Andũ arĩa akuũ mariũkagio atĩa? Magoka marĩ na mwĩrĩ ũhaana atĩa?”
Nĩ ũrimũ ũrĩkũ ũyũ! Kĩrĩa wahanda-rĩ, gĩtimeraga gĩtambĩte gũkua
Hĩndĩ ĩrĩa wahanda-rĩ, ndũhandaga mwĩrĩ ũrĩa ũgũcoka ũkorwo ho, no gũkorwo ũhandaga mbeũ ya ngano kana ya kĩndũ kĩngĩ
No Yahweh amĩheaga mwĩrĩ o ũrĩa endaga ĩgĩe naguo, na o mũthemba wa mbegũ akaũhe mwĩrĩ waguo
Mĩĩrĩ yothe ndĩhaanaine: Andũ marĩ mũthemba ũmwe wa mwĩrĩ, nacio nyamũ mũthemba ũngĩ, na nyoni mũthemba ũngĩ, o nacio thamaki irĩ mwĩrĩ wa mũthemba ũngĩ
Ningĩ nĩ kũrĩ mĩĩrĩ ya igũrũ na nĩ kũrĩ mĩĩrĩ ya gũkũ thĩ; no riri wa mĩĩrĩ ya igũrũ nĩ mũthemba ũmwe, na riri wa mĩĩrĩ ya gũkũ thĩ nĩ mũthemba ũngĩ.
Riũa rĩrĩ na riri warĩo mwanya, na mweri ũrĩ riri waguo mwanya, na njata irĩ na riri wacio mwanya; na njata ĩmwe ĩrĩ riri ũrĩ ngũũrani na njata ĩrĩa ĩngĩ.
Ũguo nĩguo gũgaatuĩka hĩndĩ ya kũriũkio kwa andũ arĩa akuũ. Mwĩrĩ ũrĩa ũhandagwo nĩ wa kũbutha, no ũriũkagio ũtarĩ wa kũbutha;
mwĩrĩ ũhandagwo ũrĩ mũmene, ũgacoka ũkariũkio ũrĩ na riri; ũhandagwo ũtarĩ na hinya, ũgacoka ũkariũkio ũrĩ na hinya;
ũhandagwo ũrĩ mwĩrĩ wa ndũire, ũgacoka ũkariũkio ũrĩ mwĩrĩ wa kĩĩroho. Angĩkorwo nĩ kũrĩ mwĩrĩ wa ndũire-rĩ, o na mwĩrĩ wa kĩĩroho ũrĩ kuo.
Nĩ ũndũ ũcio kwandĩkĩtwo atĩrĩ: “Adamu ũrĩa warĩ mũndũ wa mbere-rĩ, aatuĩkire kĩũmbe kĩrĩ muoyo”; nake Adamu ũrĩa wa kũrigĩrĩria-rĩ, agĩtuĩka roho wa kũheana muoyo.
Mwĩrĩ wa kĩĩroho tiguo waambire gũũka, no nĩ ũrĩa wa ndũire, na thutha wa ũguo ũgĩũka ũrĩa wa kĩĩroho.
Mũndũ wa mbere aarĩ wa rũkũngũ rwa thĩ, no mũndũ wa kerĩ oimĩte igũrũ.
O ta ũrĩa mũndũ ũcio wa gũkũ thĩ aatariĩ, noguo arĩa marĩ a tĩri matariĩ; na ta ũrĩa mũndũ wa kuuma igũrũ aatariĩ, noguo o na arĩa a igũrũ matariĩ.
Na ta ũrĩa twagĩire na mũhianĩre wa mũndũ ũcio wa tĩri-rĩ, noguo tũkaagĩa na mũhianĩre wa mũndũ ũcio wa kuuma igũrũ.
Ngũmwĩra atĩrĩ, ariũ na aarĩ a Ithe witũ, mwĩrĩ na thakame itingĩhota kũgaya ũthamaki wa Yahweh, kana kĩrĩa kĩbuthaga kĩgae kĩrĩa gĩtabuthaga
Thikĩrĩriai, ndĩmwĩre ũndũ wa hitho: Tũtigakua ithuothe, no nĩ kũgarũrwo tũkaagarũrwo ithuothe,
o kahinda kanini, o ta ibucia rĩa riitho, rĩrĩa karumbeta ka mũthia gakaagamba. Nĩgũkorwo karumbeta nĩ gakaahuhwo, nao arĩa akuũ mariũkio matarĩ a kũbutha, na ithuĩ tũgarũrwo mĩĩrĩ.
Nĩgũkorwo mwĩrĩ ũyũ ũbuthaga no nginya wĩhumbe mwĩrĩ ũtarĩ wa kũbutha, naguo mwĩrĩ ũyũ wa gũkua wĩhumbe mwĩrĩ ũtarĩ wa gũkua.
Hĩndĩ ĩrĩa kũbutha gũkeehumba kwaga kũbutha, na gũkua kwĩhumbe kwaga gũkua-rĩ, hĩndĩ ĩyo ũhoro nĩ ũkahinga ũrĩa wandĩkĩtwo atĩrĩ, “Gĩkuũ nĩ kĩninĩtwo gĩgatorio biũ.”
“Wee gĩkuũ-rĩ, gũtorania gwaku gũkĩrĩ ha? Wee gĩkuũ-rĩ, rũbora rwaku rũkĩrĩ ha?”
Rũbora rwa gĩkuũ nĩ mehia, naguo hinya wa mehia uumanaga na Watho
No rĩrĩ, Yahweh arogathwo nĩgũkorwo nĩwe ũtũheaga ũtoria thĩinĩ wa Mwathi witũ Yahshua Messiya.
Nĩ ũndũ ũcio, ariũ na aarĩ a Ithe witũ arĩa nyenda, ikaragai mwĩhandĩte wega. Mũtikanenyenyio nĩ ũndũ o na ũrĩkũ. Tũũrai mwĩheanĩte kũna wĩra-inĩ wa Yahweh, tondũ nĩ mũũĩ atĩ wĩra wanyu thĩinĩ wa Yahweh ti wa tũhũ.