Amosi 7
Mũthamaki Yahweh nĩ aanyonirie ũndũ ũyũ: Atĩrĩrĩ, aatũmire kũgĩe na gĩkundi kĩa ngigĩ hĩndĩ ĩrĩa kĩmera gĩa kerĩ kĩaambagĩrĩria kuumĩra. Kĩu kĩarĩ kĩmera gĩa kerĩ thutha wa nyeki ya mũthamaki kũrengwo
Rĩrĩa ngigĩ icio ciarĩkirie kũrĩa mĩmera ya bũrũri ũcio, ngiuga atĩrĩ: “Wee Mũthamaki Yahweh, ndagũthaitha ũmohere! Jakubu angĩhota atĩa gwĩtiiria? Nĩ gũkorũo ndarĩ na hinya!”
Nĩ ũndũ ũcio, Yahweh akĩĩricũkwo ũndũ ũcio. Yahweh akiuga atĩrĩ: “Ũndũ ũcio ndũgeekĩka.”
Mũthamaki Yahweh nĩ aanyonirie ũndũ ũyũ: Atĩrĩrĩ, Mũthamaki Yahweh agĩathana kũgĩe na iherithia rĩa mwaki. Naguo ũkĩniaria maĩ marĩa maingĩ na mariku na ũgĩcina gĩcunjĩ kĩmwe kĩa bũrũri ũcio
Na niĩ ngiuga atĩrĩ: “Wee Mũthamaki Yahweh, ndagũthaitha ũtige gwĩka ũndũ ũcio. Jakubu angĩhota atĩa gwĩtiiria? Nĩ gũkorũo ndarĩ na hinya!”
Nĩ ũndũ ũcio, Yahweh akĩĩricũkwo ũndũ ũcio. Mũthamaki Yahweh akiuga atĩrĩ: “Ũndũ ũcio o naguo ndũgeekĩka.”
Ũndũ ũyũ nĩguo aanyonirie: Toonei, Yahweh aarũgamĩte rũthingo-inĩ rwakĩtwo na kabirũ, na guoko-inĩ gwake aanyitĩte kabirũ
Yahweh agĩcoka akĩnjũria atĩrĩ: “Nĩ kĩĩ ũrona Amosi?” Na niĩ ngĩmwĩra: “Ndĩrona kabirũ.” Nake Yahweh akĩnjĩra atĩrĩ: “Nĩ ngũiga kabirũ gatagatĩ ka andũ akwa Isiraeli. Ndigũcoka kũmarekera rĩngĩ
Kũndũ kũrĩa gũtũũgĩru kwa Isaaka nĩ gũgaatiganĩrio, na kũndũ kũrĩa kwamũre kwa Isiraeli kwanangwo; na nĩ ngookĩrĩra nyũmba ya Jeroboamu na rũhiũ rwa njora.”
Nake Amazia mũthĩnjĩri-Yahweh wa Betheli agĩtũma ndũmĩrĩri kũrĩ Mũthamaki Jeroboamu wa Isiraeli akĩmwĩra atĩrĩ: “Amosi nĩ aciirĩire gũgũũkĩrĩra arĩ o gatagatĩ ka nyũmba ya Isiraeli. Bũrũri ndũngĩhota gũkirĩrĩria ciugo icio ciake ciothe
Nĩ gũkorũo Amosi oigĩte ũũ, ‘Jeroboamu nĩ akooragwo na rũhiũ rwa njora, na andũ a Isiraeli nĩ magaatwarũo ithamĩrio moime bũrũri-inĩ wao.’”
Amazia agĩcoka akĩĩra Amosi atĩrĩ: “Wee muoni cioneki, thiĩ, ũũrĩre bũrũri-inĩ wa Yahuda, ũcaragie mũgate waku kuo, na ũrathagĩre ũhoro kuo
No ndũkanarathe ũhoro rĩngĩ thĩinĩ wa Betheli, tondũ nĩkuo handũ harĩa hamũre ha mũthamaki na nyũmba ya ũthamaki.”
Nake Amosi agĩcokeria Amazia akĩmwĩra atĩrĩ: “Niĩ ndiarĩ mũnabii kana mũrũ wa mũnabii; no ndarĩ mũrĩithi, na ndamenyagĩrĩra mĩtĩ ya mĩkũyũ
No Yahweh akĩnduta wĩra-inĩ wa kũrũmĩrĩra rũũru, na Yahweh akĩnjĩra atĩrĩ, ‘Thiĩ, ũkarathĩre andũ akwa Isiraeli ũhoro.’
Rĩu ta igua kiugo kĩa Yahweh: ‘Wee ũroiga ũũ, “Ndũkarathe ũhoro wa gũũkĩrĩra Isiraeli, na ndũkahunjie ũhoro wa gũũkĩrĩra nyũmba ya Isaaka.”
Nĩ ũndũ ũcio, Yahweh oigĩte ũũ: “Mũkaguo nĩ agaatuĩka mũmaraya thĩinĩ wa itũũra, nao ariũ aku na aarĩ aku makooragwo na rũhiũ rwa njora. Bũrũri waku ũkaagaywo na rũrigi rwa gũthima, na wee mwene ũgaakuĩra bũrũri-inĩ ũrĩ na thahu; na andũ a Isiraeli nĩ magaatwarũo ithamĩrio moime bũrũri-inĩ wao.”’”