Akorinitho wa Mbere 16
Rĩu-rĩ, ũhoro wĩgiĩ kũruta mĩhothi nĩ ũndũ wa arĩa aamũre, no mũrũmagĩrĩre maũndũ marĩa nderire ciũngano cia Galatia
Mũthenya wa mbere wa o kiumia, o ũmwe wanyu nĩ aigage kĩndũ kũringana na ũhoti wake, nĩguo mĩhothi ndĩkanonganio ndakinya
No ndakinya kũu, nĩ ngatũma andũ arĩa mũgũthuura marũa-inĩ manyu nĩguo matware kĩheo kĩanyu kĩa ũtugi Yahrushalayim
No rĩrĩ, kũngĩoneka arĩ wega o na niĩ thiĩ kuo, nĩ magaathiĩ hamwe na niĩ.
No ngoka kũrĩ inyuĩ ndamba kũgerera Makedonia, tondũ nĩ ngũgerera Makedonia;
na hihi nĩ ngaikara o na kana ngorũo hamwe na inyuĩ hĩndĩ ya heho, nĩguo mũgaacoka mũnyumagarie hanini ngĩthiĩ kũrĩa ngaakorũo ngĩthiĩ
Nĩ gũkorũo ndirenda kũmuona ihinda-inĩ rĩrĩ o ngĩhĩtũka tu, tondũ nĩ ndĩrerĩgĩrĩra kũhũthĩra ihinda rĩigana ũna hamwe na inyuĩ Yahweh angĩtĩkĩria
No nĩ ngũikara gũkũ Efeso o nginya hĩndĩ ya Gĩathĩ gĩa Ciumia,
tondũ nĩ hingũrĩirũo mũrango mũnene wa ũtungata, no kũrĩ na akararia aingĩ.
Rĩu-rĩ, Timotheo angĩũka, tigĩrĩrai atĩ ndegũkorũo na ũndũ wa gwĩtigĩra arĩ gatagatĩ-inĩ kanyu, nĩ gũkorũo araruta wĩra wa Yahweh, o ta niĩ
Nĩ ũndũ ũcio-rĩ, mũndũ o na ũrĩkũ ndakamũhũthie. Na mũreke oimagare na thayũ oke kũrĩ niĩ, tondũ nĩ ndĩmwetereire o hamwe na ariũ a Ithe witũ.
Ũhoro-inĩ wĩgiĩ mũrũ wa Ithe witũ Apolo-rĩ, nĩ ndamũringĩrĩirie mũno oke kũrĩ inyuĩ marĩ hamwe na ariũ a Ithe witũ. Ndwarĩ muoroto wake oke ihinda-inĩ rĩrĩ, no nĩ arĩũka rĩrĩa arĩona mweke.
Ikaragai mwĩhũgĩte, mũrũgame mwĩrũmĩtie thĩinĩ wa wĩtĩkio, koragwoi mũtariĩ ta arũme, na mũgĩe na hinya
Maũndũ mothe marĩa mwĩkaga mekagei na wendo.
Nĩ mũũĩ atĩ andũ a nyũmba ya Stefana nĩo maciaro ma mbere ma Akaia na atĩ nĩ merutĩire mũno gũtungatĩra andũ arĩa aamũre. Nĩ ũndũ ũcio ariũ a Ithe witũ-rĩ, no nyende kũmũhatĩrĩria:
Mwĩnyihagĩriei andũ ta acio na arĩa othe maranyitanĩra na makaruta wĩra na kĩyo
No nĩ ngenete gũkorũo hamwe na Stefana na Foritunato na Akaiko, tondũ nĩ mandeithĩtie hĩndĩ ĩno tũtarĩ na inyuĩ
Nĩ gũkorũo nĩ macanjamũrĩte roho wakwa o na wanyu. Nĩ ũndũ ũcio-rĩ, heagai andũ ta acio gĩtĩo.
Ciũngano cia Asia nĩ ciamũgeithia. Akila na Priska o hamwe na kĩũngano kĩrĩa gĩcemanagia kwao mũciĩ nĩ mamũgeithia mũno thĩinĩ wa Yahweh
Ariũ othe a Ithe witũ nĩ mamũgeithia. Geithaniai inyuĩ ene na ngeithi nyamũre cia kũmumunyana.
Ici nĩ ngeithi ciakwa, niĩ Saũlũ, ndandĩka na guoko gwakwa mwene.
Angĩkorũo nĩ harĩ mũndũ ũtendete Yahshua, aronyitwo nĩ kĩrumi. Maranatha
Ũtugi mũnene wa Mwathi Yahshua ũroikara hamwe na inyuĩ
Wendo wakwa ũroikara hamwe na inyuĩ inyuothe mũrĩ na ũiguano na Messiya Yahshua.