Amosi 5

“Iguai kiugo gĩkĩ ngwaria rwĩmbo-inĩ rwa macakaya, kĩmũkoniĩ inyuĩ nyũmba ya Isiraeli:

‘Mũirĩtu gathirange, o we Isiraeli, nĩ agũĩte; Ndangĩhota gũũkĩra rĩngĩ. Nĩ atiganĩirio bũrũri-inĩ wake mwene; Ndarĩ na mũndũ wa kũmũũkĩria.’

“Nĩ gũkorũo Mũthamaki Yahweh oigĩte atĩrĩ: ‘Itũũra rĩrĩa riumagaraga na thigari ngiri rĩgaatigara thigari igana rĩmwe; Na rĩrĩa riumagaraga na thigari igana rĩmwe rĩgaatigara thigari ikũmi, harĩ nyũmba ya Isiraeli.’

“Nĩ gũkorũo Yahweh ekwĩra nyũmba ya Isiraeli atĩrĩ: ‘Njariai nĩguo mũthiĩ na mbere gũtũũra muoyo.

Mũtigacarie Betheli, Mũtigathiĩ Giligali kana mũkĩre mũthiĩ Biri-shiba, Tondũ hatarĩ nganja Giligali nĩ ĩgaatwarũo ithamĩrio, Nayo Betheli ĩgaatuĩka kĩndũ hatarĩ.

Cariai Yahweh nĩguo mũthiĩ na mbere gũtũũra muoyo, Nĩgetha ndagatuthũke ta mwaki harĩ nyũmba ya Jusufu, Ũcine Betheli, gũtarĩ na mũndũ ũngĩũhoria.

Mũgarũraga matua marũngĩrĩru ma cira magatuĩka marũrũ ta mũgũta Naguo ũthingu mũkaũte thĩ.

Ũrĩa wombire gĩkundi kĩa njata kĩrĩa gĩtagwo Kima na kĩrĩa gĩtagwo Kesili, Ũcio ũgarũraga kĩĩruru kĩnene gĩgatuĩka rũcinĩ, Ũcio ũtũmaga mũthenya ũgĩe nduma o ta ũtukũ, O ũcio wĩtaga maĩ ma iria Akamaita igũrũ rĩa thĩ —Yahweh nĩrĩo rĩĩtwa rĩake.

Nĩ agaatũma mwanangĩko ũtuthũke harĩ andũ arĩa marĩ hinya, Arehe mwanangĩko igũrũ rĩa kũndũ kũrĩa kũrĩ na ũgitĩri.

Nĩ mathũire arĩa maheanaga ũtaaro kĩhingo-inĩ gĩa itũũra, Na makanyarara arĩa maragia ũhoro wa ma.

Tondũ nĩ mwĩtagia mũthĩni marĩhi ma mũgũnda Na mũkoya ngano yake ĩrĩ igooti, Mũtigaacoka gũtũũra nyũmba-inĩ cia mahiga maicũhie iria mwakĩte O na mũtikaanyuaga ndibei kuuma harĩ mĩgũnda ĩrĩa mĩega ya mĩthabibũ mũhandĩte.

Nĩ gũkorũo nĩ njũĩ ũrĩa ciĩko cianyu cia ũremi cigana Na ũrĩa mehia manyu marĩ manene —Nĩ mũhinyagĩrĩria andũ arĩa athingu, Mũkoya mahaki, Na mũkaima arĩa athĩni ihooto ciao kĩhingo-inĩ gĩa itũũra.

Nĩ ũndũ ũcio, arĩa marĩ na ũtaũku magaakira ki ihinda-inĩ rĩu, Tondũ rĩgaakorũo rĩrĩ ihinda rĩa thĩna.

Cariai ũndũ ũrĩa mwega no ti ũrĩa mũũru, Nĩguo mũthiĩ na mbere gũtũũra muoyo. Nake Yahweh Kĩhoti mũnene wa ita nĩ arĩkoragwo hamwe na inyuĩ, O ta ũrĩa muugaga atĩ arĩ hamwe na inyuĩ.

Thũũrai ũndũ ũrĩa mũũru, na mwendage ũrĩa mwega, Rekei matua marĩa marũngĩrĩru matooranie kĩhingo-inĩ gĩa itũũra. Kwahoteka Yahweh Kĩhoti mũnene wa ita Nĩ akaaiguĩra andũ arĩa magaatigara a nyũmba ya Jusufu tha.’

“Nĩ ũndũ ũcio, Yahweh Kĩhoti mũnene wa ita, o we Yahweh oigĩte atĩrĩ: ‘Nĩ gũgaakorũo na kĩrĩro ihaaro-inĩ ciothe cia mũingĩ, Na barabara-inĩ ciothe makoiga atĩrĩ, “Wũi, wũi!” Nĩ mageeta arĩmi macakae Na mete njorua cia gũcakaya nĩguo irĩre.’

‘Nĩ gũgaakorũo na kĩrĩro mĩgũnda-inĩ yothe ya mĩthabibũ; Tondũ nĩ ngaahĩtũkĩra gatagatĩ-inĩ kanyu,’ ũguo nĩguo Yahweh ekuuga.

‘Kaĩ arĩa meriragĩria mũthenya wa Yahweh marĩ na haaro-ĩ! Mũthenya wa Yahweh ũgaagĩkorũo ũtariĩ atĩa harĩ inyuĩ? Ũgaakorũo ũrĩ wa nduma, no ti ũtheri.

Ũgaakorũo ũtariĩ ta mũndũ ũrorĩra mũrũthi agacemania na nduba, Na aingĩra nyũmba yake, etiirania na guoko gwake rũthingo-inĩ, akarũmwo nĩ nyoka.

Githĩ mũthenya wa Yahweh ndũgaakorũo ũrĩ wa nduma no ti ũtheri; Githĩ ndũgaakorũo ũrĩ mũtumanu, no ti mũkengu?

Nĩ thũire, na nganyarara ikũngũĩro cianyu, Na ndikenagio nĩ mũtararĩko wa igomano cianyu iria nyamũre.

O na mũngĩndutĩra magongona ma njino na maruta, Ndirĩkenagio nĩmo; Na ndirĩĩtĩkagĩra magongona manyu ma ũiguano ma nyamũ iria norie.

Njehereriai inegene rĩa nyĩmbo cianyu; Na ndikwenda kũigua mĩgambo ya inanda cianyu cia ndigi.

Rekei matua marũngĩrĩru matherere o ta maĩ maingĩ, Na ũthingu ũtherere o ta ũrĩa karũũĩ kaihũru gathereraga.

Hihi nĩ niĩ mwareheire magongona na maruta Mĩaka ĩrĩa 40 mwarĩ werũ-inĩ, inyuĩ nyũmba ya Isiraeli?

No nĩ mũkuaga hema ya Sukuthu, hoti ĩrĩa mũthamaki wanyu Moloki o na Kaiwani, Mĩhianano ĩyo mwĩthondekeire, njata ya kĩhoti wanyu,

Na nĩ ngaamũtwara ithamĩrio kũndũ kũraya na Dameski,’ ũguo nĩguo ekuuga, o ũcio wĩtagwo Yahweh Kĩhoti mũnene wa ita.”