Amosi 4

“Iguai kiugo gĩkĩ, inyuĩ ngʼombe cia Bashani, Inyuĩ mũrĩ igũrũ rĩa kĩrĩma gĩa Samaria, O inyuĩ arĩa mũtunyaga andũ arĩa matarĩ hinya na mũkahehenja arĩa athĩni, Inyuĩ mwĩraga athuri anyu atĩrĩ, ‘Tũreherei kĩndũ gĩa kũnyua!’

Mũthamaki Yahweh nĩ ehĩtĩte na ũtheru wake akoiga, ‘“Oneei, matukũ nĩ maroka rĩrĩa akaamuoya na igũrũ na ihocio cia mũthĩnji Nao arĩa magaatigara moywo na ndwano.

Mũkoima mũgereire mĩanya-inĩ ya rũthingo, o mũndũ arũngĩrĩirie na mbere; Na nĩ mũgaaikio Harimoni,” ũguo nĩguo Yahweh ekuuga.’

‘Thiĩi Betheli mũkehie, Mũthiĩ Giligali mũkehie o na makĩria! Twarai magongona manyu rũcinĩ, Na mũtware icunjĩ cianyu cia ikũmi mwaka-inĩ wa gatatũ.

Cinai igongona rĩa gũcokia ngatho rĩa mũgate mwĩkĩre ndawa ya kũimbia; Menyithaniai mwanĩrĩire ũhoro wa magongona manyu ma kwĩyendera! Tondũ ũguo nĩguo mwendete gwĩka, inyuĩ andũ a Isiraeli,’ ũguo nĩguo Mũthamaki Yahweh oigĩte.

‘Na niĩ-rĩ, nĩ ndatũmire magego manyu maikare marĩ matheru matarĩ na irio thĩinĩ wa matũũra manyu mothe Na ngĩtũma kwage mũgate thĩinĩ wa nyũmba cianyu ciothe; No mũtianjokereire,’ ũguo nĩguo Yahweh ekuuga.

‘Ningĩ nĩ ndamũimire mbura mĩeri ĩtatũ mbere ya magetha; Nĩ ndoiragia mbura thĩinĩ wa itũũra rĩmwe no ngaaga kuuria thĩinĩ wa itũũra rĩngĩ. Mũgũnda ũmwe nĩ wakoragwo na mbura, No mũgũnda ũngĩ ũrĩa ũtaakoragwo na mbura ũkoma.

Andũ a matũũra merĩ kana matatũ maatũgũgaga magathiĩ itũũra-inĩ rĩmwe kũnyua maĩ, Na matiaiganagia; No mũtianjokereire,’ ũguo nĩguo Yahweh ekuuga.

‘Nĩ ndahũũrire mĩmera yanyu na ũrugarĩ mũnene o na mbuu. Nĩ mwaingĩhirie mĩgũnda yanyu o hamwe na mĩgũnda ya mĩthabibũ, No ngigĩ nĩ ciarĩaga mĩtĩ yanyu ya mĩkũyũ o na ya mĩtamaiyũ; Na nginya hĩndĩ ĩyo mũtianjokereire,’ ũguo nĩguo Yahweh ekuuga.

‘Nĩ ndamũreheire mũrimũ mũũru o ta ũrĩa wa Misiri. Nĩ ndoragire anake anyu na rũhiũ rwa njora na ngĩtaha mbarathi cianyu. Ndatũmire mũnungo mũũru kuuma kambĩ-inĩ cianyu wambate ũingĩre maniũrũ-inĩ manyu; No mũtianjokereire,’ ũguo nĩguo Yahweh ekuuga.

‘Nĩ ndamũngʼaũranirie O ta ũrĩa ndangʼaũranirie Sodomu na Gomora. Na inyuĩ mwatariĩ ta rũtungu rũguthĩtwo kuuma mwaki-inĩ; No mũtianjokereire,’ ũguo nĩguo Yahweh ekuuga.

Nĩ ũndũ ũcio, ũguo noguo ngaagwĩka, wee Isiraeli. Tondũ ũguo nĩguo ngaagwĩka-rĩ, Wĩhaarĩrie gũcemania na Kĩhoti waku, wee Isiraeli.

Tondũ rĩrĩ, nĩwe wombire irĩma o na akĩũmba rũhuho; Nĩ eraga mũndũ meciria Make, Nĩ agarũraga ũtheri wa rũcinĩ ũgatuĩka nduma, Na agathiĩra kũndũ kũrĩa gũtũũgĩru thĩinĩ wa thĩ; Yahweh Kĩhoti mũnene wa ita nĩrĩo rĩĩtwa rĩake.”