Amosi 6

“Kaĩ andũ arĩa meĩhokaga thĩinĩ wa Zayuni marĩ na haaro-ĩ, O acio maiguaga marĩ na ũgitĩri kĩrĩma-inĩ gĩa Samaria, Andũ marĩ igweta a rũrĩrĩ rũrĩa rũtĩĩku mũno harĩ iria ingĩ, O acio nyũmba ya Isiraeli ĩthiaga kũrĩ o!

Ringai mũthiĩ Kaline mũkeyonere. Muume kũu mũthiĩ Itũũra Inene rĩa Hamathu, Na mũikũrũke mũthiĩ Gathu kwa Afilisti. Hihi matũũra macio nĩ mega gũkĩra mothamaki maya, Na hihi gĩcigo kĩamo nĩ kĩnene gũkĩra kĩanyu?

Hihi nĩ kweheria mũreheria mũthenya ũrĩa wa ũũru meciria-inĩ manyu Na mũkarehe wathani wa ũhinya?

Makomaga marĩrĩ-inĩ ma mĩguongo na magetambũrũkia itĩ-inĩ, Makĩrĩaga ndũrũme cia rũũru na njaũ iria norie;

Matungaga nyĩmbo iratwarana na kĩnanda kĩa mũgeeto, Na magethondekera indo cia ũini o ta Daudi;

Manyuaga ndibei na mbakũri Na makeitĩrĩria maguta marĩa mega biũ. No matitindanagĩra na mwanangĩko wa Jusufu.

Nĩ ũndũ ũcio, nĩo magaakorũo marĩ a mbere gũtwarũo ithamĩrio, Na ndĩa ĩkĩrĩtie njano ya arĩa metambũrũkagia nĩ ĩgaathira.

‘Mũthamaki Yahweh nĩ ehĩtĩte nake we mwene,’ ũguo nĩguo Yahweh Kĩhoti mũnene wa ita ekuuga, ‘“Nĩ thũire mwĩtĩo wa Jakubu, Nĩ menete nyũmba ciake iria ndaya na igũrũ irĩ na ũgitĩri, Na nĩ ngaaneana itũũra rĩu na kĩrĩa kĩiyũire thĩinĩ warĩo.

“‘“Na andũ ikũmi mangĩgaatigara thĩinĩ wa nyũmba ĩmwe, o nao nĩ magaakua

Mũndũ wa mbarĩ ciao nĩ agooka kũmaruta nja na amacine ũmwe ũmwe. Nĩ akaaruta mahĩndĩ mao nyũmba; acoke orie ũrĩa ũgaakorũo rumu-inĩ cia thĩinĩ cia nyũmba ĩyo atĩrĩ, ‘Hihi kũrĩ angĩ mũrĩ nao?’ Nake oige, ‘Gũtirĩ!’ Nake mũndũ ũcio amwĩre, ‘Kira ki! Tondũ rĩrĩ ti ihinda rĩa kũgweta rĩĩtwa rĩa Yahweh o na hanini.’”

Nĩ gũkorũo Yahweh nĩwe ũheanĩte watho, Na nĩ akaahũũra nyũmba ĩrĩa nene ĩtuĩke tũcunjĩ, Na nyũmba ĩrĩa nini ĩtuĩke matigari.

Hihi mbarathi nĩ ihanyũkagĩra ndũmba-inĩ ya ihiga, Na hihi mũndũ no arĩme kuo na ngʼombe? Tondũ nĩ mũgarũrĩte matua marũngĩrĩru ma cira magatuĩka ta nyongo, Na maciaro ma ũthingu magatuĩka marũrũ ta mũgũta.

Nĩ mũkenagĩra ũndũ ũrĩa ũtarĩ kĩene, Na mũkoiga atĩrĩ, “Na githĩ tũtigĩĩte hinya nĩ ũndũ wa ũhoti witũ ene?”

Nĩ ũndũ ũcio inyuĩ nyũmba ya Isiraeli, nĩ ngaamũrehera rũrĩrĩ rũmũũkĩrĩre,’ ũguo nĩguo Yahweh Kĩhoti mũnene wa ita ekuuga, ‘Na nĩ makaamũhinyĩrĩria kuuma Lebo-hamathu o nginya Mũkuru wa Araba.’”